ရန်ကုန်၊သြဂုတ်-၁၃
မြန်မာနိုင်ငံဘောလုံးအဖွဲ့ချုပ် (MFF) သည် မြန်မာ့လက်ရွေးစင် အမျိုးသမီးဘောလုံးအသင်း၏ နည်းပြချုပ်သစ်အဖြစ် အင်္ဂလန်နိုင်ငံသား နည်းပြ Colin Bell (ကောလင်းဘဲလ်) ကို ခန့်အပ်လိုက်ပြီး ၃ နှစ် သဘောတူစာချုပ် လက်မှတ်ရေးထိုးပွဲနှင့် စာနယ်ဇင်းရှင်းလင်းပွဲကို ယနေ့ ဩဂုတ် ၁၃ ရက် နံနက်ပိုင်းက MFF အစည်းအဝေးခန်းမ၌ ကျင်းပခဲ့သည်။
အခမ်းအနားတွင် နည်းပြချုပ်သစ် Colin Bell ၏ ဘောလုံးလောကအတွင်း ဖြတ် သန်းခဲ့သည့်အတွေ့အကြုံများနှင့် အောင် မြင်မှုမှတ်တမ်းများကို မိတ်ဆက်ပေးခဲ့ပြီး MFF အထွေထွေအတွင်းရေးမှူး ဦးထွန်းထွန်းအောင်က နည်းပြချုပ်သစ် ခန့် အပ်ရခြင်း၏ ရည်ရွယ်ချက်၊ အသင်းအတွက် ရှေ့ဆက်ဆောင်ရွက်မည့် လမ်း ကြောင်းများနှင့် မျှော်မှန်းချက်များကို ရှင်းလင်းပြောကြားခဲ့သည်။
ထို့နောက် ဦးထွန်းထွန်းအောင်နှင့် Colin Bell တို့သည် ၃ နှစ် သဘောတူစာချုပ်တွင် တရားဝင် လက်မှတ်ရေးထိုးခဲ့ကြပြီး အမှတ်တရဂျာစီ ပေးအပ်ခြင်းနှင့် ဓာတ်ပုံမှတ်တမ်းတင်ခြင်းများ ပြုလုပ်ခဲ့ကြသည်။
“မြန်မာအသင်းဟာ အာရှအဆင့်မှာ ယှဉ်ပြိုင်နိုင်ရုံတင်မကဘဲ အောင်မြင်မှုနဲ့ ဆုဖလားတွေပါ ဆွတ်ခူးနိုင်တဲ့ အလားအလာကောင်းတွေ ရှိတယ်လို့ ယုံကြည်ပါတယ်။ အဓိကပန်းတိုင်ကတော့ ကမ္ဘာ့ဖလားပြိုင်ပွဲကို တက်လှမ်းနိုင်ဖို့ပါ” ဟု Colin Bell က ပြောကြားသည်။
ကမ္ဘာ့ဖလားပြိုင်ပွဲသို့ မရောက်ဖူးသေးသည့် စိန်ခေါ်မှုသည် မိမိအတွက် အကြီးမားဆုံး တွန်းအားဖြစ်ကြောင်းနှင့် ကစားသမားများ၊ မြန်မာနိုင်ငံနှင့် MFF တို့၏ ရည်မှန်းချက်များ အကောင် အထည်ဖော်နိုင်ရေးအတွက် အစွမ်းကုန် ကြိုးပမ်းသွားမည်ဖြစ်ကြောင်း နည်းပြချုပ်သစ်က ပြောကြားခဲ့သည်။
Colin Bell သည် ၁၉၆၁ ခုနှစ် ဩဂုတ် ၅ ရက်တွင် အင်္ဂလန်နိုင်ငံ Leicester မြို့၌ မွေးဖွားခဲ့သူဖြစ်ပြီး UEFA Pro Licence ရရှိထားသည့် နည်းပြတစ်ဦးဖြစ်သည်။
၎င်းသည် တောင်ကိုရီးယား အမျိုးသမီးလက်ရွေးစင်အသင်း၊ တရုတ် U-20 အမျိုးသမီးအသင်းနှင့် အိုင်ယာလန် အမျိုးသမီးလက်ရွေးစင်အသင်းတို့အပြင် ဂျာမနီကလပ် 1. FFC Frankfurt အပါအဝင် ကလပ်အသင်းများတွင်လည်း တာဝန်ယူခဲ့ဖူးသည်။
၎င်း၏ အဓိကအောင်မြင်မှုများအဖြစ် ၂၀၁၅ ခုနှစ်တွင် 1. FFC Frankfurt နှင့် UEFA Women’s Champions League ချန်ပီယံဆု ရရှိခဲ့ခြင်း၊ ၂၀၂၂ AFC Women’s Asian Cup တွင် တောင်ကိုရီးယားအသင်း ဒုတိယဆုရရှိအောင် ဦးဆောင်ခဲ့ခြင်းနှင့် ၂၀၂၃ FIFA Women’s World Cup ခြေစစ်ပွဲကို အောင်မြင်စေခဲ့ခြင်း တို့ ပါဝင်သည်။
မြန်မာ့လက်ရွေးစင် အမျိုးသမီးအသင်းအနေဖြင့် နည်းပြချုပ်သစ် Colin Bell လက်ထက်တွင် အာရှအဆင့်မှတစ်ဆင့် ကမ္ဘာ့ဖလားပြိုင်ပွဲသို့ တက်လှမ်းနိုင်ရေးကို ရည်မှန်းချက်ထားကာ ပြင်ဆင်သွားမည်ဖြစ်သည်။
