၁. ၄ .၂၀၂၅
Written by Hey Mar
သထုံ၊ မြေနီကုန်းဘူတာအနီး ရန်ကုန်-မော်လမြိုင် ရထားလမ်းပေါ်မှာ အပိုင်းပိုင်းပြတ်နေတဲ့ အမျိုးသားအလောင်းတစ်လောင်းကို ဒေသခံ လူမှုကူညီရေးအသင်းတွေ ကောက်ယူ ဖယ်ရှားခဲ့ရတဲ့ဖြစ်စဉ် ဒီနေ့ ဧပြီလ ၁ ရက်နေ့ မနက် ၁၀ နာရီ မိနစ် ၃၀ကျော် အချိန်က ဖြစ်ပွားခဲ့တယ်လို့ သိရပါတယ် ။
သေဆုံးသူရဲ့ အရပ်ဒေသ အမည် မသိရှိရဘဲ အလောင်းမှာ သုံးပိုင်းပြတ်ထွက်နေတာကြောင့် အင်္ဂါစုံအောင် မနည်း ကောက်ယူရတယ်လို့ ရုပ်အလောင်းကောက်ယူတဲ့ အဖြူရောင်နှလုံးသားလူမှုကူညီရေးအသင်းတာဝန်ရှိသူက ဆိုပါတယ်။
သူက “အဲ့ဒီရုပ်အလောင်းကို တူးမြောင်းကူး သံလမ်းတံတားအောက်မှာ ဟိုတစ်စ၊ ဒီတစ်စ ပြန့်ကျဲနေတာကို အိတ်ထဲ စုထည့်ပြီး သထုံဆေးရုံဆီ ပို့ပေးခဲ့ရပါတယ်။ ကျွန်တော်တို့လည်း အနီးအနားရပ်ကွက်တွေ ရွာတွေ လူပျောက်ရှိလား အပူတပြင်းစုံစမ်းပေးတာပဲ။ အခုညနေထိတော့ အခြေအနေမထူးဘူး။ ပိုင်ရှင်မဲ့နဲ့ သင်္ဂြိုဟ်ရမယ်ပုံပါပဲ” လို့ MT News ကို ပြောပါတယ်။
အဆိုပါ ရထားလမ်းပေါ်ကို မော်လမြိုင် အစုန် အဆန်ရထား၊ စာပို့ရထားနဲ့ ကျောက်တင်တဲ့ ရထားတွေလည်း နေ့စဉ်ဖြတ်သန်းလေ့ရှိတယ်လို့ သိရပါတယ်။
