နယ်မြေတစ်ခု တည်ငြိမ်အေးချမ်းရေးအတွက် ပြည်သူပါမှ အဆင်ပြေမည်ဖြစ်ကြောင်းနှင့် ပြည်သူပါမှ စစ်နိုင်မည်ဖြစ်ကြောင်း ပြည်ထဲရေးဝန်ကြီးဌာန ဒုတိယဝန်ကြီး ဗိုလ်ချုပ်မင်းသူက ပြောကြားသည်။
ယနေ့ (နိုဝင်ဘာ ၂ ရက်) ပြုလုပ်သည့် ပြည်သူ့လွှတ်တော်အစည်းအဝေးတွင် ကျောက်ကြီးမြို့နယ် ပြည်သူ့လွှတ်တော်ကိုယ်စားလှယ် ဦးဟံသာဝင်း၏ ကျောက်ကြီး-နတ်သံကွင်း ကားလမ်းဘေး ဝဲ/ယာရှိ စစ်ဘေးရှောင်ပြည်သူများ ပြန်လည်နေရာချထားရေးနှင့်ပတ်သက်သည့် ဆက်စပ်မေးခွန်းအား ပြန်လည်ဖြေကြားရာတွင် ပြည်ထဲရေးဝန်ကြီးဌာန ဒုတိယဝန်ကြီးက ထိုသို့ ထည့်သွင်းပြောကြားခြင်းဖြစ်သည်။
၂၀၂၃ ခုနှစ်တွင် ပဲခူးတိုင်းဒေသကြီး ညောင်လေးပင်ခရိုင် ကျောက်ကြီးမြို့နယ်ရှိ ကျောက်ကြီး-နတ်သံကွင်း ကားလမ်းပေါ်မှ တံတားသုံးစင်အား KNU ၊ PDF ပူးပေါင်းအဖွဲ့က အရှည် ၉ မိုင်ရှိသော ကျောက်ကြီး-နတ်သံကွင်း ကားလမ်းပေါ်မှာရှိတဲ့ တံတားသုံးစင်ကို KNU ၊ PDF ပူးပေါင်းအဖွဲ့က ဖောက်ခွဲဖျက်ဆီးခဲ့ပြီး လက်ရှိတွင် လုံခြုံရေးအခြေအနေအရ ပြန်လည်ပြင်ဆင်နိုင်ခြင်းမရှိသေးသည့်အပြင် အနီးပတ်ဝန်းကျင်ရှိ ကျေးရွာများတွင်လည်း KNU ၊ PDF ပူးပေါင်းအဖွဲ့များ ဝင်ရောက်ခိုအောင်း၍ လှုပ်ရှားလျက်ရှိကြောင်း ပြည်ထဲရေးဝန်ကြီးဌာန ဒုတိယဝန်ကြီးက ပြောကြားသည်။
ထို့ပြင် ကျောက်ကြီး-နတ်သံကွင်း ကားလမ်းတစ်လျှောက်တွင် KNU ၊ PDF ပူးပေါင်းအဖွဲ့များက တပ်မတော်လုံခြုံရေးတပ်ဖွဲ့ဝင်များကို ချောင်းမြောင်းပစ်ခတ်ခြင်း၊ အများပြည်သူ သွားလာအသုံးပြုလျက်ရှိသော မော်တော်ယာဉ်များကို မိုင်းဆွဲတိုက်ခိုက်ခြင်းများ ပြုလုပ်နေသောကြောင့် လတ်တလောတွင် အဆိုပါ ကားလမ်းအား အသုံးပြု၍ မရသေးကြောင်းလည်း ပြည်ထဲရေးဝန်ကြီးဌာန ဒုတိယဝန်ကြီးက ပြောကြားသည်။
ကျောက်ကြီး-နတ်သံကွင်း ကားလမ်းဘေး ဝဲ/ယာရှိ ကျေးရွာများတွင် လုံခြုံရေးတပ်ဖွဲ့ဝင်များက နယ်မြေရှင်းလင်းရေး ဆောင်ရွက်နေသကဲ့သို့ KNU ၊ PDF ပူးပေါင်းအဖွဲ့များ ထောင်ထားခဲ့သည့် မိုင်းများအား ရှင်းလင်းဆောင်ရွက်နေကြောင်းနှင့် ဒေသခံများ ဘေးအန္တရာယ်ကင်းရှင်းသည့်အချိန်မှသာ အဆိုပါ ဒေသတွင် သွားလာနေထိုင်ခွင့်ရှိမည်ဖြစ်ကြောင်း ပြည်ထဲရေးဝန်ကြီးဌာန ဒုတိယဝန်ကြီးက ပြောကြားသည်။
လက်ရှိတွင် ကျောက်ကြီးမြို့နယ်ရှိ ဌာနဆိုင်ရာရုံး ၃၁ ရုံးအနက် ၂၁ ရုံးအား ဖွင့်လှစ်၍ ရုံးလုပ်ငန်းများ ဆောင်ရွက်နေကြောင်း၊ စာသင်ကျောင်း ခုနစ်ကျောင်း၊ တိုက်နယ်ဆေးရုံတစ်ရုံနှင့် မြို့မစျေးတစ်ခု ဖွင့်လှစ်ထားရှိကြောင်း၊ တပ်မတော်နှင့် မြန်မာနိုင်ငံရဲတပ်ဖွဲ့တို့က လုံခြုံရေးဆောင်ရွက်ပြီးသည့်အခါ နယ်မြေလုံခြုံရေးအခြေအနေ ပြန်လည်ကောင်းမွန်ပါက ကျန် ဌာနဆိုင်ရာရုံးများ အမြန်ဆုံးဖွင့်လှစ်နိုင်ရေး ဆောင်ရွက်သွားမည်ဖြစ်ကြောင်း ၎င်းက ဆက်လက်ပြောကြားသည်။
တိုက်ပွဲရှောင်များ ပြန်လည်နေရာချထားရေးနှင့်ပတ်သက်၍ တိုက်ပွဲရှောင်ပြည်သူများနှင့်အတူ KNU ၊ PDF ပူးပေါင်းအဖွဲ့များ ရောနှောဝင်ရောက်လာမှုမရှိစေရေးအတွက် ဌာနဆိုင်ရာ ပူးပေါင်းအဖွဲ့များဖြင့် စစ်ဆေး၍ အိမ်ထောင်စုအလိုက် ပြန်လည်နေရာချထားနိုင်ရေး ဆောင်ရွက်ပေးသွားမည်ဖြစ်ကြောင်း ပြည်ထဲရေးဝန်ကြီးဌာန ဒုတိယဝန်ကြီးက ပြောကြားသည်။
လက်ရှိအချိန်တွင် နတ်သံကွင်းမြို့အတွင်းသို့ KNU ၊ PDF ပူးပေါင်းအဖွဲ့များက ရံဖန်ရံခါ လက်နက်ကြီး/လက်နက်ငယ်များဖြင့် နှောင့်ယှက်ပစ်ခတ်ခြင်း၊ FPV Drone များဖြင့် မကြာခဏပစ်ခတ်တိုက်ခိုက်ခြင်းတို့ ပြုလုပ်လျက်ရှိသည့်အတွက် လတ်တလောတွင် ဒေသခံပြည်သူများ ပြန်လည်နေထိုင်ရန် မသင့်လျော်သေးကြောင်းနှင့် လုံခြုံရေးအခြေအနေ ပြန်လည်ကောင်းမွန်မှသာ တိုက်ပွဲရှောင်ပြည်သူများကို ပြန်လည်နေရာချထားခြင်းလုပ်ငန်းများ၊ တိုက်ပွဲဖြစ်ပွားခဲ့သော ကျေးရွာများ၏ ပြန်လည်တည်ဆောက်ခြင်းလုပ်ငန်းများကို ဆောင်ရွက်ပေးသွားမည်ဖြစ်ကြောင်း ပြည်ထဲရေးဝန်ကြီးဌာနက ဒုတိယဝန်ကြီးက ပြောကြားသည်။
"နယ်မြေတစ်ခု တည်ငြိမ်အေးချမ်းဖို့က ပြည်သူပါမှ အဆင်ပြေမှာဖြစ်ပါတယ်။ ကျွန်တော်တို့ တိုက်ပွဲတစ်ခုအောင်မြင်ဖို့ဆိုတာ ကျွန်တော်တို့ တပ်မတော်သော်လည်းကောင်း၊ တပ်မတော်နဲ့ ပူးပေါင်းဆောင်ရွက်နေတဲ့ မြန်မာနိုင်ငံရဲတပ်ဖွဲ့သော်လည်းကောင်း၊ ပြည်သူ့လုံခြုံရေးအဖွဲ့ဝင်များသော်လည်းကောင်း ကျွန်တော်တို့အဖွဲ့ချည်းပဲ လုပ်လို့မရပါဘူး။ ပြည်သူပါမှ ကျွန်တော်တို့ စစ်နိုင်မှာဖြစ်ပါတယ်"ဟု ပြည်ထဲရေးဝန်ကြီးဌာန ဒုတိယဝန်ကြီးက ပြောကြားသည်။
သက်ဆိုင်ရာနယ်မြေတစ်ခု တည်ငြိမ်အေးချမ်းရေးအတွက် ပြည်သူပါဝင်မှုရှိရန် လိုအပ်ပြီး နယ်မြေဒေသ တည်ငြိမ်အေးချမ်းမှသာ ဒေသဖွံ့ဖြိုးရေးလုပ်ငန်းများ ဆောင်ရွက်နိုင်မည်ဖြစ်ကြောင်း ၎င်းက ပြောကြားသည်။
နတ်သံကွင်းမြို့နယ်တွင် စစ်ဘေးရှောင်ဒေသခံပြည်သူ တစ်သိန်းကျော်ရှိပြီး ၎င်းတို့အနေဖြင့် တိုက်ပွဲရှောင်နေရသည်မှာ သုံးနှစ်ကျော်ကြာမြင့်နေပြီဖြစ်ကြောင်း သိရသည်။
