အောက်တိုဘာ - ၃၁ ( စနေနေ့ )
ကြီးမားတဲ့ တောမီးလောင်ကျွမ်းမှုတွေကြောင့် ထွက်လာတဲ့ အဆိပ်သင့် မီးခိုးမြူတွေကြောင့် အင်ဒိုနီးရှားနိုင်ငံမှာ ဆန္ဒပြမှုတွေ လှိုင်းလို ထွက်ပေါ်နေဆဲဖြစ်ပြီး၊ ပြီးခဲ့တဲ့အပတ်က ဂျာကာတာမြို့လယ်မှာ ဆန္ဒပြသူ သောင်းနဲ့ချီ စုဝေးခဲ့ကြပါတယ်။
အစိုးရဆန့်ကျင်ရေး ဆန္ဒပြပွဲတွေဟာ ဒီလအစောပိုင်း၊ သမ္မတ ပရာဘိုဝီ ဆူဗြန်တို ရာထူးစတင် ထမ်းဆောင်ခြင်း နှစ်နှစ်ပြည့် အထိမ်းအမှတ် ကာလနားမှာ စတင်ခဲ့တာ ဖြစ်ပါတယ်။
ဆယ်စုနှစ်တစ်ခုကျော်အတွင်း အဆိုးဆုံးလို့ သတ်မှတ်ခံထားရပြီး အသက်ရှူလမ်းကြောင်းဆိုင်ရာ ရောဂါတွေနဲ့ပါ ချိတ်ဆက်နေတဲ့ တောမီးအကျပ်အတည်းကို အစိုးရက ကိုင်တွယ်ပုံအပေါ် ဒေါသထွက်မှုတွေဟာ ကုန်ဈေးနှုန်းကြီးမြင့်မှု၊ အကျင့်ပျက်ခြစားမှုလို့ ယူဆရတဲ့ အချက်တွေနဲ့ အခြား မကျေနပ်ချက်တွေအပေါ် အခြေခံပြီး ပိုပြီး ပြင်းထန်လာခဲ့ပါတယ်။
ဆန္ဒပြသူတွေကတော့ နိုင်ငံတော် အရေးပေါ်အခြေအနေ ကြေညာပေးဖို့ တောင်းဆိုနေကြပါတယ်။ အစိုးရ တာဝန်ရှိသူတွေကတော့ အခြေအနေကို ကိုင်တွယ်ဖို့ လုံလောက်တဲ့ အရင်းအမြစ်တွေကို ချထားပေးပြီးဖြစ်လို့ အဲဒီလို လုပ်ဖို့ မလိုဘူးလို့ ငြင်းဆိုထားပါတယ်။ အစိုးရအဖွဲ့ရဲ့ အဆိုအရ မီးသတ်ဝန်ထမ်း ၇၀,၀၀၀ ကျော်ကို အပိုဆောင်း စေလွှတ်ထားတယ်လို့ ဆိုပါတယ်။ ရာသီဥတု အခြေအနေ ကောင်းမွန်လာမှုနဲ့ ပေါင်းစပ်ပြီး အဲဒီကြိုးပမ်းမှုတွေကြောင့် အင်ဒိုနီးရှားနိုင်ငံရဲ့ ထိခိုက်ခံရတဲ့ ဒေသတွေနဲ့ အိမ်နီးချင်း မလေးရှားနဲ့ စင်ကာပူနိုင်ငံတွေမှာပါ လေထုညစ်ညမ်းမှုကို လျော့ပါးစေဖို့ အထောက်အကူ ဖြစ်စေခဲ့တယ်လို့ တာဝန်ရှိသူတွေက ပြောပါတယ်။
ပစိဖိတ်သမုဒ္ဒရာအတွင်း အလွန်အမင်း ပူပြင်းမှုနဲ့ အယ်လ်နီညို ဖြစ်စဥ် အရှိန်အဟုန်ပြင်းထလာတာတွေ ကြောင့် ဒီနှစ်မှာ အင်ဒိုနီးရှားရဲ့ သစ်တောတွေနဲ့ စိမ့်မြေ တွေဟာ မီးလောင်လွယ်တဲ့ အနေအထားကို ရောက်ရှိစေခဲ့တယ်လို့ သိပ္ပံပညာရှင်တွေက ပြောပါတယ်။ အစိုးရကလည်း မီးတချို့ဟာ ရည်ရွယ်ချက် ရှိရှိနဲ့ စတင်ရှို့ခဲ့တာ ဖြစ်နိုင်တယ်လို့ စွပ်စွဲထားပြီး စုံစမ်းစစ်ဆေးမှုတွေ စတင်လုပ်ဆောင်နေပါတယ်။
REF: RT
#News #Myanmar
