ဧရာဝတီတိုင်းဒေသကြီးရှိ ရေဘေးသင့်ဒေသများသို့ အာဟာရဖြည့် အသင့်စားဘီစကွတ်များ ဖြန့်ဝေပေးလျက်ရှိကြောင်း WFP ကထုတ်ပြန်ထားသည်။
အလျင်အမြန် ဆန်းစစ်လေ့လာချက်များအရ လေးမျက်နှာမြို့နယ်ရှိ ရပ်ကွက် ၅ ခုနှင့် ကျေးရွာ ၉၈ ရွာမှ လူဦးရေ ၃၂,၀၀၀ ကျော် ရေဘေးသင့်ခဲ့ကြောင်း သိရသည်။
WFP က ဒေသခံမိတ်ဖက်အဖွဲ့အစည်းများထံသို့ အာဟာရဖြည့်ဘီစကွတ် မက်ထရစ်တန် ၂၀ ပေးပို့ထားပြီး လူဦးရေ ၁၀,၀၀၀ အတွက် လုံလောက်သည့် အရေးပေါ်ရိက္ခာများကို လက်ရှိဖြန့်ဝေလျက်ရှိကြောင်း ထုတ်ပြန်ထားသည်။
လက်ရှိတွင် မြန်မာနိုင်ငံတစ်ဝန်း ရေဘေးသက်ရောက်မှု အပြည့်အစုံကို ဆက်လက်အတည်ပြုနေဆဲဖြစ်ပြီး ပဋိပက္ခများ၊ နေရပ်စွန့်ခွာရမှုများ၊ စီးပွားရေးကျဆင်းမှုနှင့် အစားအစာဈေးနှုန်းမြင့်တက်မှုများ ပေါင်းစပ်သက်ရောက်နေသည့် အခြေအနေအောက်တွင် လူဦးရေ ၁၂ ဒသမ ၄ သန်းခန့် ဆာလောင်မွတ်သိပ်မှုနှင့် ရင်ဆိုင်နေရကြောင်း WFP က ဆိုသည်။
WFP အနေဖြင့် ရေဘေးသင့် ပြည်နယ်နှင့် တိုင်းဒေသကြီးများရှိ လိုအပ်ချက်များကို ဆက်လက်အကဲဖြတ်နေပြီး သွားလာခွင့်အခြေအနေနှင့် ရန်ပုံငွေရရှိမှုအပေါ် မူတည်ကာ အကူအညီအလိုအပ်ဆုံး ဒေသများသို့ စားနပ်ရိက္ခာထောက်ပံ့မှုများကို တိုးချဲ့ဆောင်ရွက်သွားမည်ဖြစ်ကြောင်း ထုတ်ပြန်ထားသည်။
