ပြည်တွင်းဘုရားဖူးယာဉ်များဖြင့် ခရီးသွားလာသည့် ခရီးသည်များအနေဖြင့် ဥပဒေနှင့်မညီသည့် ဓာတ်ပုံ၊ ဗီဒီယိုများ ဖုန်းထဲမပါရှိစေရန် ပြည်တွင်းဘုရားဖူးနှင့် ခရီးသွားဝန်ဆောင်မှုအသင်းက ထုတ်ပြန်သည်။
ပြည်တွင်းဘုရားဖူးနှင့် ခရီးသွားဝန်ဆောင်မှုအသင်းက ဘုရားဖူးယာဉ်များ ဘေးကင်းလုံခြုံစွာ ထွက်ခွာနိုင်ရေးနှင့် လမ်းခရီးစဉ်အတွင်း လိုက်နာရှောင်ကြဉ်ရမည့်အချက်များဆိုသည့်
အချက် ၉ ချက်ပါ အသိပေးစာကို စက်တင်ဘာ ၂၁ ရက်တွင် ထုတ်ပြန်ထားခြင်းဖြစ်သည်။
အဆိုပါ အချက်ကိုးချက်မှာ ခရီးသည်များအားလုံး နိုင်ငံသားစိစစ်ရေးကတ်/ ခရီးသွားထောက်ခံစာ(ရဲစခန်း) ယူဆောင်ရန် နှင့် Guide များ လမ်းခရီးစစ်ဆေးရေးအဖွဲ့များနှင့် အဆင်ပြေစွာ
ပြောဆိုဆက်ဆံ၍ပူးပေါင်းဆောင်ရွက်ရန်၊ လုပ်ငန်းရှင်များအားလုံး ဟိုတယ်ခရီး၏ ခရီးလှည့်လည်ရေး လိုင်စင် DPTOA ၏ထောက်ခံချက်ဖြင့် တိုင်းဒေသကြီးမှထုတ်ပေးသောလိုင်စင်ရယူထားရန်၊ ခရီးသွားစဉ်လမ်းခရီးထူးခြားဖြစ်စဉ်များအား အသင်းဝင်ဂိတ်အချင်းချင်း အသိပေးခြင်းနှင့် DPTOA Member Group ထဲစာရေးသားပို့၍ အသိပေးရန်၊ အသင်းဝင်ကတ်နှင့် လုပ်ငန်းလိုင်စင်များကိုမိတ္တူဆွဲ၍ထွက်ခွာမည့် ယာဉ်ပေါ်ယူဆောင်သွားရန် စသည့်အချက်များ ပါဝင်သည်။
ထို့ပြင် ခရီးသည်များ ဥပဒေနှင့် မညီညွတ်သော ဓာတ်ပုံ၊ ဗီဒီယိုများ ဖုန်းထဲတွင် မပါရှိစေရန်၊ ယာဉ်ထွက်ချိန် နံနက် ၅ နာရီနှင့် နောက်ပိုင်းစတင်ထွက်ခွာရန်နှင့် စုရပ်သို့ ပြန်ရောက်ချိန် နောက်အကျဆုံး ည ၈/ ၁၀ နာရီအတွင်း ပြန်ရောက်မည့်အစီအစဉ်များ ရေးဆွဲစေလွှတ်ရန်နှင့် ခရီးသည်များ အိမ်အပြန်အဆင်ပြေစေရန် ပါဝင်သည့် Guide များမှ Taxi (Grab) ငှားပေးခြင်း၊ ကားနံပါတ် မှတ်တမ်းတင်ထားရန်နှင့် ဧည့်သည်အိမ်ရောက်သည့်အခါ Guide အားဖုန်းပြန်ဆက်ခိုင်းရန်နှင့် Guide မှ အဆက်အသွယ် ပြန်လုပ်ရန်လည်း အဆိုပါအသင်းက ထုတ်ပြန်ထားသည်။
