၆.၂.၂၀၂၅
Written By Zun
ကရင်ပြည်နယ်၊ မြဝတီဘက်သို့ ပို့ဆောင်မည့် ကာစီနိုလုပ်ငန်းသုံး ပစ္စည်း (၁၉) မျိုးကို ထိုင်း-မြန်မာ နယ်စပ်၊ ထိုင်းနိုင်ငံ၊ တက်ခ်ခရိုင်၊ မဲဆောက်မြို့တွင် ဖေဖော်ဝါရီ ၅ ရက် ညနေပိုင်းက ဖမ်းမိခဲ့ကြောင်း ဒေသတွင်းသတင်းများအရ သိရသည်။
ကာစီနိုသုံးပစ္စည်းများ ပို့ဆောင်မည်ဟု သတင်းအရ ထိုင်းနယ်ခြားစောင့်ရဲတပ်ဖွဲ့က စောင့်ဆိုင်းရာ တက်ခ်ခရိုင်၊ မဲဆောက်မြို့နယ်၊ ဟွေ့ မွမ့်ကျေးရွာလမ်းမအတိုင်း ကုန်တင်ကားတစ်စီး မောင်းနှင်လာချိန် တားဆီးစစ်ဆေးစဥ် ဖမ်းမိခဲ့ခြင်းဖြစ်ကြောင်း သိရသည်။
ကုန်တင်ကားပေါ်မှ ကာစီနိုလောင်းကစားရုံများတွင် အသုံးပြုသည့် စားပွဲခုံ၊ ကုလားထိုင်၊ ဖဲထုပ်၊ အံစာတုံး၊ စသည့် ပစ္စည်း (၁၉) မျိုးပါဝင်ကြောင်း၊ စစ်ဆေးချက်အရ အဆိုပါပစ္စည်းများကို ကရင်ပြည်နယ်၊ မြဝတီမြို့ တွင် တရုတ်နိုင်ငံသားတစ်ဦး အသစ်ဖွင့်လှစ်ထားသည့် ကာစီနိုလောင်းကစားရုံသို့ ပို့ဆောင်ရန် သယ်ဆောင်လာခြင်းဖြစ်ကြောင်း သိရသည်။
အဆိုပါ ပစ္စည်းများကို ထိုင်းနိုင်ငံသား ယာဉ်မောင်းက သယ်ဆောင်လာခြင်းကြောင့် လက်ရှိတွင် မဲဆောက်ရဲ စခန်း၌ ထိန်းသိမ်းထားပြီး ထိုင်းဥပဒေအရ အရေးယူဆောင်ရွက်သွားမည်ဖြစ်ကြောင်း သိရသည်။
