နိုင်ဂျီးရီးယား အလယ်ပိုင်း နိုက်ဂျာပြည်နယ်တွင် သောကြာနေ့ (ဩဂုတ် ၂၁ ရက်) ဝတ်ပြုဆုတောင်းပွဲ ပြုလုပ်နေစဉ်အတွင်း ဂျီဟတ်များ၏ တိုက်ခိုက်မှုကြောင့် အရပ်သား အများအပြား သေဆုံးခဲ့ပြီး အချို့မှာ ပြန်ပေးဆွဲခံခဲ့ရသည်ဟု လွတ်မြောက်လာသူများနှင့် လွှတ်တော်အမတ်များက AFP သို့ ပြောကြားခဲ့သည်။
အာဖရိက၏ လူဦးရေအများဆုံးဖြစ်သော နိုင်ဂျီးရီးယားနိုင်ငံသည် ဂျီဟတ်များ၏၁၇ နှစ်ကြာ သူပုန်ထမှုကို ရင်ဆိုင်နေရပြီး အဆိုပါအဖွဲ့များသည် ၂၀၁၄ ခုနှစ်က ချီဘော့မြို့မှ ကျောင်းသူ ရာပေါင်းများစွာကို ပြန်ပေးဆွဲခဲ့သလို လူအစုလိုက်အပြုံလိုက် ပြန်ပေးဆွဲခြင်းကို အဓိက နည်းဗျူဟာအဖြစ် အသုံးပြုလျက်ရှိသည်။
ထိုသူပုန်ထမှုများသည် အရှေ့မြောက်ပိုင်းတွင် အဓိကဖြစ်ပွားနေသည်ဆိုသော်လည်း ဩဂုတ်လ ၂၁ ရက် တိုက်ခိုက်မှုမှာ ဘီနင်နိုင်ငံ နယ်စပ်အနီး အနောက်ဘက်ဒေသ၌ ဖြစ်ပွားခဲ့ခြင်းဖြစ်သည်။
ပဋိပက္ခများ ပိုမိုပြန့်နှံ့လာသည်နှင့်အမျှ အိမ်နီးချင်း ဆာဟယ်မှ စစ်သွေးကြွများနှင့် ဒေသတွင်း လက်နက်ကိုင်အဖွဲ့များ၏ လှုပ်ရှားမှုများ အဆိုပါဒေသတွင် တိုးပွားလာခဲ့သည်။
"ပုံမှန် သောကြာနေ့ ဝတ်ပြုဆုတောင်းပွဲ ပြီးပြီးချင်းမှာပဲ လက်နက်၊ ဓားတွေကို ကိုင်ဆောင်ထားတဲ့ 'လာကူရာဝါ'လက်နက်ကိုင်အဖွဲ့ဝင် ရာပေါင်းများစွာဟာ ကျွန်တော်တို့ကို စတင်တိုက်ခိုက်ခဲ့ပါတယ်" ဟု ဘိုဂူ ဒေသဆိုင်ရာအစိုးရနယ်မြေအတွင်းရှိ ဒီကီရာကျေးရွာ တိုက်ခိုက်မှုမှ လွတ်မြောက်လာသူ ဂျိဘရီးလ် အာမက်က ပြောကြားခဲ့သည်။
"ကျွန်တော်တို့ဟာ အစ္စလာမ်ဘာသာရဲ့ စစ်မှန်တဲ့ ဆုံးမသွန်သင်ချက်တွေကို လိုက်နာကျင့်သုံးခြင်းမရှိဘူးလို့ စွပ်စွဲပြီး အချို့ကို သတ်ဖြတ်ခဲ့ကြပါတယ်" ဟု အာမက်က ဆက်လက်ပြောကြားသည်။
အနီးနားရှိ ဘင်းဇီကျေးရွာလည်း တိုက်ခိုက်ခံခဲ့ရကြောင်း အာမက်နှင့် ဖက်ဒရယ် လွှတ်တော်ကိုယ်စားလှယ် ဂျာဖာရူ မိုဟာမက်တို့က AFP သို့ အတည်ပြုပြောကြားခဲ့သည်။
လာကူရာဝါအဖွဲ့သည် လျှို့ဝှက်သော အဖွဲ့ဖြစ်ပြီး သုတေသီအချို့က ၎င်းတို့အား ဘာကီနာဖာဆို၊ မာလီနှင့် နိုက်ဂျာနိုင်ငံတို့တွင် လှုပ်ရှားလျက်ရှိသော အစ္စလာမ်မစ်စတိတ် ဆာဟယ်အဖွဲ့ (ISSP) နှင့် ဆက်နွှယ်မှုရှိကြောင်း သုံးသပ်ထားကြသည်။
Ref:AFP
AFP photos
