အင်ဒိုနီးရှားတွင် လှုပ်ခတ်ခဲ့သည့် ငလျင်ကြောင့် အိမ်မပြန်ရဲသည့် ပြည်သူပေါင်း ၁၀၀၀၀ ကျော်ရှိနေ

အင်ဒိုနီးရှားနိုင်ငံ အရှေ့ပိုင်းတွင် လှုပ်ခတ်ခဲ့သည့် အင်အားပြင်းငလျင်ကြောင့် လူပေါင်း ၁၃၀၀၀ နီးပါးသည် ၎င်းတို့၏ နေအိမ်များကို စွန့်ခွာပြီး အပြင်ဘက်တွင်သာ နေထိုင်လျက်ရှိကြောင်း အေအက်ဖ်ပီသတင်းတွင် ဖော်ပြခဲ့သည်။

လက်ရှိတွင်သောင်းနှင့်ချီသည့် ပြည်သူများသည် စာသင်ကျောင်းများ၊ရဲစခန်းများနှင့် အစိုးရရုံးများတွင် စခန်းချနေထိုင်ရင်း အကူအညီများကို စောင့်ဆိုင်းနေကြကာ လူအများအပြားမှာ ကွင်းပြင်များထဲတွင် တဲများထိုးပြီး နေထိုင်နေရသည်။

ဩဂုတ် ၁၅ ရက်က လှုပ်ခတ်ခဲ့သည့် ရစ်ချ်တာစကေး ၇ ဒသမ ၇ ပြင်းအားရှိ ငလျင်ကြောင့် လူ ၅၃ ဦးသေဆုံးပြီး လူ ၁၀၀ ကျော်ဒဏ်ရာရရှိခဲ့ကာ ပျောက်ဆုံးနေသူများမရှိကြောင်း ကယ်ဆယ်ရေးတာဝန်ရှိ သူများက ပြောကြားခဲ့သည်။

သို့သော် နေအိမ်သို့ မပြန်နိုင်သေးသည့် လူဦးရေမှာ ဩဂုတ် ၁၇ ရက် နံနက်ပိုင်းအထိ ၁၂၈၀၀ အထိ မြင့်တက်လာခဲ့ကြောင်း အင်ဒိုနီးရှား အမျိုးသားသဘာဝဘေးအန္တရာယ် စီမံခန့်ခွဲမှုအေဂျင်စီ (BNPB) ၏ ပြောရေးဆိုခွင့်ရှိသူ ဘာတွန်ဆူအာ ပီလီတာ ပန်ဂျိုင်တန်က အေအက်ဖ်ပီ သတင်းဌာနကို ပြောကြားခဲ့သည်။

အဆိုပါဒေသတွင် နောက်ဆက်တွဲ ငလျင်များ အကြိမ်ပေါင်း ရာနှင့်ချီ၍ လှုပ်ခတ်နေသဖြင့် အိမ်သို့ပြန်ရန် ကြောက်ရွံ့နေကြသော ဖလောရက်စ်ကျွန်းတွင်နေထိုင်သည့် ပြည်သူအများအပြားသည် ကွင်းပြင်များ၊ လမ်းများပေါ်တွင်သာ နေထိုင်လျက်ရှိသည်။

Ref: AFP