
အဲဗာတန်နည်းပြ ရှောင်ဒိုက်က မန်စီးတီးအသင်းအား သရေကစားနိုင်ခဲ့သည့် အသင်း၏ စွမ်းဆောင်ရည်ကို ကျေနပ်သည်ဟု ပြောကြားခဲ့သည်။
အဲဗာတန်အသင်းသည် ကြာသပတေးနေ့က ကစားခဲ့သည့် ပရီးမီးယားလိဂ် Boxing Day ပွဲစဉ်တွင် မန်စီးတီးအသင်းကို အဝေးကွင်း၌ သွားရောက်ရင်ဆိုင်ခဲ့ရသော်လည်း (၁-၁)ဂိုးဖြင့် သရေကျကစားနိုင်ခဲ့ခြင်းဖြစ်သည်။
အဲဗာတန်အသင်းသည် ပွဲကျပ်ကာလအတွင်း၌ ရလဒ်ကောင်းများရရှိရန် ရုန်းကန်နေရသော်လည်း အာဆင်နယ်၊ ချယ်လ်ဆီးနှင့် မန်စီးတီးတို့နှင့် ရင်ဆိုင်ခဲ့ရသည့် (၃)ပွဲဆက်တိုက် သရေရလဒ်ရရှိအောင် စွမ်းဆောင်နိုင်ခဲ့သည်။
မန်စီးတီးနှင့်ပွဲအပြီးတွင် ရှောင်ဒိုက်က "တစ်ပွဲလုံးက စွမ်းဆောင်ရည်ကိုရော တစ်မှတ် ရယူနိုင်ခဲ့တာကိုရော ကျေနပ်ပါတယ်"ဟု ပြောကြားခဲ့သည်။
အဲဗာတန်အသင်းသည် ပရီးမီးယားလိဂ် (၁၈) အပြီးတွင် ရမှတ် (၁၇) မှတ်ဖြင့် အဆင့် (၁၅) နေရာ၌ ရပ်တည်နေပြီး တန်းဆင်းဇုန် အဆင့် (၁၈)နေရာမှ လက်စတာအသင်း(၁၄ မှတ်)နှင့် (၃) မှတ်သာ ကွာဟသည်။