ကချင်ပြည်နယ်၊ မိုးကောင်းမြို့နယ်၊ ကညင်မြိုင်ကျေးရွာတွင် ရွေးကောက်ခံထားရသည့် အုပ်ချုပ်ရေးမှူး ၇၀ ကျော်နှင့် ရှမ်းနီလက်နက်ကိုင်အဖွဲဲ့ (SNA) တပ်မဟာ (၅၆၅)၊ အရပ်ဘက်-စစ်ဘက် ပေါင်းစပ်ညှိနှိုင်းရေးအဖွဲ့ (CMRCC)တို့ အောက်တိုဘာ ၁၈ ရက်တွင် ကညှင်မြိုင်ကျေးရွာရှိ တပ်ရင်း (၃၈၃) ခန်းမ၌ တွေ့ဆုံဆွေးနွေးခဲ့ကြောင်း သိရသည်။
အဆိုပါ တွေ့ဆုံပွဲတွင် ဒေသတွင်း အေးချမ်းသာယာရေး၊ လုံခြုံရေးနှင့် ဖွံ့ဖြိုးတိုးတက်ရေးဆိုင်ရာ ကိစ္စရပ်များကို ဆွေးနွေးခဲ့ကြပြီး SNA တပ်မဟာ (၅၆၅) ဒုတပ်မဟာမှူးစဝ်ဆေဘုန်းကျော်က ရှမ်းနီအမျိုးသားများ၏ အဓိကမျှော်မှန်းချက် ၅ ရပ်ကို ရှင်းလင်းတင်ပြခဲ့သည်။
SNA တပ်မဟာ ၅၆၅ ဒုတပ်မဟာမှူး စဝ်ဆေဘုန်းကျော်က" ကျွန်တော်တို့က အစိုးရမူဝါဒအတိုင်း သွားနေတဲ့အခါ ပြည်သူကလည်းသိသင့်တယ်။ ကျွန်တော်တို့အကောင်အထည် ဖော်နေတဲ့ မူဝါဒလည်းချပြတာ ။ ကျွန်တော်တို့ဘက်က ကူညီနိုင်တာလည်း ကူညီမယ်။ သူတို့ဘက်က ထောက်ပြစရာတွေရှိလည်း ကျွန်တော်တို့ဘက်က သိရအောင် တွေ့ဆုံပွဲလုပ်တာပါ။ ရပ်ကျေးတိုင်း မလာနိုင်သည့်တိုင်အောင် အုပ်စုတိုင်း ပါလာကြတယ်။သံလမ်းရိုး ၊ကားလမ်းရိုဆိုတော့ ရှမ်းလူမျိုး၊ ဗမာလူမျိုး၊ ကချင်မျိုး အစုံပါပဲ။ ရပ်ရွာက လက်ရွေးစင်တွေကိုး။ ကျွန်တော်တို့ဘက်ကလည်း မူဝါဒနှင့် ကူညီနိုင်တာတွေကို အားပါးတရ ဆွေးနွေးဖြစ်ပါတယ်။မိုးညှင်းမြို့နယ်ဘက်လည်း တွေ့ဆုံပွဲတွေ လုပ်နိုင်အောင် ကြိုးစားနေကြပါတယ်"ဟု ပြောကြားသည်။
ရွေးချယ်ခံအုပ်ချုပ်ရေးမှူးများက ဒေသတွင်း လိုအပ်ချက်များဖြစ်သည့် မူးယစ်ဆေးဝါး၊လုံခြုံရေးကိစ္စရပ်များတင်ပြခဲ့သည်။SNA ခေါင်းဆောင်များနှင့် ပြည်သူများအကြား ကြုံတွေ့နေရသည့် အခက်အခဲများကို ပူးပေါင်းညှိနှိုင်းဖြေရှင်းနိုင်ရေးနှင့် ဒေသဖွံ့ဖြိုးရေးလုပ်ငန်းများတွင် အတူတကွ ပူးပေါင်းဆောင်ရွက်သွားရေးတို့ကိုလည်း ဆွေးနွေးခဲ့ကြောင်းသိရသည်။
၂၀၂၆ ခုနှစ် အောက်တိုဘာ ၉ ရက်တွင် နေပြည်တော်ရှိ Horizon Lake View ဟိုတယ် အစည်းအဝေးခန်းမ၌အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှုညှိနှိုင်းရေးကော်မတီ (NSPNC) နှင့် ရှမ်းနီအမျိုးသားများညီညွတ်ရေးကောင်စီ/ရှမ်းနီလက်နက်ကိုင်အဖွဲ့ (SNUC/SNA) တို့ တွေ့ဆုံ၍ SNUC/SNA အား နိုင်ငံရေးအရ တရားဝင်အသိအမှတ်ပြုရေး၊ တပ်ပိုင်းဆိုင်ရာ ပေါင်းစပ်ညှိနှိုင်းဆောင်ရွက်နိုင်မည့် ကိစ္စရပ်များ ဆွေးနွေးထားသည်။
