၂ဝ၂၆ ခုနှစ် တိုင်းဒေသကြီးနှင့်ပြည်နယ် ဘိလိယက်နှင့်စနူကာပြိုင်ပွဲ ဆက်လက်ကျင်းပ

ရန်ကုန်   နိုဝင်ဘာ   ၄

ဘိလိယက်နှင့် စနူကာအားကစားအဆင့်အတန်း ပိုမိုဖွံ့ဖြိုးတိုးတက်မြင့်မားလာစေရေးနှင့်  မျိုးဆက်သစ် အားကစားသမားများ  ပေါ်ထွက်လာစေရေးတို့အတွက် ရည်ရွယ်၍ အားကစားရေးရာဝန်ကြီးဌာနက ကြီးမှူးပြီး  အားကစားနှင့် ကာယပညာဦးစီးဌာန  မြန်မာနိုင်ငံ ဘိလိယက်နှင့်  စနူကာအဖွဲ့ချုပ်နှင့်  ရန်ကုန်တိုင်းဒေသကြီးအစိုးရအဖွဲ့တို့ ပူးပေါင်း၍ ၂၀၂၆  ခုနှစ်   တိုင်းဒေသကြီးနှင့် ပြည်နယ်  ဘိလိယက်နှင့်စနူကာပြိုင်ပွဲကို ရန်ကုန်တိုင်းဒေသကြီး သင်္ဃန်းကျွန်းမြို့နယ် အမျိုးသားအားကစား ပြိုင်ပွဲရုံ(၁)သုဝဏ္ဏ၌ ကျင်းပလျက်ရှိသည်။

ယနေ့ ပွဲစဉ်များအဖြစ် အမျိုးသား/အမျိုးသမီး စနူကာ 6-Red, စနူကာ 15-Red နှင့် 9 Ball  Pool ပြိုင်ပွဲများကို ယှဉ်ပြိုင်ခဲ့သည်။

အမျိုးသားပြိုင်ပွဲ    ပွဲစဉ်များအဖြစ် စနူကာ 15-Red ပြိုင်ပွဲတွင်  မကွေးတိုင်းဒေသကြီးအသင်းမှ ကောင်းဇံထက်က  ရန်ကုန်တိုင်းဒေသကြီးအသင်းမှ နိုင်ဝင်းကို ၃ ပွဲ ၁ ပွဲ ရလဒ်ဖြင့်လည်းကောင်း၊ ရန်ကုန်တိုင်းဒေသကြီးအသင်းမှ အောင်ညီညီမောင်က မန္တလေးတိုင်းဒေသကြီးအသင်းမှ မာန်ဟိန်းကျော်ကို ၃ ပွဲ ၁ ပွဲ ရလဒ်ဖြင့်  လည်းကောင်း၊ စနူကာ 6-Red ပြိုင်ပွဲတွင် ကရင်ပြည်နယ်အသင်းမှ ကိုကိုချစ်က ချင်းပြည်နယ်အသင်းမှ သျှံထွန်းအောင်ကို ၄ ပွဲ ၁ ပွဲ ရလဒ်ဖြင့် လည်းကောင်း၊ မန္တလေးတိုင်းဒေသကြီးအသင်းမှ မင်းစည်သူထွန်းက ရန်ကုန်တိုင်းဒေသကြီးအသင်းမှ သူရဇော်ကို ၄ ပွဲ ၂ ပွဲ ရလဒ်ဖြင့်လည်းကောင်း  ယှဉ်ပြိုင်အနိုင်ရရှိခဲ့သည်။ 

ထို့အတူ အမျိုးသမီးပြိုင်ပွဲ ပွဲစဉ်အဖြစ် 9 Ball Pool ပြိုင်ပွဲတွင် ရှမ်းပြည်နယ်အသင်းမှ ခေါန်ဆန့်က မွန်ပြည်နယ်အသင်းမှ ဝင်းမာလာအောင်ကို ၅ ပွဲ ၃ ပွဲ ရလဒ်ဖြင့် လည်းကောင်း၊ မန္တလေးတိုင်းဒေသကြီးအသင်းမှ သက်ဝါဝင်းက  မွန်ပြည်နယ်အသင်းမှ သန္တာတိုးအောင်ကို ၅ ပွဲ ၂ ပွဲ ရလဒ်ဖြင့် လည်းကောင်း ယှဉ်ပြိုင်အနိုင်ရရှိခဲ့သည်။

ဘိလိယက်နှင့် စနူကာပြိုင်ပွဲ ဗိုလ်လုပွဲစဉ်များနှင့် ဆုချီးမြှင့်ပွဲအခမ်းအနားကို နိုဝင်ဘာ ၅ ရက် နံနက် ၁၀ နာရီတွင်  စတင်ကျင်းပသွားမည်ဖြစ်၍ အားကစားဝါသနာရှင် မိဘပြည်သူများအနေဖြင့် မည်သူမဆို “အခမဲ့” လာရောက်ကြည့်ရှုအားပေးနိုင်ကြောင်း သိရသည်။

သတင်းစဉ်