ဩဂုတ် - ၂၂ ( စနေနေ့ )
အမေရိကန်ရဲဌာနတွေက ဖလော့ခ် ကင်မရာတွေကို ယာဉ်အသွားအလာ စောင့်ကြည့်တာနဲ့ ရာဇဝတ်သားတွေကို ခြေရာခံဖို့ ပိုပြီး အသုံးပြုလာတာနဲ့အမျှ ဒီစနစ်အပေါ် လူထုရဲ့ မကျေနပ်မှုနဲ့ ဆန့်ကျင်မှုတွေလည်း ပိုများလာပါတယ်။
အခုဆိုရင် အမေရိကန်တစ်နိုင်ငံလုံးမှာ Flock ကင်မရာပေါင်း ၁၃၀,၀၀၀ ကျော် တပ်ဆင်ထားပြီးဖြစ်ပါတယ်။ အနည်းဆုံး မြို့ပေါင်း ၄,၀၀၀ လောက်က ရဲဌာနတွေဟာ အေအိုင် နည်းပညာသုံး ဒီစောင့်ကြည့်ကင်မရာတွေကို လမ်းဆုံတွေ၊ ကားရပ်နားရာနေရာတွေ၊ အများပြည်သူပိုင်မြေနေရာတွေမှာ တပ်ဆင်အသုံးပြုနေကြပါတယ်။ ဖလော့ခ် နည်းပညာ ကတော့ ဒီကင်မရာတွေကြောင့် အိမ်ဖောက်မှု၊ ကားလုယက်မှုနဲ့ လူသတ်မှုတွေကို တားဆီးဖမ်းဆီးနိုင်ခဲ့တယ်လို့ ဆိုပါတယ်။
ဒါပေမဲ့ ဒီစနစ်ကို ဆန့်ကျင်သူတွေကတော့ လူတွေရဲ့ ကိုယ်ရေးကိုယ်တာနဲ့ အခြေခံလွတ်လပ်ခွင့်တွေကို ထိခိုက်စေနိုင်တယ်လို့ ဝေဖန်ကြပါတယ်။ အထူးသဖြင့် လူတွေ ဘယ်ကိုသွားတယ်၊ ဘယ်နေရာမှာ ရှိနေတယ် ဆိုတာကို နည်းပညာနဲ့ အမြဲတမ်း ခြေရာခံနိုင်တဲ့အတွက် အများပြည်သူကို အလွန်အကျွံ စောင့်ကြည့်နေတဲ့ ထောက်လှမ်းရေးစနစ် ဖြစ်လာနိုင်တယ်လို့ စိုးရိမ်ကြတာပါ။
ပြီးခဲ့တဲ့ ဗုဒ္ဓဟူးနေ့က ဆန်ဒီယေဂိုမြို့တော်ကောင်စီအစည်းအဝေးမှာလည်း ဒီ ဖလော့ခ် နည်းပညာနဲ့ပတ်သက်ပြီး လူထုအမြင်တွေ နားထောင်ခဲ့ပါတယ်။ အဲဒီအချိန်မှာ စတားဝါး ရုပ်ရှင် ထဲက လူကြမ်းဇာတ်ကောင် ဒက်ဗာဒါ ဝတ်စုံဝတ်ထားတဲ့ အမျိုးသားတစ်ဦးက စကားပြောစင်မြင့်ကို လျှောက်တက်လာပြီး သူ့ရဲ့ အမြဲကြားရတဲ့ စက်ယန္တရားလို အသက်ရှူသံနဲ့အတူ ဒီနည်းပညာအပေါ် သူ့အမြင်ကို ပြောဆိုခဲ့ပါတယ်။ ဆိုလိုတာကတော့ ဖလော့ခ် ကင်မရာတွေက ရာဇဝတ်မှုတွေကို တားဆီးဖို့ အထောက်အကူဖြစ်နိုင်ပေမယ့်၊ တစ်ဖက်မှာလည်း အမေရိကန်ပြည်သူတွေရဲ့ ကိုယ်ရေးကိုယ်တာနဲ့ လွတ်လပ်ခွင့်တွေကို ထိခိုက်စေနိုင်တဲ့အတွက် ဆန့်ကျင်မှုတွေ ပိုတိုးလာနေတဲ့အခြေအနေ ဖြစ်ပါတယ်။
ဖလော့ခ်ကုမ္ပဏီဟာ အဓိကအားဖြင့် ပုံရိပ်တွေကို အလိုအလျောက် မှတ်မိအောင်လုပ်တဲ့ နည်းပညာမြင့် ကင်မရာတွေနဲ့ လူသိများပါတယ်။ ဒီကင်မရာတွေက လမ်းပေါ်မှာ ဖြတ်သန်းသွားတဲ့ကားတွေရဲ့ ဓာတ်ပုံကို ရိုက်ကူးပြီး ကားနံပါတ်ပြားတွေကို ဖတ်မှတ်နိုင်တဲ့စနစ် ဖြစ်ပါတယ်။ ဒါပေမဲ့ ဖလော့ခ် ရဲ့ ကွန်ဒေါ PTZ ဗီဒီယိုကင်မရာတွေကို ရဲဌာနတွေက အသုံးပြုနိုင်ဖို့အတွက် ဒီကင်မရာတွေဟာ အေအိုင် နည်းပညာကို အသုံးပြုပြီး ကင်မရာတစ်လုံးကနေ နောက်တစ်လုံးကို ဖြတ်သန်းသွားတဲ့ လူတစ်ယောက်ရဲ့ လှုပ်ရှားသွားလာမှုကို ခြေရာခံနိုင်သလို၊ လူတစ်ယောက်ရဲ့ အသွင်အပြင်ကို ဖော်ပြပြီး ရှာဖွေနိုင်ပါတယ်။
ဒီလအတွင်းအစောပိုင်းမှာ ဝါရှင်တန်ပို့စ် သတင်းစာက ဖော်ပြခဲ့တဲ့သတင်းအရ ဖလော့ခ် ရဲ့ ကင်မရာတွေကို ရဲအရာရှိ ၅၀ ကျော်က အမျိုးသမီးတွေကို သူတို့သဘောတူညီချက်မရှိဘဲ လိုက်လံစောင့်ကြည့်ဖို့ အသုံးပြုခဲ့ဖူးပါတယ်။ အဲဒီအမျိုးသမီးတွေထဲမှာ သူတို့ရဲ့ ဇနီးဟောင်း၊ ချစ်သူဟောင်းတွေပါ ပါဝင်တယ်လို့ ဆိုပါတယ်။
ဒါ့အပြင် ဖလော့ခ် ရဲ့ ဆော့ဖ်ဝဲမှာရှိတဲ့ လုံခြုံရေးအားနည်းချက်တွေကြောင့် ကုမ္ပဏီရဲ့ ဗီဒီယိုကင်မရာတွေက ရိုက်ကူးထားတဲ့ ကလေးတွေရဲ့ ပုံတွေတောင် အွန်လိုင်းပေါ်မှာ ပေါက်ကြားခဲ့ဖူးပါတယ်။
ဖလော့ခ် ကင်မရာတွေကို အမေရိကန်တစ်နိုင်ငံလုံးမှာ အကြီးအကျယ် စတင်တပ်ဆင်အသုံးပြုလာတာက ၂၀၂၀ ခုနှစ်ကတည်းက ဖြစ်ပါတယ်။ ဒါပေမဲ့ ဒီကင်မရာတွေကို တပ်ဆင်အသုံးပြုတဲ့ လုပ်ငန်းစဉ်ကတော့ အစကတည်းက ချောချောမွေ့မွေ့ ဖြစ်ခဲ့တာ မဟုတ်ပါဘူး။ အမေရိကန်တစ်နိုင်ငံလုံးမှာ ဖလော့ခ် ကင်မရာတွေကို သေနတ်နဲ့ပစ်တာ၊ ဆေးဖြန်းဖျက်ဆီးတာ၊ တိုင်ကိုဖြတ်ပြီး ဖြုတ်ချတာ၊ ပိတ်ဆို့ထားတာ စတဲ့ ဖျက်ဆီးမှုတွေ နဲ့ ကြုံတွေ့ခဲ့ရပါတယ်။ ဒီကင်မရာတွေကို ဖျက်ဆီးခံရတဲ့ အတည်ပြုဖြစ်ရပ်တွေကို စာရင်းပြုစုထားတဲ့ လော့ခ်စာရင်းအင်း ဝက်ဘ်ဆိုက်ရဲ့ အချက်အလက်အရ တစ်နိုင်ငံလုံးမှာ အနည်းဆုံး ကင်မရာ ၁၆၂ လုံး ဖျက်ဆီးခံထားရပါတယ်။ ကင်မရာတွေ ပိုပြီးများလာတာနဲ့အမျှ ဒီနည်းပညာကို ဆန့်ကျင်တဲ့သူတွေလည်း ပိုများလာပါတယ်။ အဲဒီထဲမှာ လူသိများတဲ့ ဆန့်ကျင်သူတစ်ဦးကတော့ ရီပတ်ဘလစ်ကန်အမတ် သောမတ်မက်ဆီ ဖြစ်ပါတယ်။ သူဟာ ပြီးခဲ့တဲ့လက ဖလော့ခ် ကင်မရာတွေ တပ်ဆင်အသုံးပြုနေတဲ့ ရဲဌာနတွေကို ဖက်ဒရယ်အစိုးရရဲ့ ရန်ပုံငွေ မပေးဖို့ ရည်ရွယ်တဲ့ ဥပဒေကြမ်းတစ်ရပ်ကို တင်သွင်းခဲ့ပါတယ်။
ဒီမိုကရက်ပါတီဝင် ကွန်နက်တီကပ် ပြည်နယ်အုပ်ချုပ်ရေးမှူး နက်ဒ်လာမောင့် ကတော့ ပြည်နယ်အနေနဲ့ ကိုယ်ရေးကိုယ်တာအချက်အလက်နဲ့ ပတ်သက်တဲ့ ဥပဒေသစ်တွေ မပြဋ္ဌာန်းနိုင်သေးခင်အထိ ဖလော့ခ် ကင်မရာအသစ်တွေ တပ်ဆင်တာကို မြို့တွေအနေနဲ့ ခဏရပ်ထားဖို့ အမိန့်ပေးထားပါတယ်။
REF: RT
#News #Myanmar
