အောက်တိုဘာ - ၂၈ ( ဗုဒ္ဓဟူးနေ့ )
အိန္ဒိယနိုင်ငံအနေနဲ့ ကုလသမဂ္ဂ လုံခြုံရေးကောင်စီ (UNSC) ကို တိုးချဲ့ဖွဲ့စည်းရာမှာ အမြဲတမ်း အဖွဲ့ဝင်သစ်တွေ အတွက် ဗီတိုအာဏာ တူညီစွာ ရရှိဖို့ တောင်းဆိုလိုက်ပြီး၊ ဗီတိုအာဏာမပါတဲ့ ဒုတိယတန်းစား အမြဲတမ်းအဖွဲ့ဝင်နေရာတွေ ဖန်တီးတာက ကမ္ဘာ့အဖွဲ့အစည်းအတွင်း လက်ရှိ ရှိနေတဲ့ မညီမျှမှုတွေကို ပိုဆိုးသွားစေလိမ့်မယ်လို့ သတိပေးလိုက်ပါတယ်။
နယူးယောက်မြို့မှာ တနင်္လာနေ့က ပြုလုပ်ခဲ့တဲ့ ကုလသမဂ္ဂ ပြုပြင်ပြောင်းလဲရေး ဆွေးနွေးပွဲမှာ ကုလသမဂ္ဂဆိုင်ရာ အိန္ဒိယအမြဲတမ်းကိုယ်စားလှယ် ဟာရစ်ရှ် ပါဗာတာနေနီ က အခုလို ပြောကြားခဲ့တာ ဖြစ်ပါတယ်။ လက်ရှိ အမြဲတမ်းအဖွဲ့ဝင် ၅ နိုင်ငံ (ရုရှား၊ တရုတ်၊ အမေရိကန်၊ ဗြိတိန်နဲ့ ပြင်သစ်) ရဲ့ အာဏာကို ဆက်လက်ထိန်းသိမ်းထားပြီး ဗီတိုအာဏာမပါတဲ့ ရေရှည်အဖွဲ့ဝင်နေရာတွေ ဖန်တီးဖို့ အဆိုပြုချက်တွေကို နယူးဒေလီဘက်က ကန့်ကွက်ထားပါတယ်။
“တရားမျှတမှုနဲ့ တန်းတူညီမျှမှုဆိုတာ အမြဲတမ်းအဖွဲ့ဝင်အားလုံး တူညီတဲ့ အခွင့်အရေးနဲ့ တာဝန်ဝတ္တရားတွေကို ခံစားခွင့်ရှိဖို့ တောင်းဆိုနေတာပါပဲ” လို့ ပါဗာတာနေနီက ပြောကြားခဲ့ပြီး ကုလသမဂ္ဂရှိနေတဲ့ ကာလပတ်လုံး ဗီတိုအာဏာကို အမြဲတမ်းအဖွဲ့ဝင်သစ်တွေဆီပါ တိုးချဲ့ပေးရမယ်လို့ အလေးပေး ပြောဆိုခဲ့ပါတယ်။
ကမ္ဘာ့လူဦးရေရဲ့ ၆၀ ရာခိုင်နှုန်းကျော် ရှိနေတဲ့ အာရှ-ပစိဖိတ် ဒေသမှာ ကုလသမဂ္ဂ လုံခြုံရေးကောင်စီ (UNSC) ရဲ့ အမြဲတမ်းနေရာ တစ်နေရာတည်းသာ ရှိနေပြီး၊ အာဖရိကနဲ့ လက်တင်အမေရိက ဒေသတွေမှာဆိုရင် အမြဲတမ်းကိုယ်စားပြုခွင့် လုံးဝ မရှိသေးပါဘူး။ အာဖရိကသမဂ္ဂ ကတော့ အာဖရိကအတွက် ဗီတိုအာဏာပါတဲ့ အမြဲတမ်းအဖွဲ့ဝင်နေရာ အနည်းဆုံး နှစ်နေရာ ရရှိဖို့ တောင်းဆိုထားတဲ့ ပြုပြင်ပြောင်းလဲရေး စံနမူနာပုံစံ တစ်ခုကို ဒီနှစ်အစောပိုင်းမှာ တရားဝင် တင်ပြခဲ့ပါတယ်။
ဒါ့အပြင် အိန္ဒိယနိုင်ငံနဲ့အတူ ၎င်းရဲ့ G4 မိတ်ဖက်နိုင်ငံတွေဖြစ်တဲ့ ဘရာဇီး၊ ဂျာမနီနဲ့ ဂျပန်နိုင်ငံတို့ကလည်း အမြဲတမ်းနဲ့ အမြဲတမ်းမဟုတ်တဲ့ အဖွဲ့ဝင်နေရာ နှစ်မျိုးစလုံးကို တိုးချဲ့ဖို့အတွက် ဆွေးနွေးညှိနှိုင်းကြဖို့ တောင်းဆိုထားကြပါတယ်။
REF: RT
#News #Myanmar
