မုဒုံမြို့ မီတာ ၄၀၀ အားကစားကွင်းတွင် ဘောလုံးပွဲကျင်းပနေစဉ် မိုးကြိုစက်ကွင်းမိ၍ ဘောလုံးသမားတစ်ဦး သေဆုံး

မုဒုံမြို့ မီတာ ၄၀၀ အားကစားကွင်းတွင် ဘောလုံးပွဲကျင်းပနေစဉ် မိုးကြိုစက်ကွင်းမိ၍ ဘောလုံးသမားတစ်ဦး သေဆုံးမှု ယနေ့ (စက်တင်ဘာ ၂၂ ရက်) ညနေပိုင်းက ဖြစ်ပွားကြောင်း သိရသည်။

ယနေ့ (စက်တင်ဘာ ၂၂ ရက်) ညနေ ၅ နာရီ မိနစ် ၄၀ ခန့်တွင် မုဒုံမြို့ မီတာ ၄၀၀ အားကစားကွင်းတွင် ကျင်းပပြုလုပ်နေသည့် မုဒုံမြို့နယ်အမျိုးသားအလွှတ်တန်းဘောလုံးပြိုင်ပွဲ၌ Lion City (မော်လမြိုင်) အသင်းမှ ရှေတန်းကစားသမားဖြစ်သူ Sa Sa (ကျောနံပါတ် - ၉) မှာ မိုးကြိုးစက်ကွင်းထိမှန်ကာ လဲကျသွားခဲ့ကြောင်း မျက်မြင်တွေ့ရှိသူတစ်ဦးက ပြောကြားသည်။

၎င်းကဆက်လက်ပြီး "ဘောလုံးကန်နေတဲ့အချိန်မှာ မိုးကရွာနေတယ်။ မိုးချိမ်းပြီး မိုးကြိုးပစ်သံကြားလိုက်တဲ့အချိန်မှာ ဘောလုံးသမားက ကွင်းထဲမှာလဲကျနေပြီး အသက်ပါ ပါသွားတာပါ" ဟု ပြောကြားသည်။

မိုးကြိုးစက်ကွင်းမိ၍ သေဆုံးခဲ့သည့် Sa Sa ၏ ရုပ်အလောင်းအား Myanmar Young Mudon Rescue မှ မုဒုံမြို့နယ်ပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်။

အဆိုပါဘောလုံးပြိုင်ပွဲသည် မုဒုံမြို့နယ်အမျိုးသားအလွှတ်တန်းဘောလုံးပြိုင်ပွဲ၏ ဆီမီးဖိုင်နယ်ပွဲစဉ်ဖြစ်ပြီး ယင်းပွဲစဉ်ကို Lion City FC နှင့် Taung Paw Thar FC တို့ ယှဉ်ပြိုင်ကစားနေစဉ် ယင်းကဲ့သို့ ဖြစ်ပွားခဲ့ခြင်း ဖြစ်သည်။

Photo - Myanmar Young Mudon Rescue