ပြေးဆွဲမှုရပ်နားထားသည်မှာ တစ်နှစ်ကျော်ရှိပြီဖြစ်သော ရန်ကုန်-အောင်လံ-တောင်တွင်းကြီး-ပုဂံ ရထားလမ်းပိုင်း (အနောက်ဘက်လမ်းပိုင်း) ကို အောက်တိုဘာ ၂၃ ရက်မှစတင်၍ ယခင် ရန်ကုန်-အောင်လံ-ပုဂံလမ်းကြောင်းအတိုင်း ပြန်လည်ပြေးဆွဲမည်ဖြစ်ကြောင်း မြန့်မာ့မီးရထား၏ကြေညာချက်အရ သိရသည်။
အဆိုပါ ရန်ကုန်-အောင်လံ-ပုဂံလမ်းကြောင်းမှာ ပြီးခဲ့သော ၂၀၂၅ ခုနှစ် စက်တင်ဘာလအတွင်းက ပြည်-ပုဂံ ရထားလမ်းပိုင်း (ဝက္ကသေးရွာအနီး) ရှိ ရန်ပယ်ချောင်းတံတား ရေလယ်တိုင် အမှတ် ၂ နှင့် အမှတ် ၃ တို့ နိမ့်ကျမှုဖြစ်ပွားခြင်းကြောင့် ရထားများဖြတ်သန်းသွားလာရန် အဆင်မပြေတော့သဖြင့် ရန်ကုန်-အောင်လံ-တောင်တွင်းကြီး-ပုဂံရထားလမ်းပိုင်းတစ်လျှောက် တိုက်ရိုက်ပြေးဆွဲလျက်ရှိသည့် ခရီးစဉ်များ ရပ်ဆိုင်းခဲ့ရခြင်းဖြစ်သည်။ ၎င်းခရီးစဉ်အတွက် ၂၀၂၅ အောက်တိုဘာ ၂၁ ရက်တွင် ရထားလမ်းကြောင်းပြောင်းလဲပြီး ရန်ကုန်-ပျဉ်းမနား–ပုဂံ ခရီးစဉ်အဖြစ် (အရှေ့ဘက်လမ်းပိုင်း) တွင် လက်ရှိအချိန်အထိ ပြေးဆွဲပေးလျက်ရှိကြောင်း သိရသည်။
ယခုအခါ ရန်ပယ်ချောင်းတံတားကို ပြန်လည်ပြင်ဆင်ပြီးဖြစ်၍ ရန်ကုန်-ပုဂံ မီးရထားခရီးစဉ်အတွက် အောက်တိုဘာ ၂၃ ရက်မှစတင်၍ မူလ ရန်ကုန်-အောင်လံ-ပုဂံလမ်းကြောင်း (အနောက်ဘက်လမ်းပိုင်း) အတိုင်း အမှတ် ၆၁ အဆန်နှင့် အမှတ် ၆၂ အစုန် ခရီးသည်စီးအမြန်ရထား ပြန်လည်ပြေးဆွဲမည်ဖြစ်ကြောင်း သိရသည်။
အမှတ် ၆၁ အဆန် အမြန်ရထားသည် ရန်ကုန်ဘူတာမှ ညနေ ၄ နာရီ ၁၅ မိနစ်တွင် ထွက်ခွာပြီး ပုဂံဘူတာသို့ နောက်တစ်နေ့ မွန်းတည့် ၁၂ နာရီတွင် ရောက်ရှိမည်ဖြစ်သည်။ အမှတ် ၆၂ အစုန် အမြန်ရထားသည် ပုဂံဘူတာမှ ညနေ ၄ နာရီ ၁၅ မိနစ်တွင်ထွက်ခွာပြီး နောက်တစ်နေ့ မွန်းတည့် ၁၂ နာရီတွင် ရန်ကုန်ဘူတာသို့ ရောက်ရှိမည်ဖြစ်ကြောင်း သိရသည်။ ရန်ကုန်-ပုဂံ လူစီးအမြန်ရထားခရီးစဉ်တစ်လျှောက် ကြားဘူတာများဖြစ်သည့် သာယာဝတီ၊ လက်ပံတန်း၊ မင်းလှ၊ အုတ်ဖို၊ ကြို့ပင်ကောက်၊ ဇီးကုန်း၊ နတ္တလင်း၊ ပေါင်းတည်၊ ပုတီးကုန်း၊ သဲကုန်း၊ ဆင်မြီးဆွဲ၊ ပြည် (ရွှေတံခါး)၊ အောင်လံ၊ ဆတ်သွား၊ တောင်းတွင်းကြီး၊ မြို့သစ်၊ နတ်မောက်၊ လေးအိမ်၊ သာမြား၊ ပင်းချောင်း၊ ကျောက်ပန်းတောင်း၊ ငါ့မင်းမေး၊ စုတည် စသည့်ဘူတာများတွင် ရပ်တန့်မည်ဖြစ်ကြောင်း သိရသည်။
