မိတ္ထီလာမြို့၊ မိတ္ထီလာပညာရေးဒီကရီကောလိပ်အတွင်းရှိ မြေအောက်ရေကန်၌ ဒေါက်များ ဆင်းဖြုတ်ရာမှ အောက်ဆီဂျင်ပြတ်တောက်မှုဖြစ်ပွားပြီး လူ လေးဦး သေဆုံးကာ တစ်ဦးအား အသက်ရှင်လျက် ကယ်ဆယ်နိုင်ခဲ့ကြောင်း သိရသည်။
ဖြစ်စဉ်မှာ နိုဝင်ဘာလ ၁ ရက်နေ့ မွန်းလွဲ ၃ နာရီ ၁၅ မိနစ်အချိန်ခန့်တွင် မိတ္ထီလာပညာရေး ဒီကရီကောလိပ် အတွင်းရှိ အလျား ၁၈ ပေ၊ အနံ ၁၈ ပေနှင့် အနက် ၆ ပေခွဲရှိ မြေအောက်ရေကန်အတွင်းသို့ ဒေါက်များ ဆင်းဖြုတ်စဉ် အောက်ဆီဂျင်ပြတ်တောက်ပြီး သတိလစ်လဲကျ၍ အသက်ရှူမွမ်းကြပ်မှုများ ဖြစ်ပွားခဲ့ခြင်း ဖြစ်သည်။
အဆိုပါဖြစ်စဉ်အား တာဝန်သိပြည်သူတစ်ဦး၏ တယ်လီဖုန်းဖြင့် သတင်းပေးပို့ချက်အရ မိတ္ထီလာခရိုင်နှင့် မြို့နယ်မီးသတ်တပ်ဖွဲ့ဝင်များက သွားရောက်၍ ရှာဖွေကယ်ဆယ်ရေးလုပ်ငန်းများ အချိန်နှင့်တစ်ပြေးညီ ဆောင်ရွက်ခဲ့ကြသည်။
ထိုသို့ မီးသတ်တပ်ဖွဲ့ဝင်များ၏ အမြန်ဆုံး သွားရောက်ရှာဖွေကယ်ဆယ်ရေး ဆောင်ရွက်မှုကြောင့် မြေအောက်ရေကန်အတွင်း ပိတ်မိနေသူများအနက်မှ အမျိုးသား တစ်ဦးအား အသက်ရှင်လျက် ကယ်ဆယ်နိုင်ခဲ့ပြီး ကျန်အမျိုးသား လေးဦးမှာမူ သေဆုံးလျက် ပြန်လည်ဆွဲထုတ်နိုင်ခဲ့ကြောင်း သိရသည်။
သက်ထွန်းအောင်
ဓာတ်ပုံ-ကိုသန်းဌေး
