ဘာစီလိုနာအသင်းဟာ အာဆင်နယ်အသင်းရဲ့ ဘရာဇီးလ်တိုက်စစ်မှူး ဂျေးဇူးကို ခေါ်ယူဖို့ သဘောတူညီမှုရရှိထားပြီဖြစ်ကြောင်း သတင်းထွက်နေပါတယ်။
ပိုလန်တိုက်စစ်မှူး လီဝန်ဒေါစကီးနဲ့ လမ်းခွဲထားတဲ့ ဘာစီလိုနာအသင်းက အက်သလက်တီကိုအသင်းရဲ့ အာဂျင်တီးနားတိုက်စစ်မှူး အယ်လ်ဗာရက်ဇ်ကို ခေါ်ယူဖို့ ကြိုးပမ်းခဲ့ပေမဲ့ ငြင်းပယ်ခံခဲ့ရပါတယ်။
ဒါကြောင့် အပြောင်းအရွှေ့စျေးကွက် ပိတ်သိမ်းခါနီးမှာ ဂျေးဇူးကို ခေါ်ယူဖို့ ဆုံးဖြတ်ခဲ့တာဖြစ်ပြီး ပြောင်းရွှေ့ကြေး ယူရို(၁၀)သန်းနဲ့ Add-ons ကြေးပေးချေဖို့ သဘောတူညီမှုရရှိခဲ့ခြင်းဖြစ်ကြောင်း မီဒီယာတချို့က ဖော်ပြခဲ့ပါတယ်။
ဘာစီလိုနာအသင်းက ဂျေးဇူးကို (၂)နှစ်စာချုပ် ချုပ်ဆိုမှာဖြစ်ပြီး နောက်ထပ်တစ်နှစ် သက်တမ်းတိုးနိုင်မယ့် သဘောတူညီမှုလည်း ပါဝင်ကြောင်း၊ ဆေးစစ်မှုကို ဒီနေ့ပြုလုပ်သွားမှာဖြစ်ကြောင်းလည်း ဖော်ပြခဲ့ပါတယ်။
ဂျေးဇူး(၂၉ နှစ်)ဟာ ၂၀၂၂ နွေရာသီမှာ မန်စီးတီးကနေ အာဆင်နယ်အသင်းကို ပေါင်(၄၅)သန်းနဲ့ ပြောင်းရွှေ့ခဲ့သူဖြစ်ပြီး ပြိုင်ပွဲစုံ (၁၂၃)ပွဲကစားကာ (၃၂)ဂိုး သွင်းယူပေးထားပါတယ်။
အာဆင်နယ်အသင်းက ဂျေးဇူးကို ရောင်းထုတ်ဖို့ စီစဉ်ထားတာကြောင့် ပရီးမီးယားလိဂ်ရာသီအဖွင့်ပွဲမှာ လူစာရင်းက ချန်လှပ်ထားခဲ့ကြောင်းလည်း သိရပါတယ်။
