စက်တင်ဘာ - ၅ ( စနေနေ့ )
နယ်သာလန် ဗဟိုဘဏ်(DNB)ဟာ အမေရိကန်ပြည်ထောင်စုအတွင်း ထိန်းသိမ်းထားရှိတဲ့ သူတို့ရဲ့ ရွှေအရန် စတော့တွေကို ပြန်လည်ရုပ်သိမ်းလိုက်ပါတယ်။ နယ်သာလန် ဗဟိုဘဏ်ဟာ ရွှေတန်ချိန် ၈၆ တန်ကို လန်ဒန်မြို့ထံ လွှဲပြောင်းလိုက်ပြီဖြစ်ကြောင်း ဗုဒ္ဓဟူးနေ့က ကြေညာခဲ့ပြီး၊ ဒီလိုဆောင်ရွက်မှုကို "ပထဝီနိုင်ငံရေး မတည်ငြိမ်မှုများ မြင့်တက်နေချိန်" အတွင်း "ပဋိပက္ခအတွက် ကြိုတင်ပြင်ဆင်မှု" ဖြစ်တယ်လို့ ဖော်ပြခဲ့ပါတယ်။
အဆိုပါ လွှဲပြောင်းမှုကို မတ်လနဲ့ ဩဂုတ်လကြားမှာ ဆောင်ရွက်ခဲ့တာပါ။ ရွှေအများစုကို နယူးယောက်မှ ရွှေ့ပြောင်းခဲ့ခြင်းဖြစ်ပြီး ကျန်ရှိသောအပိုင်းကို ကနေဒါမှ ရွှေ့ပြောင်းခဲ့တာဖြစ်ပါတယ်။ ရွှေတန်ချိန် ၂၇ တန်ခန့်ကိုသာ အတ္တလန္တိတ်သမုဒ္ဒရာကို ဖြတ်သန်း၍ အမှန်တကယ် သယ်ယူပို့ဆောင်ခဲ့တာဖြစ်ပြီး ကျန်ရှိသည့်အပိုင်းကိုမူ အမေရိကတိုက်အတွင်း ရောင်းချကာ လန်ဒန်တွင် ပြန်လည်ဝယ်ယူသည့်နည်းဖြင့် ဆောင်ရွက်ခဲ့ပါတယ်။ ဒီလို မလွှဲပြောင်းမီက နယ်သာလန် ဗဟိုဘဏ် (DNB) ဟာ မြောက်အမေရိကတိုက်မှာ ရွှေတန်ချိန် ၃၁၃ တန် ထိန်းသိမ်းထားရှိခဲ့တာပါ။
DNB ဥက္ကဋ္ဌ အိုလပ်ဖ် ဆလိုင်းပန် ရဲ့ စာဖြင့် ရေးသားထုတ်ပြန်ချက်အရ "ဒီလို နေရာရွှေ့ပြောင်းလိုက်တာကြောင့် ကျနော်တို့ရဲ့ ရွှေအရန်စတော့တွေရဲ့ အရောင်းအဝယ်ပြုလုပ်နိုင်စွမ်းကို မြှင့်တင်နိုင်ခဲ့ပါတယ်" လို့ ဆိုပါတယ်။ "ဒါတွေကို ဘယ်တော့မှ အသုံးပြုဖို့ မလိုအပ်ဘူးလို့ မျှော်လင့်ထားပေမဲ့ ကျနော်တို့ရဲ့ တောင့်တင်းခိုင်မာမှုနဲ့ ကြိုတင်ပြင်ဆင်ထားရှိမှုကိုတော့ ပိုမိုအားကောင်းအောင် လုပ်ဆောင်ထားဖို့ လိုအပ်ပါတယ်" ဟုလည်း ပြောကြားခဲ့ပါတယ်။
DNB ရဲ့ အခုလို လုပ်ဆောင်မှုဟာ ပြင်သစ် ဗဟိုဘဏ်က နယူးယောက် ဖက်ဒရယ်အရန်ဘဏ် ဘောက်စ်များ အတွင်း ထိန်းသိမ်းထားရှိတဲ့ ကျန်ရှိသော ရွှေတန်ချိန် ၁၂၉ တန်ကို ၂၀၂၅ ခုနှစ် ဇူလိုင်လနှင့် ၂၀၂၆ ခုနှစ် ဇန်နဝါရီလကြားမှာ ရောင်းချခဲ့ပြီးနောက် ထွက်ပေါ်လာတာဖြစ်တာကြောင့် ပြင်သစ်အနေနဲ့ အမေရိကန်မှာ ရွှေတစ်တန်မျှ မကျန်ရှိတော့ပါဘူး။ ထိုရောင်းချရရှိငွေများကို ဥရောပတွင် တန်ဖိုးတူ ရွှေပမာဏ ပြန်လည်ဝယ်ယူရန် အသုံးပြုခဲ့တာဖြစ်ပါတယ်။
၂၀၁၇ ခုနှစ်မှာ အမေရိကန် သမ္မတ ဒေါ်နယ် ထရမ့် ရဲ့ ပထမသက်တမ်း အုပ်ချုပ်မှုအောက်မှာ ဂျာမနီ ဗဟိုဘဏ် ဟာ နယူးယောက်မှာ ထိန်းသိမ်းထားရှိတဲ့ သူတို့ရဲ့ ရွှေတန်ချိန် ၃၀၀ ကို ဖရန့်ဖတ်မြို့ထံ လွှဲပြောင်းမှု ပြီးစီးခဲ့ပြီဖြစ်ကြောင်း ကြေညာခဲ့ပါတယ်။ ထရမ့် ရဲ့ ဒုတိယသက်တမ်းအတွင်းမှာတော့ ထင်ရှားတဲ့ ဂျာမန် စီးပွားရေးပညာရှင် တစ်ချို့က အမေရိကန်မှာ ကျန်ရှိနေသေးတဲ့ ဗဟိုဘဏ်ရဲ့ ရွှေအရန်စတော့တွေကို ပြန်လည်ရုပ်သိမ်းဖို့ တောင်းဆိုခဲ့ကြပါတယ်။
သမ္မတ ဟူးဂိုး ချားဗက်စ် လက်ထက် ဗင်နီဇွဲလားနိုင်ငံဟာ ပြည်ပဘဏ်များမှ သူတို့ရဲ့ ရွှေအရန်စတော့ တန်ချိန် ၁၆၀ ခန့်ကို ပြည်တော်ပြန် သယ်ယူခဲ့ပြီး၊ အဲဒီလုပ်ဆောင်မှုဟာ ၂၀၁၂ ခုနှစ် ဇန်နဝါရီလမှာ ပြီးစီးခဲ့ပါတယ်။ ဒါပေမဲ့ ဗင်နီဇွဲလား ရွှေတန်ချိန် ၃၁ တန်ခန့်ဟာ အင်္ဂလန်ဘဏ် မှာ ထိန်းသိမ်းထားရှိဆဲ ဖြစ်ပါတယ်။ အဲဒီရွှေတွေကို တိုင်းပြည်သို့ ပြန်လည်သယ်ဆောင်ဖို့ ထိုစဉ်က သမ္မတ နီကိုလပ်စ် မာဒူရို ရဲ့ ကြိုးပမ်းမှုတွေကို ဗြိတိန်က ဟန့်တားခဲ့တာဖြစ်ပြီး၊ ဗြိတိန်ဟာ မာဒူရို ကို ဗင်နီဇွဲလား အစိုးရရဲ့ တရားဝင် ခေါင်းဆောင်အဖြစ် အသိအမှတ်မပြုခဲ့တာ ကြောင့်ဖြစ်ပါတယ်။
နယ်သာလန် ဗဟိုဘဏ် (DNB) က အင်္ဂလန်ဘဏ်မှာ ထိန်းသိမ်းထားရှိတဲ့ ရွှေကို "ကမ္ဘာပေါ်မှာ အရောင်းအဝယ် ပြုလုပ်ရအလွယ်ကူဆုံး ရွှေ" အဖြစ် ချီးကျူးခဲ့ပါတယ်။ နယ်သာလန် ဗဟိုဘဏ်ဟာ ၂၀၂၅ ခုနှစ် အကုန်အထိ ပိုင်ဆိုင်တဲ့ ရွှေပမာဏဟာ တန်ချိန် ၆၁၂.၄ တန် ရှိပြီး ယူရို ၇၂ ဘီလီယံခန့် (ဒေါ်လာ ၈၄ ဘီလီယံခန့်) တန်ဖိုးရှိကြောင်း သတင်းထုတ်ပြန်ခဲ့ပါတယ်။
REF: RT
#Myanmar #News
