တရုတ်ပြည်သူ့လွတ်မြောက်ရေးတပ်မတော်၏ ရေကြောင်းစောင့်ရှောက်ရေး ရေယာဉ်အုပ်စု မြန်မာ နိုင်ငံသို့ ချစ်ကြည်ရေးခရီးစဉ် ရောက်ရှိလာကြောင်း ဆင်ဟွာတွင် သတင်းဖော်ပြထားသည်။
တရုတ်ပြည်သူ့လွတ်မြောက်ရေးတပ်မတော် (PLA) ရေတပ် ၄၈ ကြိမ်မြောက် ရေကြောင်းစောင့်ရှောက်ရေး ရေယာဉ်အုပ်စုသည် ရန်ကုန်ဆိပ်ကမ်းသို့ စက်တင်ဘာ ၂၄ ရက်တွင် ရောက်ရှိခဲ့ပြီး ငါးရက်ကြာ ချစ်ကြည်ရေးခရီးစဉ်အဖြစ် ရောက်ရှိလာခြင်းဖြစ်သည်။
စက်တင်ဘာ ၂၄ ရက် ဒေသစံတော်ချိန် မွန်းလွဲ ၂ နာရီခန့်တွင် တရုတ်-မြန်မာ နှစ်နိုင်ငံအလံများ လွှင့်ထူထားသော တရုတ်ရေတပ်၏ ထန်ဆန်း စစ်သင်္ဘော၊ တာ့ချင့်စစ်သင်္ဘောနှင့် ထိုက်ဟူစစ်သင်္ဘောတို့သည် ရန်ကုန်ဆိပ်ကမ်းသို့ ရောက်ရှိ လာခဲ့ပြီး လက်နက်များကို ဂုဏ်ပြုကျင့်ဝတ်များအရ ဦးမော့ထားသည့် အနေအထားသို့ ညှိနှိုင်းပြင်ဆင်လိုက်ပြီး စစ်သည်အရာရှိများက လာရောက်ကြိုဆိုသော လူအုပ်ကြီးကို လက်ဝှေ့ယမ်းနှုတ်ဆက်ခဲ့သည်ဟု သတင်းတွင် ရေးသားထားသည်။
မြန်မာနိုင်ငံ တပ်မတော်နှင့် အစိုးရ အဆင့်မြင့်အရာရှိနှင့် အရာရှိစစ်သည်ကိုယ်စားလှယ်များ၊ မြန်မာနိုင်ငံဆိုင်ရာ တရုတ်နိုင်ငံသံရုံး ဝန်ထမ်းများ၊ တရုတ်ရင်းနှီးမြှုပ်နှံမှုအဖွဲ့အစည်းများ၊ တရုတ်နွယ်ဖွားနှင့် တရုတ်လူမျိုးများ၏ ကိုယ်စားလှယ်များအပါအဝင် လူဦးရေ ၃၀၀ ကျော်က ဆိပ်ကမ်းတွင် တရုတ်-မြန်မာ နှစ်နိုင်ငံအလံများကို ဝှေ့ယမ်းလျက် တရုတ်ရေတပ် ရေကြောင်းစောင့်ရှောက်ရေး ရေယာဉ်အုပ်စုကို ကြိုဆိုခဲ့ကြသည်။
ခရီးစဉ်ကာလအတွင်း ရေယာဉ်အုပ်စု ကွပ်ကဲရေးမှူးများသည် မြန်မာအစိုးရ၊ တပ်မတော် အကြီးအကဲများနှင့် သွားရောက်တွေ့ဆုံမည်ဖြစ်ပြီး ကျွမ်းကျင်မှုဆိုင်ရာ ဖလှယ်မှုများ၊ စစ်သင်္ဘော လေ့လာကြည့်ရှုမှု၊ အားကစားနှင့် ယဉ်ကျေးမှုဆိုင်ရာ ဖလှယ်မှုနှင့် သင်္ဘောကုန်းပတ်ဧည့်ခံပွဲများ စသည့် လှုပ်ရှားမှုများကို ဆောင်ရွက်သွားမည်ဖြစ်ကြောင်း ဆင်ဟွာတွင် ဖော်ပြထားသည်။
