ကျိုင်းတုံ၊ ဩဂုတ် ၁၅
တိုင်းရင်းသားရေးရာကိစ္စရပ်များကို ဒေသအလိုက် ပိုမိုထိရောက်စွာ ဆောင်ရွက်နိုင်ရေးအတွက် ခရိုင်ရုံးခွဲများနှင့် ကိုယ်ပိုင်အုပ်ချုပ်ခွင့်ရတိုင်း သို့မဟုတ် ကိုယ်ပိုင်အုပ်ချုပ်ခွင့်ရဒေသရုံးများ တိုးချဲ့ဖွင့်လှစ်ရန် နိုင်ငံတော်က မူအားဖြင့် ခွင့်ပြုပြီးဖြစ်ကြောင်း တိုင်းရင်းသားလူမျိုးများရေးရာဝန်ကြီးဌာန ပြည်ထောင်စုဝန်ကြီး ဦးသန်းမောင်က ပြောကြားသည်။
ပြည်ထောင်စုဝန်ကြီးသည် ဩဂုတ် ၁၄ ရက်က ရှမ်းပြည်နယ်အရှေ့ပိုင်း ကျိုင်းတုံမြို့ စည်ပင်သာယာရေးရုံး၌ ဂုံရှမ်း၊ ရှမ်းကြီး၊ တိုင်းနေ၊ တိုင်းလိ၊ လွယ်၊ ပလောင်၊ ‘ဝ’၊ လီဆူ၊ အားခေ၊ အာခါ၊ အဲန်၊ ဗမာနှင့် လားဟူ စသည့် တိုင်းရင်းသားစာပေနှင့် ယဉ်ကျေးမှုအသင်းအဖွဲ့ ၁၄ ဖွဲ့မှ ကိုယ်စားလှယ်များနှင့် တွေ့ဆုံစဉ် ယင်းသို့ ပြောကြားခဲ့ခြင်းဖြစ်သည်။
တွေ့ဆုံပွဲတွင် ပြည်ထောင်စုဝန်ကြီးက တိုင်းရင်းသားတို့၏ ရိုးရာဝတ်စားဆင်ယင်မှုများကို မူလလက်ရာ မပျ-က်စီးစေရေး ထိန်းသိမ်းရန်နှင့် လိုအပ်သည့် စည်းမျဉ်းများ သတ်မှတ်ထားရန်၊ လူနည်းစုတိုင်းရင်းသားများ၏ လူမှုဘဝ၊ ရိုးရာဝတ်စားဆင်ယင်မှုနှင့် ဓလေ့ထုံးတမ်းဆိုင်ရာ အချက်အလက်များကို တိကျမှန်ကန်စွာ ပြုစုမှတ်တမ်းတင် ထိန်းသိမ်းထားရန် မှာကြားခဲ့သည်။
ထို့ပြင် တိုင်းရင်းသားလူငယ်များအတွက် အသက်မွေးဝမ်းကျောင်းသင်တန်းများ ဖွင့်လှစ်ပေးနိုင်ရေး၊ ရိုးရာပွဲတော်များအတွက် ထောက်ပံ့ကူညီပေးရေး၊ အလုပ်အကိုင်အခွင့်အလမ်းများ ဖန်တီးပေးရေးနှင့် တိုင်းရင်းသားအချင်းချင်း စည်းလုံးညီညွတ်မှု ပိုမိုခိုင်မာစေရန် ယဉ်ကျေးမှုဖလှယ်ရေးအစီအစဉ်များ ဆောင်ရွက်နိုင်ရေးတို့ကိုလည်း ဆွေးနွေးခဲ့ကြောင်း သိရသည်။
