Eleven Media Group

စီးရီးအေချန်ပီယံဆုအတွက် လက်ရှိချန်ပီယံ အင်တာမီလန်အသင်း ရေပန်းစားနေဆဲဖြစ်ကြောင်း ကာပယ်လို ပြောကြား

Photo: AFP

နာမည်ကျော် စီးရီးအေနည်းပြ ဟောင်း ကာပယ်လိုက ယခုရာသီစီးရီး အေချန်ပီယံဆုအတွက် လက်ရှိချန်ပီယံ အင်တာမီလန်အသင်း ရေပန်းစားနေဆဲဖြစ်ကြောင်း သုံးသပ်ပြောကြားခဲ့သည်။

စီးရီးအေပွဲစဉ် (၁၈)အပြီးတွင် အတ္တလန်တာအသင်းက ရမှတ် (၄၁)ဖြင့် အမှတ်ပေးဇယားထိပ်ဆုံး၌ရပ်တည်နေပြီး နာပိုလီက (၄၁) မှတ်စီတူနေသော်လည်း ဂိုးကွာခြားချက်ဖြင့် ဒုတိယ၊ တစ်ပွဲလျော့ကစားထားသည့် အင်တာမီလန်အသင်းက (၄၀)မှတ်ဖြင့် တတိယနေရာတွင် ရပ်တည်နေသည်။

သို့သော် ကာပယ်လိုက ယခုရာသီ စီးရီးအေချန်ပီယံဆုကို ဆွတ်ခူးရန်အတွက် အင်တာမီလန် အလေးသာနေဆဲဖြစ်ကြောင်း ပြောကြားခဲ့ခြင်းဖြစ်သည်။

ကာပယ်လိုက "အခုအချိန်မှာ အင်တာမီလန်ရဲ့ခြေစွမ်းက အကောင်းကြီး မဟုတ်ပေမဲ့ နိုင်ပွဲ ရနေပါတယ်။ သူတို့မှာ ချန်ပီယံအတွေ့အကြုံတွေလည်း ရှိပါတယ်။ မာတီနက်ဇ် ဂိုးသိပ်မရတာတောင် သူတို့က စီးရီးအေချန်ပီယံဆုအတွက် နံပါတ်(၁) ဖြစ်နေဆဲပါ"ဟုဆိုခဲ့သည်။

မူရင်းသတင်း — Eleven Media Group