မအူပင်၊ ဩဂုတ် ၁၅
ဧရာဝတီတိုင်းဒေသကြီး၊ မအူပင်မြို့နယ်တွင် မိုးသည်းထန်စွာရွာသွန်းပြီး တိုးမြစ်ရေဝင်ရောက်နေမှုကြောင့် အောက်ထုံးကျေးရွာအုပ်စု၊ စစ်ကုန်းကျေးရွာရှိ အ.မ.က (သာယာကုန်း) ကျောင်းကို ဩဂုတ် ၁၅ ရက်မှစတင်၍ ယာယီပိတ်ထားကြောင်း သိရသည်။
တိုးမြစ်ရေဝင်ရောက်မှုကြောင့် ဆရာ၊ ဆရာမများနှင့် ကျောင်းသား၊ ကျောင်းသူများ ရေဘေးအန္တရာယ်ကင်းရှင်းစေရေးအတွက် ကျောင်းကို ဩဂုတ် ၁၅ ရက်မှ ၁၈ ရက်အထိ ၄ ရက်ကြာ ယာယီပိတ်ထားမည်ဖြစ်သည်။
ကျောင်းပိတ်ရက်များကြောင့် သင်ခန်းစာများ နောက်ကျမှုမရှိစေရန် အပတ်စဉ် တနင်္ဂနွေနေ့များတွင် ပြန်လည်အစားထိုးသင်ကြားပေးသွားမည်ဖြစ်ကြောင်း သိရသည်။
လက်ရှိတွင် စာသင်ကျောင်း အမြန်ဆုံးပြန်လည်ဖွင့်လှစ်နိုင်ရေးအတွက် ရေမြုပ်နေသည့် ကျောင်းအဝင်လမ်းများကို ကျေးရွာအစီအစဉ်ဖြင့် သဲအိတ်များခင်းခြင်းနှင့် ယာယီဝါးတံတား တည်ဆောက်ခြင်းတို့ ဆောင်ရွက်လျက်ရှိကြောင်း သိရသည်။
