Eleven Media Group

နွေရာသီကာလတွင် ကစားသမားသစ်ခေါ်ယူမှုများ ပြုလုပ်ခဲ့သင့်ကြောင်း မန်စီးတီးအသင်းနည်းပြ ဂွါဒီယိုလာ ပြောကြား

Photo: AFP

မန်စီးတီးအသင်းနည်းပြ ဂွါဒီယိုလာက ပြီးခဲ့သည့်နွေရာသီကာလအတွင်း ကစားသမားများဝယ်ယူမည့် ကလပ်အသင်း၏ အစီအစဉ်ကို ပိတ်ပင်ခဲ့ခြင်းဖြင့် အမှားပြုလုပ်ခဲ့ကြောင်း ပြောကြားခဲ့သည်။

မန်စီးတီးအသင်းသည် ပြီးခဲ့သည့်နွေရာသီက အသင်းပိုင်ရှင် City Football Group ပိုင် အသင်းတစ်သင်းဖြစ်သည့် ထရွိုင်စ်အသင်းမှ ဘရာဇီးလ်တောင်ပံကစားသမား ဆာဗင်ညိုတစ်ဦးတည်းသာ ခေါ်ယူခဲ့ခြင်း ဖြစ်သည်။

"နွေရာသီကာလတုန်းက ကလပ်ဟာ ဒါကို တွေးခဲ့ပါတယ်။ ပြီးတော့ ဘာခေါ်ယူမှုမှ မလုပ်ချင်ဘူးလို့ ကျွန်တော်က ပြောခဲ့တာပါ။ အသင်းကစားသမားတွေအပေါ် ကျွန်တော် အများကြီး အားကိုးခဲ့ပါတယ်။ ပြီးတော့ ကျွန်တော်တို့ နောက်တစ်ကြိမ် ထပ်လုပ်နိုင်ဦးမယ်လို့ တွေးခဲ့ပါတယ်။ ဒါပေမဲ့ ဒဏ်ရာတွေ ရခဲ့ပြီးနောက် ကျွန်တော်တို့ ဒါကို ပြုလုပ်ခဲ့သင့်တယ်လို့ တွေးမိခဲ့တယ်" ဟု ဂွါဒီယိုလာက ပြောကြားခဲ့သည်။

ပထမရာသီဝက်၌ မယုံကြည်လောက်အောင် ရလဒ်ဆိုးရွားမှုတွင် ဒဏ်ရာပြဿနာများက အဓိက အကြောင်းအရင်း ဖြစ်ခဲ့သည်။ မန်စီးတီးအနေဖြင့် ယခုရာသီအတွင်း နှစ်ပတ်နှင့်အထက် အနားယူရသည့် ဒဏ်ရာရမှု ၁၅ ကြိမ် ရှိခဲ့ပြီး အဆိုးရွားဆုံးမှာ အဓိကကွင်းလယ်ကစားသမားဖြစ်သူ Ballon d'Or ဆုရှင် ရိုဒရီကို ရာသီကုန်အထိ လက်လွှတ်ခဲ့ရခြင်းဖြစ်သည်။

ပရီးမီးယားလိဂ် အမှတ်ပေးဇယား၌ အဆင့်များ ကျဆင်းသွားကာ လိဂ်ဖလားပြိုင်ပွဲမှလည်း ထွက်ခဲ့ရပြီး ချန်ပီယံလိဂ်ပြိုင်ပွဲ အမှတ်ပေးဇယားတွင်လည်း အသင်းပေါင်း ၃၆ သင်း ရှိသည့်အနက် အဆင့် ၂၂ နေရာသို့ ရောက်ရှိနေသည်။

မန်စီးတီးအသင်းသည် မနေ့က ကစားခဲ့သည့် ပရီးမီးယားလိဂ်ပွဲစဉ်တွင်လည်း ဘရန့်ဖို့ဒ်အသင်းနှင့် ၂ ဂိုးစီသရေကျခဲ့သည်။

မူရင်းသတင်း — Eleven Media Group