မန္တလေးမြို့၊ ချမ်းအေးသာစံမြို့နယ်ရှိ KTVများကိုဝင်ရောက်စစ်ဆေးခဲ့ရာ မူးယစ်ဆေးဝါးသုံးစွဲနေသူ၁၆ဦးကို ဖမ်းဆီးရမိပြီး ktv ဆိုင်၂ဆိုင်အား ခေတ္တယာယီ ပိတ်သိမ်းခိုင်းထားကြောင်း သတင်းရရှိသည်။
ရဲတပ်ဖွဲ့နှင့်အုပ်ချုပ်ရေးအဖွဲ့အစည်းအသီးသီးပါဝင်သော ပူးပေါင်းအဖွဲသည် ချမ်းအေးသာစံမြို့နယ်အတွင်းရှိ KTV များတွင် မူးယစ်ဆေးဝါး သုံးစွဲခြင်း ရှိမရှိကို အောက်တိုဘာလ ၁၁ရက် ည၁၁နာရီခန့်မှစတင်စစ်ဆေးခဲ့ကြောင်း သိရသည်။
ချမ်းအေးသာစံမြို့နယ်၊ ကန်ကောက်ရပ်ကွက်၊ ၅၃ လမ်းနှင့် ၃၄ လမ်းထောင့်ရှိ Paradise KTVအားဝင်ရောက်စစ်ဆေးခဲ့ရာ ထူးခြားမှုမရှိသော်လည်း အောက်တိုဘာလ ၁၂ ရက်နေ့ နံနက် ၁နာရီခန့်တွင် ကန်ကောက်ရပ်ကွက်၊ မြို့ပတ်လမ်း၊ ၂ရလမ်းနှင့်၂၈ လမ်းကြားရှိိ 7 Mandalay KTV အား ဝင်ရောက်စစ်ဆေးခဲ့ရာ အခန်းတစ်ချို့တွင် Happy Water ပါဝင်သောမူးယစ်ဆေးဝါးများကို အသုံးပြုလျက်ရှိသူ အမျိုးသား၊ အမျိုးသမီး ၈ဦးတို့ကို တွေ့ရှိခဲ့ကြောင်း သိရသည်။
ထို့နောက် ပူးပေါင်းအဖွဲ့ဖြင့်ဆက်လက်စစ်ဆေးခဲ့ရာ နံနက်၃နာရီခန့်တွင် ကန်ကောက်ရပ်ကွက်၊ ၅၆ လမ်း၊ လမ်း၃ဝနှင့်၃၁ လမ်းကြားရှိ LASVEGAS KTV အား ဝင်ရောက်ရှာဖွေစစ်ဆေးခဲ့ရာ အခန်းတစ်ခန်းတွင် မူးယစ်ဆေးဝါးအသုံးပြုလျက်ရှိသော အမျိုးသား၊ အမျိုးသမီး ၈ဦး တို့အား ထပ်မံစစ်ဆေးတွေ့ရှိခဲ့ကြောင်း သိရသည်။
" လတ်တလောတော့ အမှု၂မှု၊ လူ၁၆ဦးကို သက်ဆိုင်တဲ့မူးယစ်ပုဒ်မတွေနဲ့ အမှုဖွင့် စစ်ဆေးအရေးယူနေပါတယ်။ ဆိုင်တွေကတော့ လတ်တလော ခေတ္တပိတ်သိမ်းဖို့ညွှန်ကြားထားပါတယ်။ မူးယစ်ဆေးဝါးက ဆက်စပ်တရားခံတွေ စစ်ဆေးနေဆဲမို့ အကုန်ထုတ်ပြန်လို့မရပါဘူး" ဟု ရဲတပ်ဖွဲ့တာဝန်ရှိသူတစ်ဦးက ဖြစ်စဉ်နှင့်ပတ်သက်ပြီး ပြောကြားသည်။
ဖမ်းဆီးရမိသူ အမျိုးသားအမျိုးသမီး၁၆ဦးကို အမှတ်(၃)နယ်မြေရဲစခန်းတွင် မူးယစ်ဆေးဝါးပုဒ်မများဖြင့် အမှုဖွင့်အရေးယူ ဆောင်ရွက်လျက်ရှိပြီး မူးယစ်ဆေးဝါးသုံးစွဲနေသူများကို တွေ့ရှိခဲ့သည့် အဆိုပါKTV ၂ဆိုင်ကို ခေတ္တယာယီ ပိတ်ခိုင်းထားကြောင်းလည်း စုံစမ်းသိရသည်။
