နိုင်ငံပေါင်း ၃၀ ကျော်က အီရန်၏ စီရင်ကွပ်မျက်မှုများကို ရှုတ်ချ

ပြင်သစ်၊ ဗြိတိန်နှင့် ကနေဒါတို့ အပါအဝင် နိုင်ငံပေါင်း ၃၀ ကျော်သည် အီရန်နိုင်ငံ၏ သေဒဏ် စီရင်ကွပ်မျက်မှုများကို ရှုတ်ချခဲ့ပြီး အီရန်အစိုးရသည် သဘောထားကွဲလွဲမှုများကို နှုတ်ပိတ်ရန်အတွက် ဆန္ဒပြသူများကို ကွပ်မျက်နေခြင်းဖြစ်ကြောင်း ဩဂုတ် ၁၂ ရက်က ပူးတွဲထုတ်ပြန်ချက်တစ်ခုတွင် ပြောကြားခဲ့သည်။

ဥရောပသမဂ္ဂ၏ ထိပ်တန်းသံတမန်တစ်ဦးလည်း ပူးပေါင်းပါဝင်ခဲ့သည့် အဆိုပါထုတ်ပြန်ချက်တွင် အီရန်နိုင်ငံ၌ ဆန္ဒပြသူများကို ဆက်လက်ကွပ်မျက်နေမှုနှင့် သေဒဏ်ပေးမှုစနစ် အသုံးပြုနေခြင်းတို့ကို ပြင်းထန်စွာ ရှုတ်ချကြောင်း ပြောကြားခဲ့သည်။

သဘောထားကွဲလွဲမှုများကို နှုတ်ပိတ်ရန်၊ လူထုအသိုင်းအဝိုင်းများကို ခြိမ်းခြောက်ရန်နှင့် လူ့အခွင့်အရေး ကျင့်သုံးသူများကို ပြစ်ဒဏ်ပေးရန် သေဒဏ်ပေးမှုစနစ်ကို အသုံးပြုခြင်းသည် မည်သည့်အခါမျှ တရားမျှတမှု မရှိကြောင်း ထုတ်ပြန်ချက်တွင် ဖော်ပြထားသည်။

အီရန်ပြည်သူများသည် ကြောက်ရွံ့ထိတ်လန့်မှုမရှိဘဲ လွတ်လပ်စွာ ထုတ်ဖော်ပြောဆိုခွင့်နှင့် အေးချမ်းစွာ စုဝေးခွင့်ဆိုင်ရာ ၎င်းတို့၏ အခွင့်အရေးများကို လွတ်လပ်စွာ ကျင့်သုံးခွင့် ရှိရမည်ဟုလည်း ထုတ်ပြန်ချက်တွင် ဖော်ပြခဲ့သည်။

မူလက နိုင်ငံပေါင်း ၂၆ နိုင်ငံနှင့် ဥရောပသမဂ္ဂ နိုင်ငံခြားရေးရာ အကြီးအကဲ ကာဂျာ ကဲလက်စ်တို့အပြင် အခြားနိုင်ငံများလည်း အဆိုပါ ကြေညာချက်တွင် လာရောက်ပူးပေါင်းခဲ့ကြသဖြင့် လက်မှတ်ရေးထိုးသည့် နိုင်ငံပေါင်း ၃၂ နိုင်ငံအထိ ရှိလာခဲ့ကြောင်း ပြင်သစ်နိုင်ငံခြားရေးဝန်ကြီးဌာနက အေအက်ဖ်ပီသတင်းဌာနကို ပြောကြားခဲ့သည်။

Ref: AFP