ရုရှား၏ ထောက်ပံ့ပို့ဆောင်ရေး အခြေခံအဆောက်အအုံများကို ပစ်မှတ်ထားတိုက်ခိုက်နေသည့် ယူကရိန်း၏ စစ်ဆင်ရေး အရှိန်မြင့်တက်လာချိန် သြဂုတ် ၂၄ ရက်က ရုရှား၏ နာမည်ကျော် အွန်လိုင်းရောင်းဝယ်ရေးလုပ်ငန်း Ozon ၏ကုန်လှောင်ရုံများဒရုန်းဖြင့် တိုက်ခိုက်ခံခဲ့ရသည်ဟု အဆိုပါကုမ္ပဏီက ထုတ်ပြန်ခဲ့သည်။
ယူကရိန်းအစိုးရက ရုရှား၏ အကြီးဆုံးအွန်လိုင်းစတိုးဖြစ်သည့် Wildberries သည် စစ်တပ်သို့ စစ်ဘက်သုံးပစ္စည်းများ ထောက်ပံ့ပေးနေသည်ဟု စွပ်စွဲကာ သီတင်းပတ်များစွာကြာ ပစ်မှတ်ထား တိုက်ခိုက်ခဲ့သည်။
Ozon သည် ရုရှား၏ ဒုတိယအကြီးဆုံး အွန်လိုင်း အရောင်းအဝယ်လုပ်ငန်းဖြစ်ပြီး နိုင်ငံတစ်ဝန်းပစ္စည်းလက်ခံရယူသည့်နေရာများနှင့် ပို့ဆောင်ရေးသေတ္တာများကို အများအပြား တွေ့ရှိနိုင်သည်။
“ယူကရိန်တပ်ဖွဲ့တွေဟာ Wildberries ရဲ့ အကြီးဆုံး ထောက်ပံ့ပို့ဆောင်ရေးစခန်း ၁၅ ခုကို တိုက်ခိုက်ခဲ့ပြီးနောက် အခု Ozon ရဲ့ အလှည့်ရောက်လာတာ ဖြစ်ပါတယ်” ဟု ယူကရိန်ကာကွယ်ရေးဝန်ကြီးဌာနက ဩဂုတ်၂၂ ရက်တွင် ထုတ်ပြန်ခဲ့သည်။
သြဂုတ် ၂၄ ရက် နံနက် ၅ နာရီခန့်က ဒရုန်းတိုက်ခိုက်ခံရမှု ဖြစ်ပွားခဲ့ပြီးနောက် ရုရှားတောင်ပိုင်း မာခါချ်ကာလာရှိ ထောက်ပံ့ပို့ဆောင်ရေးစခန်းတစ်ခုတွင် “မီးလောင်ကျွမ်းမှု ဖြစ်ပွားခဲ့သည်” ဟု Ozon ကုမ္ပဏီက ပြောကြားခဲ့သည်။
“မူလရရှိထားတဲ့ သတင်းတွေအရ လူအချို့ ဒဏ်ရာရရှိခဲ့တယ်” ဟု ကုမ္ပဏီက တယ်လီဂရမ်တွင် ဖော်ပြထားပြီး ဒဏ်ရာရထားသူ များသည် အသက်အန္တရာယ် မစိုးရိမ်ရဟုဆိုသည်။
ထို့အပြင် ရုရှားတောင်ပိုင်းရှိ အာဒီဂေးစခ်နှင့် နဗင်းနိုမီးစ်ခ်မြို့များရှိ Ozon ကုန်လှောင်ရုံများကိုလည်း "ဒရုန်းတိုက်ခိုက်မည့် ခြိမ်းခြောက်မှုကြောင့် ဝန်ထမ်းများကို ဘေးလွတ်ရာသို့ ရွှေ့ပြောင်းပေးခဲ့ရသည်" ဟု သိရပြီး ထိခိုက်ဒဏ်ရာရရှိသူ သို့မဟုတ် အဆောက်အအုံ ပျက်စီးမှု မရှိခဲ့ပေ။
ညပိုင်းက ဒရုန်းတိုက်ခိုက်ခံရမှု ဖြစ်ပွားပြီးနောက် ကာစနိုဒါရှိ Ozon ၏ ထောက်ပံ့ပို့ဆောင်ရေးစခန်း တစ်ခုတွင် "ပြင်းထန်သော မီးလောင်ကျွမ်းမှု" ဖြစ်ပွားနေကြောင်း ကုမ္ပဏီက ယခင်က ထုတ်ပြန်ထားသည်။
“ အရေးပေါ်စနစ်တွေအားလုံး သတ်မှတ်ထားတဲ့အတိုင်း အလုပ်လုပ်ခဲ့တာကြောင့် ဝန်ထမ်းတွေကို ချက်ချင်း ဘေးလွတ်ရာ ရွှေ့ပြောင်းပေးနိုင်ခဲ့ပါတယ်။ မူလရရှိထားတဲ့ သတင်းတွေအရ ထိခိုက်ဒဏ်ရာရသူ မရှိပါဘူး” ဟု ကုမ္ပဏီက ပြောကြားခဲ့သည်။
ယခင်က တိုက်ခိုက်မှုများကြောင့် ဆာမာရာရှိ Ozon စခန်းတစ်ခုအပါအဝင် စိန့်ပီတာစဘတ်မြို့ပြင်ရှိ Ozon အဆောက်အအုံဘေးမှ ထောက်ပံ့ပို့ဆောင်ရေးစခန်းတစ်ခု ပျက်စီးခဲ့ရသည်။
Ozon နှင့် Wildberries ကုမ္ပဏီ နှစ်ခုလုံးသည် လျင်မြန်စွာ ကြီးထွားလာနေသည့် အွန်လိုင်းဈေးကွက်၏ အစိတ်အပိုင်းအများအပြားကို ထိန်းချုပ်ထားသောကြောင့် "ရုရှား၏ အမေဇုန်" ဟု တင်စားခံရသည်။
■ Ref:AFP
■ AFP photos
