ဆိုးလ်၊ ဩဂုတ် ၁၆
ကိုရီးယားကျွန်းဆွယ်တွင် တင်းမာမှုများလျှော့ချပြီး ငြိမ်းချမ်းစွာ အတူယှဉ်တွဲနေထိုင်နိုင်ရေးအတွက် မြောက်ကိုရီးယားနှင့် ဆွေးနွေးမှုများ ပြန်လည်စတင်ရန် တောင်ကိုရီးယားသမ္မတ လီဂျေးမြောင်က တောင်းဆိုလိုက်သည်။
ဂျပန်ကိုလိုနီလက်အောက်မှ ကိုရီးယားလွတ်မြောက်မှု နှစ်ပတ်လည်နေ့ အထိမ်းအမှတ်မိန့်ခွန်းတွင် လီက ကိုရီးယားနှစ်နိုင်ငံအနေဖြင့် ငြိမ်းချမ်းစွာ အတူယှဉ်တွဲနေထိုင်နိုင်ရေးအတွက် တွေ့ဆုံဆွေးနွေးမှုများ ပြုလုပ်သင့်ကြောင်း ပြောကြားခဲ့ခြင်းဖြစ်သည်။
၁၉၅၀-၁၉၅၃ ကိုရီးယားစစ်ပွဲသည် ငြိမ်းချမ်းရေးစာချုပ်ဖြင့် အဆုံးသတ်ခဲ့ခြင်းမဟုတ်ဘဲ အပစ်အခတ်ရပ်စဲရေး သဘောတူညီချက်ဖြင့်သာ ရပ်တန့်ထားခြင်းဖြစ်ရာ ယင်းအခြေအနေကို ရေရှည်တည်တံ့သည့် ငြိမ်းချမ်းရေးစနစ်တစ်ရပ်ဖြင့် အစားထိုးနိုင်ရေး မြောက်ကိုရီးယားနှင့် သက်ဆိုင်ရာအဖွဲ့အစည်းများအကြား ဆွေးနွေးရန် လီက တိုက်တွန်းခဲ့သည်။
အဆိုပါ ဆွေးနွေးမှုများမှတစ်ဆင့် မြောက်ကိုရီးယား၏ နျူကလီးယားစွမ်းရည်များကို ထိန်းချုပ်နိုင်မည့် ထိရောက်သော အစီအမံများကိုလည်း ချမှတ်နိုင်ဖွယ်ရှိကြောင်း ၎င်းက ပြောသည်။
တောင်ကိုရီးယားအစိုးရအနေဖြင့် နှစ်နိုင်ငံအကြား တင်းမာမှုများ လျှော့ချရန်နှင့် ပဋိပက္ခများ ထပ်မံမြင့်တက်လာခြင်းမရှိစေရန် ကြိုတင်ကာကွယ်ရေးအစီအမံများ တည်ဆောက်ကာ ရေရှည်တည်တံ့သည့် လုပ်ဆောင်ချက်များ ဆောင်ရွက်သွားမည်ဖြစ်ကြောင်း လီက ပြောကြားခဲ့သည်။
သို့သော် လက်ရှိအချိန်တွင် မြောက်နှင့်တောင်ကိုရီးယား ဆက်ဆံရေးမှာ အေးစက်နေဆဲဖြစ်သည်။ မြောက်ကိုရီးယားခေါင်းဆောင် ကင်မ်ဂျုံအန်က ပြန်လည်ပေါင်းစည်းရေးမူဝါဒကို စွန့်လွှတ်ထားပြီး တောင်ကိုရီးယားကို ရန်အလိုဆုံးနိုင်ငံအဖြစ် သတ်မှတ်ကာ နယ်စပ်ကာကွယ်ရေး ပိုမိုခိုင်မာစေရန် ညွှန်ကြားထားသည်။
မြောက်ကိုရီးယားဘက်ကလည်း လီ၏ စေ့စပ်ညှိနှိုင်းရေး ကမ်းလှမ်းချက်များကို ပယ်ချထားသည့်အပြင် တောင်ကိုရီးယား၏ နျူကလီးယားစွမ်းအင်သုံး ရေငုပ်သင်္ဘောဆိုင်ရာ အစီအစဉ်နှင့် အမေရိကန်-တောင်ကိုရီးယား ပူးတွဲစစ်ရေးလေ့ကျင့်မှုများကို ဝေဖန်ထားသည်။
ဂျပန်နိုင်ငံနှင့် ဆက်ဆံရေးနှင့်ပတ်သက်၍လည်း အတိတ်သမိုင်းဆိုင်ရာ ပြဿနာများကို ရင်ဆိုင်ဖြေရှင်းရင်း အနာဂတ်အတွက် လမ်းဖွင့်ထားရန် လိုအပ်ကြောင်း လီက ပြောကြားပြီး ဂျပန်နှင့်အတူ ငြိမ်းချမ်းရေးနှင့် ကြွယ်ဝချမ်းသာမှုရှိသည့် အနာဂတ်ကို တည်ဆောက်ရန် မျှော်လင့်ကြောင်း ပြောကြားခဲ့သည်။
Ref: The Straits Times
