နေပြည်တော်၊ ဇူလိုင် ၂၅
ကချင်ပြည်နယ်၊ ပူတာအိုခရိုင်၊ မချမ်းဘောမြို့နယ်တွင် မီးသတ်စခန်း အဆောက်အအုံ ဆောက်လုပ်ပေးနိုင်ရေးနှင့်ပတ်သက်၍ တတိယအကြိမ် ပြည်သူ့လွှတ်တော် ဒုတိယပုံမှန်အစည်းအဝေး (၂၉) ရက်မြောက်နေ့တွင် မချမ်းဘောမဲဆန္ဒနယ် ပြည်သူ့လွှတ်တော်ကိုယ်စားလှယ် ဦးငွါးရဲ့ဆဲက မေးမြန်းခဲ့ရာ ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်မင်းသူက ၂၀၂၇-၂၀၂၈ ဘဏ္ဍာနှစ်၌ ဆောက်လုပ်ပေးသွားမည်ဖြစ်ကြောင်း ပြန်လည်ဖြေကြားခဲ့သည်။
ဒုတိယဝန်ကြီးက လက်ရှိတွင် မချမ်းဘောမြို့နယ် မီးသတ်ဦးစီးမှူးရုံးနှင့် မီးသတ်စခန်းကို အထွေထွေအုပ်ချုပ်ရေးဦးစီးဌာနပိုင် ဂူဘားရိပ်သာ၊ လိပ်ပြာဆောင်၌ ဖွင့်လှစ်ထားရှိပြီး ဒုတိယမီးသတ်ဦးစီးမှူး ဦးစီးတပ်ဖွဲ့ဝင် ၁၁ ဦး၊ အရန်မီးသတ်တပ်ဖွဲ့ဝင် ၃၂ ဦး၊ မီးငြှိမ်းသတ်ယာဉ်တစ်စီးနှင့် မီးသတ်ရေသယ်ယာဉ်တစ်စီးဖြင့် မြို့နယ်၏ မီးဘေးလုံခြုံရေးလုပ်ငန်းများကို ဆောင်ရွက်လျက်ရှိကြောင်း ပြောကြားခဲ့သည်။
ထို့ပြင် ပူတာအိုခရိုင် အထွေထွေအုပ်ချုပ်ရေးဦးစီးဌာန၏ မြေပေးမိန့်ဖြင့် ခွင့်ပြုထားသည့် မချမ်းဘောမြို့ အမှတ် (၃) ရပ်ကွက်၊ မြို့မ (၃)၊ ဦးပိုင်အမှတ် (၁၂/၅) ရှိ မြေဧရိယာ ၂ ဧကပေါ်တွင် မြို့နယ်မီးသတ်စခန်း အဆောက်အအုံ တည်ဆောက်ရန် လိုအပ်လျက်ရှိကြောင်း ရှင်းလင်းပြောကြားခဲ့သည်။
ယင်းလိုအပ်ချက်အရ မချမ်းဘောမြို့နယ် မီးသတ်စခန်း အဆောက်အအုံ ဆောက်လုပ်ရေးလုပ်ငန်းကို ၂၀၂၇-၂၀၂၈ ဘဏ္ဍာနှစ်တွင် ကချင်ပြည်နယ်အစိုးရအဖွဲ့၏ ဘဏ္ဍာငွေဖြင့် အကောင်အထည်ဖော် ဆောင်ရွက်ပေးသွားမည် ဖြစ်ကြောင်း ဒုတိယဝန်ကြီး ဗိုလ်ချုပ်မင်းသူက ပြန်လည်ဖြေကြားခဲ့သည်။
