
နာပိုလီအသင်းသည် အသင်းတောင်ပံတိုက်စစ်ကစားသမား ခွာရတ်စကယ်လီယာ၏နေရာတွင် အစားထိုးရန်အတွက် မန်ယူတောင်ပံတိုက်စစ်ကစားသမား ဂါနာချိုအား ယူရို (၄၅) သန်းဖြင့် ကမ်းလှမ်းခဲ့ပြီး ယင်းပမာဏမှာ မန်ယူအသင်း တောင်းဆိုသည့်စျေးနှင့် များစွာကွာဟနေကြောင်း သိရှိရသည်။
အသက် (၂၃)နှစ်အရွယ်ရှိ ဂျော်ဂျီယာလက်ရွေးစင်တောင်ပံတိုက်စစ်ကစားသမား ခွာရတ်စကယ်လီယာသည် ယခုဇန်နဝါရီတွင် အသင်းမှ ထွက်ခွာခွင့်တောင်းခဲ့ပြီးနောက် လက်ရှိတွင် ပြင်သစ်ထိပ်သီး PSG အသင်းသို့ ယူရို (၇၅) သန်းဖြင့် ပြောင်းရွှေ့ရန် သဘောတူညီမှုရခဲ့ပြီဖြစ်ကြောင်း ဥရောပမီဒီယာများက အကျယ်တဝင့်ဖော်ပြနေကြသည်။
နာပိုလီနည်းပြ ကွန်တီသည် ခွာရတ်စကယ်လီယာ၏နေရာတွင် အစားထိုးရန်အတွက် အာဂျင်တီးနားတောင်ပံတိုက်စစ်ကစားသမား ဂါနာချိုကို အလိုရှိနေကြောင်း သိရသည်။
ထို့ကြောင့် နာပိုလီအသင်းတာဝန်ရှိသူများသည် ဂါနာချိုအား ခေါ်ယူရန် မန်ယူအသင်းထံ ယူရို (၄၅)သန်းဖြင့် ကမ်းလှမ်းခဲ့ပြီး မန်ယူအသင်း တောင်းဆိုသည့် ပမာဏနှင့် များစွာကွာဟနေကြောင်း သိရသည်။
မန်ယူအသင်းသည် ပရီးမီးယားလိဂ်၏အမြတ်အစွန်းနှင့် ရေရှည်တည်တံ့ရေးစည်းမျဉ်း(PSR)နှင့် ကိုက်ညီမှုရှိစေရန်အတွက် အသင်းကစားသမားအချို့ကို ရောင်းထုတ်လိုနေပြီး ယင်းထဲတွင် ဂါနာချိုလည်း ပါဝင်နေကြောင်း သိရှိရသည်။
မန်ယူအသင်းအနေဖြင့် အသင်းအကယ်ဒမီထွက်ဖြစ်သည့် ဂါနာချိုအား ရောင်းချမည်ဆိုပါက ၎င်းအတွက် ရရှိသည့် ပြောင်းရွှေ့ကြေးမှာ အသားတင်အမြတ်ငွေအဖြစ် ရရှိမည်ဖြစ်သည်။
ထို့ကြောင့် မန်ယူအသင်းသည် ဂါနာချိုအတွက် ပြောင်းရွှေ့ကြေး ယူရို သန်း (၈၀) အထိ အလိုရှိနေကြောင်း သိရသည်။
ယခု ဂါနာချိုအတွက် နာပိုလီအသင်း ကမ်းလှမ်းခဲ့သည့် ယူရို (၄၅)သန်းမှာ မန်ယူအသင်းတောင်းဆိုသည့်စျေးနှင့် ထက်ဝက်နီးပါးကွာဟနေသည်။
Il Corriere dello Sport ၏ဖော်ပြချက်အရ နာပိုလီအသင်းသည် ဂါနာချိုအား ကြေးတိုးမြှင့်ကမ်းလှမ်းမည်ဆိုပါကလည်း ယူရိုသန်း (၆၀)ထက် ပိုပေးရန် မရှိကြောင်း သိရှိရသည်။
ဂါနာချိုအား ခေါ်ယူရန် နာပိုလီအသင်းအပြင် ဂျူဗင်တပ်စ်အသင်းနှင့် အက်သလက်တီကိုအသင်းတို့ကလည်း စိတ်ဝင်စားနေပြီး နာပိုလီအသင်းကသာ ကမ်းလှမ်းခဲ့ခြင်းဖြစ်ကြောင်း သိရသည်။