သက်တံ့
၁၀. ၁၁. ၂၀၂၆
မြန်မာပြည်တွင်းဘဏ်များတွင် အကြီးဆုံးတစ်ခုဖြစ်သော ဧရာဝတီဘဏ် အများနှင့် သက်ဆိုင်သော ကုမ္ပဏီလီမိတက် (Ayeyarwady Bank Public Company Limited -AYA Bank PCL) ၏ ၂၀၂၆ ခုနှစ်၊ စက်တင်ဘာလကုန်အထိ ဘဏ္ဍာရေး အခြေအနေနှင့် လုပ်ငန်းလည်ပတ်မှု ပိုင်ဆိုင်မှုများ အရ ဘဏ်၏ စုစုပေါင်း ပိုင်ဆိုင်မှု (Assets) မှာ ကျပ် ၉ ဒသမ ၅ ထရီလီယံအထိ ရှိလာကြောင်း ဘဏ်၏ ထုတ်ပြန်ချက် အချက်အလက်များအရ သိရသည်။
ယခုနှစ် စက်တင်ဘာလအထိ ထုတ်ပြန်ထားသော စာရင်းအင်းများအရ AYA Bank PCL ၏ အစုရှယ်ယာရှင်များ အသားတင်ပိုင်ဆိုင်မှု (Equity) မှာ ကျပ် ၅၀၀ ဒသမ ၃ ဘီလီယံ ရှိပြီး မ,တည် ရင်းနှီးမြှုပ်နှံငွေ (Paid Up Capital) ပမာဏမှာ ကျပ် ၂၉၇ ဘီလီယံ ရှိကြောင်း ဖော်ပြထားသည်။
ထို့ပြင် ဘဏ်၏ လုပ်ငန်းကွန်ရက် ဖြန့်ကြက်ထားရှိမှုအနေဖြင့် တစ်နိုင်ငံလုံးတွင် ဘဏ်ခွဲပေါင်း ၂၆၁ ခုနှင့် အလိုအလျောက် ငွေထုတ်စက် (ATM) ပေါင်း ၆၂၃ ခုအထိ ဖွင့်လှစ်ထားရှိပြီး နိုင်ငံခြားငွေ ဝန်ဆောင်မှုအတွက် ငွေလဲကောင်တာ (Exchange Counter) ၁၆၂ ခုဖြင့် ဝန်ဆောင်မှုပေးလျက် ရှိသည်။
လက်ရှိတွင် AYA ဘဏ်၌ တာဝန်ထမ်းဆောင်နေသော ဝန်ထမ်းအင်အားမှာလည်း ဦးရေ ၇,၀၀၀ ကျော်အထိ ရှိလာနေကာ လက်ရှိအချိန် ဧရာဝတီဘဏ်၏ အကြီးအကဲအဖြစ် တည်ထောင်သူ ဦးဇော်ဇော်က ဥက္ကဋ္ဌတာဝန်ရယူထားကြောင်း သိရသည်။
