မော်လ်ဒိုဗာနှင့် ယူကရိန်းနယ်စပ်ဘက်မှရိုမေးနီးယားလေပိုင်နက်ကို ချိုးဖောက်ဝင်ရောက်လာသည့် ဒရုန်းတစ်စင်းကိုနေတိုးစစ်ဆင်ရေးတာဝန်ထမ်းဆောင်နေ သော စပိန် F-18 တိုက်လေယာဉ်ကသြဂုတ် ၁၆ ရက် နံနက်ပိုင်းတွင် ပစ်ချခဲ့သည်ဟု ရိုမေးနီးယား အမျိုးသားအာဏာပိုင်များနှင့် နေတိုးတာဝန်ရှိသူများက ပြောကြားခဲ့သည်။
ရုရှား၏ ယူကရိန်းကျူးကျော်စစ်ပွဲ ဆက် လက်ပြင်းထန်နေစဉ် အရှေ့ဥရောပရှိနေတိုးအဖွဲ့ဝင်နိုင်ငံများ၏ လေပိုင်နက်အတွင်းသို့ ဒရုန်းများ နယ်စပ်ဖြတ်ကျော်ဝင်ရောက်မှု ပိုမိုများပြားလာနေသည်။
မော်လ်ဒိုဗာဘက်မှ ကျူးကျော်ဝင်ရောက်လာသည့် အဆိုပါဒရုန်းကို နေတိုး လေကြောင်းကင်းလှည့် တာဝန်ယူထားသည့် စပိန် F-18 တိုက်လေယာဉ်က ဒေသစံတော်ချိန် နံနက် ၅နာရီ တစ်မိနစ်တွင် ကြားဖြတ်ပစ်ချခဲ့သည်ဟုရိုမေးနီးယား ကာကွယ်ရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။
ဒရုန်း၏အပျက်အစီးများသည် ယူကရိန်းနယ်စပ်အနီး ဂါလာတီဒေသရှိ လူမနေသည့် နေရာသို့ ကျသွားသည်ဟု ဆိုသည်။
စပိန်ကာကွယ်ရေးဝန်ကြီးဌာနကလည်း ၎င်းတို့၏ လေတပ်သည် "ဥရောပလေပိုင်နက်ကို ကာကွယ်ရာတွင် ထူးချွန်သောပရော်ဖက်ရှင်နယ်ဆန်မှုကို ပြသနိုင်ခဲ့သည်" ဟု X လူမှုကွန်ရက်စာမျက်နှာတွင် ဖော်ပြခဲ့သည်။
စပိန်နိုင်ငံခြားရေးဝန်ကြီး ဟိုဆေးမန်နျူရယ်အယ်ဘာရက်စ်က ၎င်းသည် ရိုမေးနီးယားနိုင်ငံခြားရေးဝန်ကြီး အိုအာနာတွိုင်ယူနှင့် ဖုန်းဆက် စကားပြောခဲ့ရာ စပိန် လေသူရဲများ၏ စွမ်းဆောင်ချက်အတွက် ကျေးဇူးတင်စကား ပြောကြားခဲ့သည်ဟု ဆိုသည်။
ထိုစစ်ဆင်ရေးတွင် စပိန် F-18တိုက်လေယာဉ်နှစ်စင်း ပါဝင်ခဲ့ပြီး ယင်းသည် ရိုမေးနီးယားတွင် အခြေစိုက်ထားသည့် တပ်ဖွဲ့ဝင် ၂၀၀ ခန့်နှင့် စစ်လေယာဉ် ၁၁ စင်းပါ စပိန်တပ်ဖွဲ့၏ အစိတ်အပိုင်းဖြစ်သည်ဟု နေတိုးလေကြောင်းကွပ်ကဲရေးဌာနချုပ်ကထုတ်ပြန် သည်။
ပင်လယ်နက်နှင့် ထိစပ်နေသည့် ရိုမေးနီးယား၏ အရှေ့ဘက်ကမ်းရိုးတန်းဒေသသည် ရုရှားမကြာခဏ တိုက်ခိုက်နေသည့် နယ်မြေများနှင့် နီးကပ်လျက်ရှိသည်။
၂၀၂၂ ခုနှစ်တွင် ရုရှားက ယူကရိန်းကိုအင်အားအပြည့်ဖြင့် ကျူးကျော်တိုက်ခိုက်ခဲ့သည့်နောက်ပိုင်း ရိုမေးနီးယား၌စတုတ္ထမြောက် ဒရုန်းပစ်ခတ်ဖျက်ဆီးခံရသည့် ဖြစ်စဉ်လည်း ဖြစ်သည်။
Ref:AFP
AFP photos
