ဧရာဝတီတိုင်းဒေသကြီး၊ မီးလင်းဂျိုင်ဒေသတွင် အကောင်အထည်ဖော် ဆောင်ရွက်လျက်ရှိသည့် ၁၃၉၀ မဂ္ဂါဝပ် ထွက်ရှိမည့် သဘာဝဓာတ်ငွေ့ရည် (LNG) သုံး ဓာတ်အားပေးစက်ရုံစီမံကိန်းမှာ လက်ရှိတွင် ၂၄.၄ ရာခိုင်နှုန်း ပြီးစီးနေပြီဖြစ်ကြောင်း ဧရာဝတီတိုင်းဒေသကြီးအစိုးရအဖွဲ့ထံမှ သိရသည်။
ပြီးခဲ့သည့် ဇူလိုင် ၂၄ ရက်က ဓာတ်အားပေးစက်ရုံမှ ဓာတ်အားလိုင်းများ သွယ်တန်းခြင်း စီမံကိန်းအတွက် ပတ်ဝန်းကျင်ထိခိုက်မှုဆန်းစစ်ခြင်း (EIA) လုပ်ငန်းစဉ်၏ လေ့လာတွေ့ရှိချက်များကို Unique Environment Myanmar က တိုင်းဒေသကြီး အစိုးရအဖွဲ့ထံ လာရောက်တင်ပြခဲ့ခြင်းဖြစ်သည်။
အဆိုပါ စီမံကိန်းတွင် မီးလင်းဂျိုင်မှ ရန်ကုန်တိုင်းဒေသကြီး၊ ထန်းတပင်မြို့နယ် လှိုင်သာယာပင်မဓာတ်အားခွဲရုံအထိ ၁၈၉ ကီလိုမီတာရှည်လျားသည့် ၅၀၀ ကေဗွီ ဓာတ်အားလိုင်းနှင့် မီးလင်းဂျိုင်မှ အသုတ်ဓာတ်အားခွဲရုံအထိ ၆၉.၉ ကီလိုမီတာရှည်လျားသည့် ၂၃၀ ကေဗွီ ဓာတ်အားလိုင်း သွယ်တန်းခြင်းများ ပါဝင်ပြီး ယင်းဧရိယာများကို စီမံကိန်းသက်ရောက်မှုရှိနိုင်သည့် ဧရိယာအဖြစ် သတ်မှတ်ထားသည်။
မီးလင်းဂျိုင် စီမံကိန်းသည် နိုင်ငံတော်ဓာတ်အားစနစ် တည်ငြိမ်မှုရရှိစေရန်နှင့် ခိုင်မြဲသော ထုတ်လုပ်နိုင်စွမ်းအား (Base Load) ကို သက်သာသော ဓာတ်အားခနှုန်းထားဖြင့် ထုတ်လုပ်ပေးနိုင်မည်ဖြစ်ကြောင်း ဧရာဝတီတိုင်းဒေသကြီး ဝန်ကြီးချုပ် ဦးအေးကျော်က ပြောကြားထားသည်။
အမေရိကန်ဒေါ်လာ ၂.၅၀၄ ဘီလီယံခန့် ရင်းနှီးမြှုပ်နှံထားသည့် အဆိုပါ မီးလင်းဂျိုင် LNG သုံး ဓာတ်အားပေးစက်ရုံ စီမံကိန်းကြီးတစ်ခုလုံးကို ၂၀၂၉ ခုနှစ် အဩဂုတ်လတွင် ရာနှုန်းပြည့် ပြီးစီးရန် လျာထားကြောင်း သိရသည်။
အဆိုပါစီမံကိန်းကို ၂၀၁၆ ခုနှစ် မတ် ၇ ရက်တွင် MOU လက်မှတ်ရေးထိုးခဲ့ကာ ၂၀၂၀ ပြည့်နှစ် ဇန်နဝါရီ ၁၈ ရက်တွင် Letter of Intent (LOI) နှင့် ၂၀၂၁ ခုနှစ် ဇန်နဝါရီ ၂၉ ရက်တွင် Power Purchase Agreement (PPA) စာချုပ်များကို အဆင့်ဆင့် လက်မှတ်ရေးထိုးခဲ့ခြင်းဖြစ်သည်။
