တာမွေမြို့နယ်ရှိ ဇမ္ဗူအောင် ကိုယ်ပိုင်အထက်တန်းကျောင်းမှာ အဆောင်နေကျောင်းသားတချို့ အစာအဆိပ်သင့်မှုဖြစ်ပေါ်ခဲ့ပြီး ကျောင်းသားများကို အပြင်တိုက်ခန်းမှာ ငှားပြီး ထားပေးမယ် ဆိုခြင်းကြောင့် အဆင်မပြေမှုဖြစ်၊
ဇမ္ဗူအောင် ကိုယ်ပိုင်အထက်တန်းကျောင်းကို ဆက်သွယ်မေးမြန်းရာ မီဒီယာကို ချပြစရာမရှိဟု ပြော
ရန်ကုန်၊ စက်တင်ဘာ ၁၂
တာမွေမြို့နယ်ရှိ ဇမ္ဗူအောင် ကိုယ်ပိုင်အထက်တန်းကျောင်းတွင် ၈-၉-၂၀၂၆ ရက်နေ့က အဆောင်နေကျောင်းသားတချို့ အစာအဆိပ်သင့်မှုဖြစ်ပေါ်ခဲ့ပြီး ယနေ့ (၁၂-၉-၂၀၂၆) ရက်နေ့ (၁၁ ၀၀)နာရီအချိန်က ဆောင်နေကျောင်းသား ကျောင်းသူများ၏ မိဘများကို ခေါ်ယူပြီး ကျောင်းသားများကို အပြင်တိုက်ခန်းမှာ ငှားပြီး ထားပေးမယ်လို့ ပြောဆိုဆွေးနွေးရာမှ အဆင်မပြေမှုများ ဖြစ်ပေါ်ခဲ့ကြောင်း ကျောင်းသားမိဘတစ်ဦး က မြန်မာနေရှင်နယ်ပို့စ် သို့ ဆက်သွယ်ပြောဆိုသည့်အပေါ် အခြေအနေမှန်ကို သိရှိနိုင်ရန် ဇမ္ဗူအောင် ကိုယ်ပိုင်အထက်တန်းကျောင်းကို ဆက်သွယ်မေးမြန်းရာ မီဒီယာကို ချပြစရာမရှိဟု ပြောသည်။
မြန်မာနေရှင်နယ်ပို့စ် က ဖြစ်စဉ်နှင့် ပတ်သက်၍ အတည်ပြုနိုင်ရန် ဇမ္ဗူအောင် ကိုယ်ပိုင်အထက်တန်းကျောင်း ၏ ဆက်သွယ်ရန် ဖုန်းနံပါတ်အား ဆက်သွယ်၍ မေးမြန်းရာ -
မြန်မာနေရှင်နယ်ပို့စ် မေး - အမတို့ ပုဂ္ဂလိကကိုယ်ပိုင်ကျောင်းမှာ ပြဿနာလေး ဖြစ်တာနဲ့ ပတ်သက်လို့ မေးမြန်းချင်လို့ပါ
ဇမ္ဗူအောင်ကျောင်းမှ ဖြေ - ဘယ်သတင်းဌာနကလဲ မသိဘူးနော်။
မြန်မာနေရှင်နယ်ပို့စ် မေး - ကျနော် မြန်မာနေရှင်နယ်ပို့စ် ကပါဗျ။
ဇမ္ဗူအောင်ကျောင်းမှ ဖြေ - မြန်မာနေရှင်နယ်ပို့စ် က၊ ဟုတ်ကဲ့ ခဏလေး ကိုင်ထားပေးပါအုံးနော်။
အချိန်အနည်းငယ်ကြာပြီးနောက် အခြားအမျိုးသမီးတစ်ဦး လာရောက်ဖြေဆို -
ဇမ္ဗူအောင်ကျောင်းမှ ဖြေ - ဟယ်လို
မြန်မာနေရှင်နယ်ပို့စ် မေး - ဟုတ်ကဲ့ဗျ၊ ဇမ္ဗူအောင် ကိုယ်ပိုင်အထက်တန်းကျောင်း က ဆရာမကြီးလားဗျ။
ဇမ္ဗူအောင်ကျောင်းမှ ဖြေ - အော် မဟုတ်ပါဘူး။ ညီမ တာဝန်ရှိတဲ့သူပါ၊ ဘာများဖြစ်လို့လဲရှင်။
မြန်မာနေရှင်နယ်ပို့စ် မေး - ဟုတ်ကဲ့ဗျာ၊ ကျွန်တော်တို့ သိရတာက ကျောင်းသားမိဘတွေက ကျောင်းမှာ အစာအဆိပ်သင့်မှုဖြစ်တယ်၊ ဒီနေ့ အစည်းအဝေးမှာလည်း ပြဿနာလေးတွေ ရှိတယ်လို့ ကြားလို့ ဆရာမတို့ဘက်က ဘာများ ပြောနိုင်မလဲပေါ့။
ဇမ္ဗူအောင်ကျောင်းမှ ဖြေ - ဘာများပြောနိုင်မလဲဆိုတော့ ဘယ်သူက ပြောတာလဲ ဟင်၊ မိဘကို တချက်သိရမလားဟင်၊
မြန်မာနေရှင်နယ်ပို့စ် မေး - ကျွန်တော်တို့ကတော့ ကျောင်းသားမိဘဆီက သိရတာပါ။ ဘယ်မိဘ ဆိုတောတော့ ကျွန်တော် ပြောဖို့မလိုဘူးထင်တယ်။
ဇမ္ဗူအောင်ကျောင်းမှ ဖြေ - အော် ဟုတ်၊ ညီမတို့ ဘယ်လို ဖြေရှင်းလိုက်တယ်ဆိုတာ ညီမတို့မှာလည်းလေ ဒါ ဟို မီဒီယာကို ချပြစရာအကြောင်းမရှိဘူးဆိုတော့လေ ကောင်းတာလေး ဖြေရှင်းပေးလိုက်ပါတယ်၊ မိဘတွေကိုလေ၊ ဒါပေမယ့် အဲဒါလည်း ကျွန်မတို့ မီဒီယာကို ချမပြချင်ပါဘူး။ ဘယ်သူက တိုင်တာလည်း မသိဘူးရှင့်။
မြန်မာနေရှင်နယ်ပို့စ် မေး - ဘယ်သူက တိုင်တာလဲ ကျွန်တော် ပြောလို့မရပါဘူး။ ကျောင်းသား မိဘပါ။
ဇမ္ဗူအောင်ကျောင်းမှ ဖြေ - ဟုတ်၊ ကျွန်မတို့လည်း သတင်းမမေးပါဘူး၊ ပြောချင်တာလဲမရှိပါဘူးရှင့်
ဟု ပြန်လည်ဖြေကြားထားသည်။
အဆိုပါ ဖြစ်စဉ်နှင့် ပတ်သက်၍ အစာအဆိပ်သင့်မှု ဖြစ်ခဲ့ပြီးနောက် တစ်ကြိမ်၊ ယနေ့ တစ်ကြိမ် မြန်မာနေရှင်နယ်ပို့စ် အနေဖြင့် ပညာရေးဝန်ကြီးဌာန သို့ တင်ပြမေးမြန်းထားသော်လည်း ဖြေကြားချက် ထုတ်ပြန်ခြင်း မရှိသေးသည့်အတွက် ပညာရေးဝန်ကြီးဌာနမှ ပြန်လည်ဖြေကြားချက် ရလျင် ရချင်း အချိန်နဲ့တပြေးညီ သတင်းထုတ်ပြန်ပေးမည် ဖြစ်ပါသည်။
အဆိုပါ ပုဂ္ဂလိကအထက်တန်းကျောင်းတွင် G-10, G-11, G-12 အဆောင်နေကျောင်းသားများ နေထိုင်လျက်ရှိကြောင်း ကျောင်းသားမိဘတစ်ဦးက ဆက်သွယ်ပြောဆိုထားသည်။
#News #Myanmar
