Eleven Media Group

ဆီဗီလာနောက်ခံလူ ဆာလက်စ် ရည်ရွယ်ချက်ရှိရှိ အဝါကတ် ပြခံရရန် ပြုလုပ်သဖြင့် ဖမ်းဆီးစစ်ဆေးခံရ

Photo: Getty Images

ဆီဗီလာအသင်း လူငယ်ခံစစ်အတွင်းလူ ဆာလက်စ်သည် ရည်ရွယ်ချက်ရှိရှိ အဝါကတ်ပြခံရရန် ပြုလုပ်သဖြင့် ဖမ်းဆီးစစ်ဆေးခံခဲ့ရကြောင်း သိရသည်။
အသက် ၂၂ နှစ်သာရှိသေးသူ ဆာလက်စ်သည် ၎င်း၏သူငယ်ချင်းများ လောင်းကြေးအနိုင်ရစေရန်အတွက် ရည်ရွယ်ချက်ရှိရှိ အဝါကတ်ပြခံရရန် ပြုလုပ်ခဲ့ကြောင်း စွပ်စွဲချက်ဖြင့် ဇန်နဝါရီ ၁၄ ရက်တွင် ဆီဗီးလ်မြို့၌ ဖမ်းဆီးစစ်ဆေးခြင်းခံခဲ့ရသည်။
စပိန်ရဲတပ်ဖွဲ့က ၎င်းအား စွဲချက်မတင်ဘဲ ပြန်လွှတ်ပေးခဲ့သော်လည်း စုံစမ်းစစ်ဆေးမှုများ ဆက်လက်ပြုလုပ်နေဆဲဖြစ်ကြောင်း သိရသည်။
စပိန်ဘာသာဖြင့်ဖော်ပြသည့် El Confidencial ဒစ်ဂျစ်တယ်သတင်းစာက ဆီဗီလာနောက်ခံလူ၏ သူငယ်ချင်းနှစ်ဦးသည် ပြီးခဲ့သည့်လများအတွင်း ၎င်းအဝါကတ်ပြခံရမည့်ဘက်မှ ယူရို (၁၀၀၀၀) ဝန်းကျင် လောင်းကြေးထပ်ခဲ့ကြောင်း စတင်ဖော်ပြခဲ့ပြီးနောက် စပိန်ရဲတပ်ဖွဲ့က စုံစမ်းစစ်ဆေးမှုများ ပြုလုပ်ခဲ့ခြင်း ဖြစ်သည်။
၎င်းတို့အနေဖြင့် ဆီဗီးလ်မြို့နှင့် ၅၀ ကီလိုမီတာအကွာ မိုရွန်ဒီလာဖရွန်တီယာမြို့ရှိ လောင်းကစားဒိုင်ခြောက်ခုတွင် အကြိမ် ၃၀ ခန့် လောင်းကြေးထပ်ခဲ့ကြောင်း သိရသည်။
ဆာလက်စ်သည် ပြီးခဲ့သည့်ရာသီက အဝါကတ် ၁၀ ကြိမ်ပြခံခဲ့ရပြီး ၎င်းတို့အနက် ရာသီကုန်ခါနီး ကိုးပွဲတွင် ခုနစ်ကြိမ်ပြခံခဲ့ရခြင်းဖြစ်သည်။
ဆာလက်စ်အနေဖြင့် အပြစ်ကျူးလွန်ကြောင်းထင်ရှားပါက ဘောလုံးကစားခွင့် နှစ်နှစ်မှ ငါးနှစ်အထိ ပိတ်ပင်ခံရနိုင်သလို ထောင်ဒဏ်ခြောက်လမှ သုံးနှစ်အပြင် ဒဏ်ကြေး ယူရို ၃၀၀၀ မှ ၃၀၀၀၀ ကြား ချမှတ်ခံရနိုင်ကြောင်း သိရသည်။

မူရင်းသတင်း — Eleven Media Group