အောက်တိုဘာ - ၂၆ ( တနင်္လာနေ့ )
ဘရာဇီးသမ္မတ ရွေးကောက်ပွဲမှာ လက်ရှိသမ္မတ လူလာဒါစေးလ်ဗား က အတိုက်အခံ လက်ယာစွန်း သမ္မတလောင်း ဖလာဗီယို ဘိုဆိုနာရို ကို အနိုင်ရပြီး သမ္မတအဖြစ် ပြန်လည်အရွေးချယ်ခံလိုက်ရပါပြီ။ ဖလာဗီယိုဟာ ထောင်ကျနေတဲ့ သမ္မတဟောင်း ဇာယာယာ ဘိုဆိုနာရိုရဲ့ သားဖြစ်ပြီး၊ အမေရိကန်သမ္မတ ဒေါ်နယ်ထရမ့်ရဲ့ မိတ်ဖက်တစ်ဦးလည်း ဖြစ်ပါတယ်။
မဲရုံ ၉၉.၇၆ ရာခိုင်နှုန်း ရေတွက်ပြီးစီးသွားချိန်မှာတော့ ဘရာဇီးနိုင်ငံ ရွေးကောက်ပွဲကော်မရှင် (TSE) ရဲ့ ထုတ်ပြန်ချက်အရ လူလာက တရားဝင်မဲရဲ့ ၅၁.၇၅ ရာခိုင်နှုန်း ရရှိခဲ့ပြီး၊ ဘိုဆိုနာရိုကတော့ ၄၈.၂၅ ရာခိုင်နှုန်းနဲ့ ရှုံးနိမ့်ခဲ့ပါတယ်။ ဒီရလဒ်ဟာ သင်္ချာနည်းအရ သေချာရေရာသွားပြီဖြစ်တယ်လို့လည်း ကော်မရှင်က ကြေညာထားပါတယ်။
ဒီအနိုင်ရရှိမှုကြောင့် ဘရာဇီးလို လက်တင်အမေရိကရဲ့ အကြီးဆုံးစီးပွားရေးနိုင်ငံဟာ ဝါရှင်တန်ဘက်ကို ယိမ်းသွားမယ့်အစား BRICS အဖွဲ့ကြီးထဲမှာ သူ့ရဲ့ အဓိကနေရာကို ဆက်လက်ထိန်းသိမ်းသွားနိုင်တော့မှာ ဖြစ်ပါတယ်။ ရှုံးနိမ့်သွားတဲ့ ကိုယ်စားလှယ်ကတော့ ဘရာဇီးအနေနဲ့ BRICS အဖွဲ့ဝင်အဖြစ် ပါဝင်နေတာ ကို လူလာက အမေရိကန်ကို ရန်စဖို့အတွက် သုံးနေတယ်ဆိုပြီး အရင်က ပွင့်ပွင့်လင်းလင်း ဝေဖန်ခဲ့ဖူးပါတယ်။
ဒီဒုတိယအကျော့ မဲခွဲမှုကို ပြင်းထန်စွာ ယှဉ်ပြိုင်ခဲ့ကြပြီး ရွေးကောက်ပွဲ မမှန်မကန်လုပ်မှုတွေနဲ့ ပတ်သက်လို့ အပြန်အလှန် စွပ်စွဲမှုတွေလည်း ရှိခဲ့ပါတယ်။ လူလာရဲ့ မဲဆွယ်အဖွဲ့ကတော့ သူ့ကို ထောက်ခံအားပေးမှု အများဆုံးရှိတဲ့နေရာတွေမှာ ဒေသန္တရ အာဏာပိုင်တွေက အများပြည်သူသုံး သယ်ယူပို့ဆောင်ရေးတွေကို ရည်ရွယ်ချက်ရှိရှိ ပိတ်ပင်ကန့်သတ်ခဲ့တယ်လို့ စွပ်စွဲခဲ့ပါတယ်။ လက်ရှိသမ္မတဘက်ကလည်း မြို့တော်ဝန်အချို့ဟာ လူတွေကို မဲမပေးနိုင်အောင် တားဆီးဖို့ ကြိုးစားနေတယ်လို့ စွပ်စွဲပြီး တရားစွဲမယ်လို့လည်း ခြိမ်းခြောက်ခဲ့ပါတယ်။
ဆာဗာဒိုမြို့မှာဆိုရင် ဘတ်စ်ကား ဒါဇင်နဲ့ချီပြီး ဂိုဒေါင်တွေထဲမှာ ဆက်တိုက်ရပ်တန့်ထားခဲ့တာကြောင့် ရွေးကောက်ပွဲ တရားသူကြီးက မြို့နယ်သယ်ယူပို့ဆောင်ရေး အတွင်းရေးမှူးကို ဖမ်းဝရမ်းထုတ်ဖို့အထိ အမိန့်ပေးခဲ့ပါတယ်။ မြို့တော်အရာရှိတွေကတော့ ဒီလိုအနှောင့်အယှက်ဖြစ်ရတာဟာ လူလာကို ထောက်ခံသူတွေက မဲဆွယ်စတစ်ကာတွေကို ယာဉ်တွေပေါ်မှာ ကပ်ခဲ့ကြလို့ပါလို့ အကြောင်းပြခဲ့ကြပါတယ်။
REF: RT
#News #Myanmar
