Eleven Media Group

ဘိုင်ယန်မြူးနစ်ဂိုးသမားဟောင်း အိုလီဗာခန်း ပြင်သစ်ကလပ် ဘော်ဒိုးအသင်းကို ဝယ်ယူရန် ဆွေးနွေးနေ

Photo: Getty Images

ဘိုုင်ယန်မြူးနစ်အသင်း၏ ဂိုးသမားဟောင်း အိုလီဗာခန်းသည် ပြင်သစ်ကလပ် ဘော်ဒိုးအသင်းကို ဝယ်ယူရန် ဆွေးနွေးနေကြောင်း သိရသည်။

အိုလီဗာခန်း (၅၅ နှစ်)သည် ၂၀၀၆ ခုနှစ်တွင် ဂျာမနီလက်ရွေးစင် ကစားသမားဘဝမှ အနားယူခဲ့ပြီး ၂၀၀၈ ခုနှစ်တွင် ကစားသမားဘဝမှ အပြီးတိုင်အနားယူခဲ့သူဖြစ်သည်။ ၎င်းသည် ကစားသမားဘဝမှ အနားယူပြီးနောက် နည်းပြလောကသို့ ကူးပြောင်းခြင်းမရှိဘဲ ဘိုင်ယန်မြူးနစ်အသင်း၏ စီမံအုပ်ချုပ်ရေးပိုင်းတွင်သာ ဝင်ရောက်ဆောင်ရွက်ခဲ့သည်။

အိုလီဗာခန်းသည် ၂၀၂၁ ခုနှစ်တွင် ဘိုင်ယန်မြူးနစ်အသင်း၏ အမှုဆောင်အရာရှိချုပ်အဖြစ် ခန့်အပ်ခံခဲ့ရပြီး ၂၀၂၃ ခုနှစ် တွင် အဆိုပါရာထူးမှ ထုတ်ပယ်ခံခဲ့ရသည်။ ယခုအခါ ၎င်းသည် လုပ်ငန်းရှင်အဖွဲ့အစည်းတစ်ခုနှင့်အတူ ဘော်ဒိုးအသင်းကို ဝယ်ယူရန် ဆွေးနွေးနေခြင်းဖြစ်ကြောင်း သိရသည်။

ဘော်ဒိုးအသင်းသည် ဇီဒန်းအပါအဝင် နာမည်ကျော်ပြင်သစ်ကစားသမားများစွာကို မွေးထုတ်ပေးနိုင်ခဲ့သည့် ကလပ်အသင်းတစ်သင်းဖြစ်သော်လည်း လက်ရှိအချိန်၌ ပြင်သစ်စတုတ္ထတန်းတွင် ယှဉ်ပြိုင်ကစားနေရသည်။ ထို့ပြင် ယူရိုသန်း (၁၀၀)ကျော် အကြွေးတင်နေသည့် အတွက် ပရော်ဖက်ရှင်နယ်ကလပ် အသင်းတစ်သင်းအဖြစ် ဆက်လက်ရပ်တည်နိုင်ရန်ပင် ရုန်းကန်နေရသည်။

ထို့ကြောင့် အိုလီဗာခန်းက မာဆေးလ်အသင်း၏ ဥက္ကဋ္ဌဟောင်းနှင့်အတူ ဘော်ဒိုးအသင်းကို ဝယ်ယူရန် ကြိုးပမ်းနေခြင်းဖြစ်ကြောင်း သိရသည်။

မူရင်းသတင်း — Eleven Media Group