၂၀၂၆ ခုနှစ်၊ နိုဝင်ဘာလ ၁၀ ရက်
ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဟိုပုံးမြို့နယ်၊ နောင်ဒေး-မိုင်းပျဉ်းသွားကားလမ်းတွင် မိုးသည်းထန်စွာ ရွာသွန်းမှုကြောင့် ယနေ့ နိုဝင်ဘာလ ၁၀ ရက်၊ နံနက်ပိုင်းက မြေသားနိမ့်ကျပျက်စီးမှု ဖြစ်ပေါ်ခဲ့ ကြောင်း သိရသည်။
နောင်ဒေးကျေးရွာအုပ်စု၊ နောင်ဒေးကျေးရွာမှ မိုင်းပျဉ်းကျေးရွာအုပ်စု၊ ဆောတော ကျေးရွာသို့ ဆက်သွယ်ထားသည့် ကျေးရွာချင်းဆက် ကျောက်လမ်း၏ မိုင်တိုင် (၅/၄) အနီးတွင် လမ်းအရှည် ပေ ၄၀ ခန့်၌ ရေစီးကြောင်းဖြစ်ပေါ်ပြီး မြေသားနိမ့်ကျကာ လမ်းပျက်စီးခဲ့ခြင်းဖြစ်ကြောင်း သိရသည်။
လက်ရှိတွင် လမ်းပျက်စီးမှုကြောင့် အိမ်စီးကားငယ်များ ရှောင်ကွင်းသွားလာနိုင်ဆဲဖြစ်ပြီး လမ်းပန်းဆက်သွယ်မှု ပြတ်တောက်မှု မရှိကြောင်း သိရသည်။
ဟိုပုံးမြို့နယ် အပါအဝင် ရှမ်းတောင်ဒေသအတွင်း မိုးအဆက်မပြတ် ရွာသွန်းမှုကြောင့် ယနေ့ နိုဝင်ဘာ ၁၀ ရက်၌ ရေကြီးရေလျှံခြင်း၊ မြေပြိုခြင်းများ ဖြစ်ပေါ်လျက်ရှိကြောင်း သိရသည်။
