အောက်တိုဘာ - ၂၈ ( ဗုဒ္ဓဟူးနေ့ )
စင်ကာပူနဲ့ အင်ဒိုနီးရှားနိုင်ငံတို့က ဒေသတွင်းမှာ နယ်စပ်ဖြတ်ကျော် မီးခိုးမြူငွေ့တွေ ဖြစ်ပေါ်စေတဲ့ တောမီးနဲ့ မြေယာမီးရှို့မှုတွေမှာ ပါဝင်ပတ်သက်နေတဲ့ ကုမ္ပဏီတွေကို အရေးယူဖို့အတွက် ပူးတွဲလုပ်ငန်းအဖွဲ့ တစ်ခုကို ဖွဲ့စည်းလိုက်ပြီလို့ ကြေညာလိုက်ပါတယ်။
စင်ကာပူ နိုင်ငံခြားရေးဝန်ကြီး ဗီဗီယန် ဘာလာခရစ်ရှ်နန် နဲ့ အင်ဒိုနီးရှားနိုင်ငံခြားရေးဝန်ကြီး အာမန်နတ်သာ နာဆီရာ တို့ဟာ အောက်တိုဘာ ၂၇ ရက်နေ့က ဂျကာတာမြို့မှာ ပြုလုပ်ခဲ့တဲ့ သူတို့ရဲ့ ပူးတွဲသတင်းစာရှင်းလင်းပွဲမှာ ဒီမီးခိုးမြူငွေ့ကိစ္စနဲ့ ပတ်သက်ပြီး ဆွေးနွေးခဲ့ကြပါတယ်။
ဘာလာခရစ်ရှ်နန် ကတော့ ဒီမီးခိုးမြူငွေ့ကြောင့် အဓိက ထိခိုက်ခံစားရတာက အင်ဒိုနီးရှားနိုင်ငံသားတွေ၊ အထူးသဖြင့် ကာလီမန်တန်နဲ့ ဆူမတြားက ပြည်သူတွေပဲ ဖြစ်တယ်လို့ ပြောပါတယ်။ အယ်လ်နီညို က သဘာဝဘေးအန္တရာယ်တစ်ခု ဖြစ်ပေမယ့် မီးခိုးမြူငွေ့ကတော့ သဘာဝအလျောက် ဖြစ်လာတာ မဟုတ်ဘူးလို့ သူက အလေးအနက် ပြောကြားခဲ့ပါတယ်။ “တောမီးနဲ့ မြေယာမီးလောင်မှုတွေက လူတွေရဲ့ လုပ်ဆောင်ချက်ကြောင့် ဖြစ်လာတာမို့လို့ အင်ဒိုနီးရှားနဲ့ စင်ကာပူနိုင်ငံသားတွေအားလုံးရဲ့ ကျန်းမာရေးကို ကာကွယ်ပေးဖို့ တာဝန်ရှိပါတယ်” လို့ သူက ဆိုပါတယ်။
မီးလောင်မှုတွေနဲ့ ပတ်သက်ဆက်နွှယ်နေတဲ့ ကုမ္ပဏီတွေကို တာဝန်ခံခိုင်းစေဖို့နဲ့ မီးဘေးကာကွယ်ရေးကို ရေရှည်ဖြေရှင်းချက်တစ်ခု ဖြစ်လာစေဖို့ စင်ကာပူနိုင်ငံရဲ့ အစီအစဉ်တွေကို မျှဝေပြောကြားခဲ့ပါတယ်။ လုပ်ဆောင်ချက်တွေနဲ့ အချက်အလက်တွေကို အနီးကပ် ညှိနှိုင်းဆောင်ရွက်သွားနိုင်ဖို့အတွက် စင်ကာပူနဲ့ အင်ဒိုနီးရှားတို့ ပူးတွဲလုပ်ငန်းအဖွဲ့ တစ်ခု ဖွဲ့စည်းဖို့ နာဆီရာ က အဆိုပြုခဲ့ပြီး ဘာလာခရစ်ရှ်နန်ကလည်း လက်ခံခဲ့ပါတယ်။
'ကုမ္ပဏီတွေအနေနဲ့ နောင်မှာ ဒီလိုစည်းကမ်းဖောက်ဖျက်မှုတွေ ထပ်မံမလုပ်အောင် တားဆီးဖို့အတွက် ဥပဒေပိုင်းဆိုင်ရာ၊ စည်းကမ်းထိန်းသိမ်းရေးဆိုင်ရာနဲ့ စီးပွားရေးဆိုင်ရာ အစီအမံတွေကို ပိုမိုကျယ်ကျယ် ပြန့်ပြန့် အသုံးပြုဖို့ ကျမတို့ အသင့်ဖြစ်နေပါပြီ။ ပြီးတော့ အင်ဒိုနီးရှားနဲ့လည်း လက်တွဲပြီး အနီးကပ် လုပ်ဆောင်သွားမှာပါ' လို့ သူက ပြောကြားခဲ့ပါတယ်။
ဝန်ကြီးတွေဟာ အနာဂတ်မှာ ပူးပေါင်းဆောင်ရွက်မယ့် ကိစ္စရပ်တွေကိုလည်း ဆွေးနွေးခဲ့ကြပါသေးတယ်။ အထူးသဖြင့် ၂၀၂၇ ခုနှစ်မှာ စင်ကာပူက အာဆီယံ (ASEAN) ဥက္ကဋ္ဌတာဝန်ကို ယူရမယ့်အချိန်နဲ့ နှစ်နိုင်ငံကြား သံတမန်ဆက်ဆံရေး နှစ် ၆၀ ပြည့် အထိမ်းအမှတ် နှစ်ကို ရောက်ရှိမယ့်အချိန်တွေမှာ ပူးပေါင်းဖို့ ဆွေးနွေးခဲ့ကြတာပါ။
အဲဒီအစည်းအဝေးမှာတော့ စီးပွားရေး၊ စွမ်းအင်၊ ကာကွယ်ရေး၊ ဒစ်ဂျစ်တယ် ပူးပေါင်းဆောင်ရွက်ရေး၊ ပတ်ဝန်းကျင်နဲ့ လူ့စွမ်းအားအရင်းအမြစ် ဖွံ့ဖြိုးတိုးတက်ရေး စတဲ့ ကဏ္ဍတွေအတွက် သဘောတူစာချုပ် ၂၆ ခုကို လက်မှတ်ရေးထိုးခဲ့ကြပါတယ်။
REF: Singapore Business Review
#News #Myanmar
