
မန်ယူအသင်းသည် လာမည့်ရာသီတွင် ချန်ပီယံလိဂ်ဝင်ခွင့် မရရှိသည့်အတွက် ဝတ်စုံစပွန်ဆာ Adidas ထံ ပေါင်(၁၀)သန်း ပြန်ပေးရမည်ဖြစ်ကြောင်း သိရသည်။
မန်ယူအသင်းသည် Adidas နှင့် တစ်နှစ် ပေါင်သန်း(၉၀)တန်ကြေးရှိသည့် စပွန်ဆာစာချုပ်ချုပ်ဆိုထားခြင်းဖြစ်ပြီး စာချုပ်သက်တမ်းမှာ ၂၀၃၅ ခုနှစ်အထိ ဖြစ်သည်။
အဆိုပါစာချုပ်၌ ချန်ပီယံလိဂ်ယှဉ်ပြိုင်ခွင့်မရရှိပါက စာချုပ်တန်ဖိုး လျော့ကျမည်ဆိုသည့် သဘောတူညီချက်ပါရှိိခဲ့ရာ မန်ယူအသင်းသည် ယခုအခါ ချန်ပီယံလိဂ်ဝင်ခွင့်နှင့် နှစ်ရာသီဆက်တိုက် လွဲချော်ခဲ့သည့်အတွက် Adidas ထံ ပေါင်(၁၀) သန်း ပြန်ပေးရမည်ဖြစ်ကြောင်း သိရသည်။
မန်ယူအသင်းသည် လာမည့်ရာသီ၌ ချန်ပီယံလိဂ်ဝင်ခွင့်သာမက အခြားဥရောပပြိုင်ပွဲများ၌လည်း ယှဉ်ပြိုင်ခွင့်မရရှိသည့်အတွက် ၂၀၁၄-၁၅ ရာသီနောက်ပိုင်း ပထမဆုံးအဖြစ်လည်း မှတ်တမ်းဝင်ခဲ့ကြောင်း သိရသည်။
မန်ယူအသင်းအနေဖြင့် ဥရောပဝင်ခွင့်မရရှိသည့်အတွက် ဆုံးရှုံးနစ်နာမှုများစွာ ရှိခဲ့သည့်အပြင် ပရီးမီးယားလိဂ်ပြိုင်ပွဲ၌ အမှတ်ပေးဇယားအောက်ခြေသို့ ရောက်ရှိနေသည့်အတွက်လည်း ဝင်ငွေများစွာ လျော့ကျမည်ဖြစ်သည်။
ပရီးမီးယားလိဂ်တွင် ရပ်တည်မှုအဆင့်တစ်ခု၏ တန်ဖိုးမှာ ပေါင်(၃)သန်း ဝန်းကျင်ရှိသည့်အတွက် မန်ယူအသင်းအနေဖြင့် အဆင့်(၅)နေရာမှအသင်းထက် ပေါင်သန်း (၃၀)ကျော် လျော့နည်းဖွယ်ရှိနေကြောင်းလည်း သိရသည်။