
နာမည်ကျော် ပေါ်တူဂီဝါရင့်တိုက်စစ်မှူး စီရော်နယ်လ်ဒိုက ယခုရာသီ ချန်ပီယံလိဂ်ပြိုင်ပွဲတွင် ၎င်း၏အသင်းဟောင်း ရီးယဲလ်မက်ဒရစ် ထပ်မံဗိုလ်စွဲမည်ဟု ခန့်မှန်းပြောကြားခဲ့သည်။
ယခုရာသီတွင် ချန်ပီယံလိဂ်ပြိုင်ပွဲကို ပြိုင်ပွဲဝင် (၃၆) သင်းအထိ တိုးမြှင့်ကာ ယခင်လို အုပ်စုအဆင့် မကစားစေတော့ဘဲ League Phase ပုံစံ ပြောင်းလဲကျင်းပလျက်ရှိသည်။
ချန်ပီယံလိဂ်လက်ရှိချန်ပီယံ ရီးယဲလ်မက်ဒရစ်အသင်းသည် ယခုရာသီ ချန်ပီယံလိဂ်တွင် ရုန်းကန်နေရပြီး League Phase ပွဲစဉ် (၆) အပြီးတွင် ရမှတ် (၉) မှတ်ဖြင့် အဆင့် (၂၀)နေရာ ရပ်တည်နေပြီး ရှုံးထွက်(၁၆)သင်းအဆင့် တက်ရောက်နိုင်ရန် ရုန်းကန်ရဖွယ် ရှိနေသည်။
သို့သော် စီရော်နယ်လ်ဒိုက ''ရီးယဲလ်မက်ဒရစ်ကို ချန်ပီယံလုပွဲတွေကနေ ဘယ်တော့မှ ထုတ်ပစ်လို့ မရပါဘူး။ ချန်ပီယံလိဂ်မှာ ရီးယဲလ်မက်ဒရစ် ထပ်မံဗိုလ်စွဲမယ်ဆိုတဲ့ဘက်က ကျွန်တော် လောင်းချင်ပါတယ်။ ဘာလို့လဲဆိုတော့ ဘာနေဗျူးကွင်းမှာ ရီးယဲလ်မက်ဒရစ်ကို ရင်ဆိုင်ဖို့ အသင်းတိုင်း ကြောက်ကြလို့ပါ။ ရီးယဲလ်က အမြဲပြန်လာနိုင်တာကြောင့် ဒီရာသီမှာလည်း သူတို့ ချန်ပီယံလိဂ်ရမယ့်ဘက်က ကျွန်တော် လောင်းမှာပါ''ဟု ပြောကြားခဲ့သည်။