၄. ၂. ၂၀၂၅
Written by Thettant
ရန်ကုန်တိုင်းဒေသကြီး၊ ထန်းတပင်မြို့နယ်၊ ရိုးကြီးနဲ့ ရိုးလေးကျေးရွာကြားမှာ YBS- ၂၂ ယာဉ်နဲ့ ဖယ်ရီပို့တဲ့ ဝန်ထမ်းကြိုပို့ယာဉ် မျက်နှာချင်းဆိုင်တိုက်မိရာက လမ်းဘေးမှာထိုင်နေတဲ့ လူငယ်အမျိုးသားတစ်ဦးက YBS- ၂၂ ယာဥ်က ထပ်ဆင့်တိုက်မိလို့ သေဆုံးခဲ့ရတဲ့ဖြစ်စဥ် ဒီမနက်မှာ ဖြစ်ပွားခဲ့တယ်လို့ ကူညီပေးတဲ့ ပရဟိတအသင်းတွေဆီက သိရပါတယ်။
ဖြစ်စဥ်က ဒီနေ့ ဖေဖော်ဝါရီလ ၄ ရက် မနက်အစောပိုင်းမှာဖြစ်ပွားခဲ့တာဖြစ်ပြီး နံနက် ၈ နာရီ ၃၅ မိန်အချိန်ခန့်ကြမှ ယာဉ်တိုက်မှုဖြစ်ပွားကြောင်း သတင်းအရ ဖြစ်စဉ်နေရာကို Family Driving Rescue အသင်းနဲ့ မနောဖြူစင်အသင်းတို့ သွားရောက်ကူညီပြီး သေဆုံးတဲ့ ရုပ်အလောင်းကို လှိုင်သာယာဆေးရုံဆီ ပို့ဆောင်လိုက်တယ်လို့ သိရပါတယ်။
“ဖယ်ရီကားကို YBS ယာဥ်က ဖြတ်တိုက်ပြီး လမ်းဘေးထိုင်နေတဲ့သူကို ထပ်တိုက်မိတာ။ အတိုက်ခံရတဲ့လူငယ်က အသက် အစိတ်၊ ၃၀ ကြားလောက်ပဲရှိဦးမယ်။ နေရာတင်ပွဲချင်းပြီးသေသွားတာ”လို့ ကူညီပေးရာမှာပါဝင်တဲ့ ပရဟိတအဖွဲ့ဝင်တစ်ဦးက ကနဦးသိရသမျှ ရှင်းပြပါတယ်။
ကြိုပို့ယာဥ်နဲ့ YBS – ၂၂ ယာဥ်တို့ တိုက်မိမှုဖြစ်ပွားရာမှာ လမ်းဘေးထိုင်နေသူ လူငယ်က ဒဏ်ရာမပေါ်ဘဲ သေဆုံးခဲ့ရပေမဲ့ ယာဥ်ပေါ်ပါ လူအားလုံးက ဘေးကင်းခဲ့ပြီး ထိခိုက်ဒဏ်ရာရသူမရှိဘူးလို့လည်း သိရပါတယ်။
