စပိန်လက်ရွေးစင်နည်းပြ ဒယ်လာဖွန်တေက ကမ္ဘာ့ဖလားချန်ပီယံဆု ရရှိခဲ့ပေမဲ့ မလုံလောက်သေးကြောင်းနဲ့ ပိုကောင်းအောင် ကြိုးစားသွားဦးမှာဖြစ်ကြောင်း ပြောကြားခဲ့ပါတယ်။
ဒယ်လာဖွန်တေက စပိန်လက်ရွေးစင်အသင်းကို ယူရို-၂၀၂၄ ချန်ပီယံဆုနဲ့ ၂၀၂၆ ကမ္ဘာ့ဖလားချန်ပီယံဆုတွေ ဆက်တိုက်ရယူပေးထားသူဖြစ်ပြီး ပြီးခဲ့တဲ့ ရက်ပိုင်းအတွင်းမှာ ၂၀၃၂ ခုနှစ်အထိ သက်တမ်းတိုးစာချုပ် ချုပ်ဆိုခဲ့တာကြောင့် ယူရို-၂၀၃၂ ပြိုင်ပွဲအထိ စပိန်အသင်းမှာ ဆက်ရှိသွားမှာဖြစ်ပါတယ်။
ဒယ်လာဖွန်တေအနေနဲ့ ယူရိုချန်ပီယံဆုရော ကမ္ဘာ့ဖလားချန်ပီယံဆုကိုပါ ကာကွယ်သွားရမှာဖြစ်ပြီး လောလောဆယ်မှာတော့ လာမယ့် အင်္ဂလန်နဲ့ပွဲကိုသာ အာရုံစိုက်ထားကြောင်းလည်း ဒယ်လာဖွန်တေက ပြောကြားခဲ့ပါတယ်။
စပိန်အသင်းက အခု နိုင်ငံတကာရက်သတ္တပတ်မှာ အင်္ဂလန်၊ ခရိုအေးရှား၊ ချက်အသင်းတွေနဲ့ Nations League အုပ်စုပွဲစဉ်(၄)ပွဲ ယှဉ်ပြိုင်ကစားရမှာပါ။
''ကမ္ဘာ့ဖလားချန်ပီယံဆုရရှိပြီး နှစ်မိနစ်၊ သုံးမိနစ်အကြာမှာ ကစားသမားတစ်ယောက်က ကျွန်တော်တို့ ဘယ်အထိ အနိုင်ရဖို့ လိုသေးလဲလို့ လာမေးခဲ့ပါတယ်။ ကျွန်တော်က စက်တင်ဘာ(၂၆)ရက် အင်္ဂလန်နဲ့ ရင်ဆိုင်ရမယ့်ပွဲလို့ တုံ့ပြန်ခဲ့ပါတယ်။ ကျွန်တော်တို့အသင်းက ဘယ်တော့မှ မရပ်တန့်ပါဘူး။ ကမ္ဘာ့ဖလားကလည်း မလုံလောက်ပါဘူး။ ကျွန်တော်တို့ ပိုကောင်းဖို့ လိုအပ်ပါတယ်။ ကျွန်တော်တို့ ရရှိခဲ့တာတွေက နောက်ပွဲအနိုင်ရဖို့ မလုံလောက်သေးပါဘူး'' လို့ ဒယ်လာဖွန်တေက ပြောကြားခဲ့ပါတယ်။
ဒယ်လာဖွန်တေက စပိန်လက်ရွေးစင်အသင်းလူစာရင်းကို ကမ္ဘာ့ဖလားချန်ပီယံအသင်းကိုပဲ အခြေခံရွေးချယ်ထားကြောင်းလည်း သိရပါတယ်။
