
မန်စီးတီးတိုက်စစ်မှူး ဟာလန်း က ယခုရာသီတွင် ရလဒ်များဆိုးရွားခဲ့ခြင်းက ၎င်းနှင့် အသင်းဖော်များကို ပိုမိုဆာလောင်စေကြောင်း ဖွင့်ဟပြောကြားခဲ့သည်။
မန်စီးတီးအသင်းသည် ၂၀၂၄ နိုဝင်ဘာနှင့် ဒီဇင်ဘာလများတွင်ရုန်းကန်ခဲ့ရပြီး ယင်းကာလအတွင်း ကစားခဲ့သည့် ပြိုင်ပွဲစုံ (၁၂)ပွဲတွင် (၈)ပွဲထိ ရှုံးနိမ့်ခဲ့ကာ (၂) ပွဲသာ အနိုင်ရခဲ့သည်။ ထို့ကြောင့် မန်စီးတီးအသင်းမှာ ဝေဖန်မှုများနှင့်ရင်ဆိုင်ခဲ့ရသလို၊ ဟာလန်းမှာလည်း ဝေဖန်ခံခဲ့ရသည်။
မန်စီးတီးအသင်းသည် လက်ရှိတွင်ရလဒ်ပြန်ကောင်းလာပြီး ပြိုင်ပွဲစုံနောက်ဆုံး (၄) ပွဲဆက် ရှုံးပွဲမရှိ ကစားထားသည်။ ယခုအခါ မန်စီးတီးတိုက်စစ်မှူး ဟာလန်းက ၂၀၂၄ နှစ်ကုန်ပိုင်းတွင် ရလဒ်များ ဆိုးရွားခဲ့ခြင်းက ၎င်းတို့ကို စိတ်အားတက်ကြွစေပြီး ပိုမိုကြိုးစားချင်အောင် တွန်းအားပေးခဲ့ကြောင်း ပြောကြားခဲ့ခြင်းဖြစ်သည်။
ဟာလန်းက "ကျွန်တော်တို့က နိုင်ပွဲတွေနဲ့ အသားကျနေသူတွေဖြစ်လို့ ပြီးခဲ့တဲ့ (၂)လက ကျွန်တော်တို့အတွက် ထူးဆန်းပါတယ်။ ဒါပေမဲ့ အဲဒါက ကျွန်တော်တို့အတွက် ပိုကောင်းစေတယ်လို့ ထင်ပါတယ်။ ရလဒ်တွေ ဆိုးရွားခဲ့တာက ကျွန်တော်တို့ကို ပိုကြိုးစားဖို့ တွန်းအားဖြစ်စေပါတယ်။ ဒဏ်ရာပြဿနာတွေကြောင့် ကံဆိုးခဲ့ပေမဲ့ ဒါကို ဆင်ခြေပေးလို့ မရပါဘူး။ နည်းပြက အရင်ကထက် ပိုဆာလောင်နေပြီး ကျွန်တော်တို့အားလုံးကလည်း အောင်မြင်မှုအတွက် ပိုဆာလောင်နေကြပါတယ်"ဟု ပြောကြားခဲ့သည်။