သမ္မတရွေးကောက်ပွဲဝင်ခဲ့သည့် ကွန်ဆာဗေးတစ်ကိုယ်စားလှယ်လောင်း ဖလာဗီယိုဘော်ဆိုနာရိုက ၎င်းသည် ဘရာဇီးနိုင်ငံတွင် ဖိနှိပ်မှု၏သားကောင်ဖြစ်ခဲ့ရသောကြောင့် ဘရာဇီးမှ အမေရိကန်သို့ ထွက်လာခဲ့ရခြင်းဖြစ်သည်ဟုအောက်တိုဘာ ၃၀ ရက်တွင် ပြောကြားခဲ့သည်။
အောက်တိုဘာ ၂၅ ရက် ဒုတိယအကျော့ရွေးကောက်ပွဲတွင် သမ္မတလူးဝစ်အင်နာစီယိုလူလာဒါဆေးလ်ဗားကို ရှုံးခဲ့သောဘော်ဆိုနာရိုသည် အောက်တိုဘာ ၂၇ ရက်တွင် ဘရာဇီးမှ တိတ်တဆိတ် ထွက်ခွာလာခဲ့ပြီး အာဂျင်တီးနားနှင့် အီကွေဒေါတို့ကို သွားခဲ့ပြီးနောက် အောက်တိုဘာ ၂၈ ရက်တွင် စီးလုံးငှားလေယာဉ်ဖြင့် ဖလော်ရီဒါကို ရောက်လာခဲ့သည်။
"နှိပ်ကွပ်တာဟာ ကျွန်တော်ထင်မြင်ထားတာထက်တောင် မြန်မြန် စတင်ခဲ့တာပါ"ဟု ဘရာဇီးအထက်လွှတ်တော်အမတ်ဘော်ဆိုနာရိုက အင်စတာဂရမ်မှ live လွှင့်ပြောကြားခဲ့သည်။ ငွေမည်းကိုငွေဖြူပြောင်းလဲသည့်အတွက် စုံစမ်းစစ်ဆေးမှုအစိတ် အပိုင်းအဖြစ် သူ၏ဘရာဇီးနိုင်ငံကူး လက်မှတ်များ ဖျက်သိမ်းခံခဲ့ရပြီးနောက်သူသည် ထွက်ပြေးရန် ဆုံးဖြတ်ခဲ့သည်ဟု ပြောကြားခဲ့သည်။
နေအိမ်အကျယ်ချုပ်ဖြင့် ထိန်းသိမ်းခံထားရသော ဖခင်(ဘရာဇီးသမ္မတဟောင်း)ဂျယ်ယာဘော်ဆိုနာရိုထံ သွားနေစဉ် ရဲများက သူ၏နိုင်ငံကူးလက်မှတ်များကို ဖျက်သိမ်းလိုက်သည်ဟု ရဲက အောက်တိုဘာ ၂၆ ရက်တွင် အကြောင်းကြားခဲ့ပုံအား သူက ပြန်ပြောပြခဲ့သည်။
"ကျွန်တော်က ဘရာဇီးကနေ ထွက်ပြေးလာတာမဟုတ်ပါဘူး။ ဘရာဇီးကိုလာဖို့ ထွက်လာခဲ့တာပါ"ဟု ဘော်ဆိုနာရိုက ပြောကြားခဲ့သည်။ နိုင်ငံတော်တရားရုံးချုပ် တရားသူကြီး အလက်ဇန်ဒါဒီမိုရေးစ်ကမိမိကို မှားယွင်း စွပ်စွဲခဲ့သည်ဟု ဆိုခဲ့သည်။
အဆုံးအဖြတ်ရွေးကောက်ပွဲတွင် မူမမှန်မှုများရှိခဲ့သည်ဟု သူက ပြောကြားခဲ့ပြီး ယင်းမူမမှန်မှုများကို သူက VAR က ခွင့်ပြုပေးခဲ့သည့် လက်ထိဘော သွင်းဂိုးများနှင့် နှိုင်းယှဉ်ပြခဲ့သည်ဆိုသော်လည်း အဘယ်ကြောင့် ပုံမှန်မဟုတ်သည့်အခြေအနေများရှိနိုင်ရသလဲဆိုသည်ကို အသေးစိတ်ပြောကြားခြင်းမရှိပေ။
နိုင်ငံမှထွက်ခွာရလာသည်ကို မည်သူမျှမသိစေဘဲ ထွက်ခွာရန် မိမိနှင့် ဇနီးသည်တို့က ဆုံးဖြတ်ခဲ့ခြင်းဖြစ်သည်ဟုဆိုသည်။ ထို့အတွက် ပြည်သူများက မည်သူ့ကိုမျှအပြစ်မတင်ကြရန် ဘော်ဆိုနာရိုက တိုက်တွန်းခဲ့သည်။
အထက်လွှတ်တော်အမတ် ဘော်ဆိုနာရို လွတ်မြောက်မှုတွင် အမေရိကန်နှင့် အာဂျင်တီးနားတို့၏ပါဝင်ပတ်သက်မှုကို ရှင်းလင်းရန် အမေရိကန်သမ္မတဒေါ်နယ်ထရန့်နှင့် အာဂျင်တီးနားသမ္မတ ဂျာဗီးယားမီလေးတို့ ဖိအားပေးခံနေရသည်။
