မြဝတီ-ကော့ကရိတ် ဒေါနတောင်ကျော် အာရှလမ်းသစ် ကွမ်းခြံကွေ့တွင် ၂၀၂၆ ခုနှစ် အောက်တိုဘာ ၂၃ ရက် နံနက် ၈ နာရီ ၁၅ မိနစ်ခန့်က (၁၂) ဘီးကုန်တင်ယာဉ်နှင့် ဟိုက်ဂျက်ဈေးကားတို့ တိုက်မိမှုဖြစ်ပွားခဲ့ပြီး ယာဉ်နှစ်စီးလုံး လမ်းဘေးသို့ ထိုးကျသွားခဲ့ကာ နှစ်ဦး ဒဏ်ရာပြင်းထန်စွာရရှိကြောင်း သိရသည်။
ကော့ကရိတ်ဘက်မှ မြဝတီဘက်သို့ လာသော ၁၂ ဘီး ကုန်တင်ယာဉ်သည် ဘုရားလေးကုန်းဆင်းမှ ဆင်းလာစဉ် အရှိန်မထိန်းနိုင်ဘဲ မြဝတီဘက်မှလာသော ဟိုက်ဂျက် စျေးကားအား တိုက်မိကာ နှစ်စီးစလုံး လမ်းဘေးသို့ကျသွားကြောင်း၊ ယာဉ်မတော်တဆမှု ဖြစ်ပွားခဲ့ခြင်းကြောင့် ဟိုက်ဂျက်ယာဉ်ပေါ်ပါ လိုက်ပါ လာသည့် အမျိုးသမီးတစ်ဦးတွင် ဘယ်ဘက်လက်မောင်းအရိုး ထိခိုက်ဒဏ်ရာများရရှိခဲ့ပြီး ဟိုက်ဂျက် ယာဉ်မောင်းမှာလည်း ဦးခေါင်းပေါက်ဒဏ်ရာများ ရရှိခဲ့ကြောင်း သိရသည်။
အခင်းဖြစ်ပွားရာနေရာသို့ Z-Rescue အရေးပေါ်ကယ်ဆယ်ရေးအဖွဲ့ ရောက်ရှိလာပြီး ထိခိုက်ဒဏ်ရာရရှိ သူများကို လိုအပ်သော ရှေးဦးသူနာပြုစုမှုများ အရေးပေါ်
ပြုလုပ်ပေးခဲ့ကာ မြဝတီပြည်သူ့ဆေးရုံကြီးသို့ ပို့ဆောင်ကူညီပေးခဲ့ကြောင်း Z.Rescue တာဝန်ခံ ကိုဇော်က ပြောကြားသည်။
"ကော့ကရိတ်ဘက်က လာတဲ့ ၁၂ ဘီးယာဉ်ကုန်ကားဟာ ဘုရားလေးကုန်းဆင်းက ဆင်းလာတာ brake ပေါက်လာတယ်ပြောတယ်။ မြဝတီကလာတဲ့ Hijet စျေးကားနဲ့တိုက်တာ ၊နှစ်စီးလုံးလမ်းဘေး ကျသွားတာ Hijet ယာဉ်မောင်းနဲ့ အမျိုးသမီးတို့ဒဏ်ရာရတယ်။နှစ်ယောက်လုံးကို မြဝတီဆေးရုံသို့ ချက်ချင်း ပို့လိုက်ပါ တယ်"ဟု Z.Rescue တာဝန်ခံ ကိုဇော်က ပြောကြားသည်။
မြဝတီ ဒေါနတောင်ကျော် အာရှလမ်းသစ်သည် ကုန်းတက် ကုန်းဆင်း ၊အကွေ့အကောက်များခြင်းကြောင့် အထူးသတိပြု မောင်းနှင်ကြပါရန် လိုအပ်သည်ဟုဆိုသည်။
မြဝတီတောင်ပေါ်လမ်းပိုင်းတွင် ယာဉ်မတော်တဆမှုများ ဖြစ်ပွားပါက အချိန်မရွေး အကူအညီတောင်းခံနိုင်ရန် Z-Rescue အရေးပေါ်ကယ်ဆယ်ရေးအဖွဲ့ (09797119119ကို ဆက်သွယ်နိုင်ကြောင်းလည်း Z.Rescue တာဝန်ခံ ကိုဇော်က ပြောကြားသည်။
Photo - Z.Rescue
