Eleven Media Group

ဘာစီလိုနာနှင့် စာချုပ်သက်တမ်းတိုးမည်ဟု ယမားလ် ကတိပေး

Photo: B/R Football

ဘာစီလိုနာလူငယ်တိုက်စစ်ကစားသမား ယမားလ်က မိမိအနေဖြင့် ဘာစီလိုနာအသင်းနှင့် စာချုပ်သက်တမ်းတိုးမည်ဖြစ်ကြောင်း ကတိပေးပြောကြားခဲ့သည်။
စပိန်တိုက်စစ်ကစားသမား ယမားလ်(၁၇ နှစ်)သည် ဘာစီလိုနာအသင်းနှင့် ၂၀၂၆ ခုနှစ်တွင် စာချုပ်သက်တမ်းကုန်ဆုံးမည်ဖြစ်သည်။
ဘာစီလိုနာအသင်းသည် ယမားလ်ကို စာချုပ်သစ်ချုပ်ဆိုရန်အတွက်ဆွေးနွေးနေဆဲဖြစ်ကြောင်း သိရသည်။
ယမားလ်က ''ဘာစီလိုနာနဲ့ ဘယ်တော့ စာချုပ်လက်မှတ်ထိုးရမလဲ ကျွန်တော် မသိပါဘူး။ သိပ်မကြာတော့ဘူးလို့ ကျွန်တော် ထင်ပါတယ်။ ဘာစီလိုနာက ကျွန်တော့်ဘဝဖြစ်ပြီး အသင်းနဲ့ဖြစ်နိုင်သမျှ မြန်မြန်စာချုပ်သစ်ချုပ်ဆိုနိုင်ဖို့ ကျွန်တော် မျှော်လင့်ပါတယ်။ ဘာစီလိုနာအတွက်ပဲ ကျွန်တော် ကစားချင်ပါတယ်''ဟု ပြောကြားခဲ့သည်။
ယမားလ်သည် လက်ရှိစျေးကွက်တန်ဖိုးအရ ယူရိုသန်း(၁၈၀)တန်ကြေးရှိသည့်ကစားသမားအဖြစ် သတ်မှတ်ခံထားရသည်။

မူရင်းသတင်း — Eleven Media Group