အက်သလက်တီကိုအသင်းရဲ့ အာဂျင်တီးနားတိုက်စစ်မှူး အယ်လ်ဗာရက်ဇ်ဟာ မနေ့က အသင်းနဲ့အတူ လေ့ကျင့်မှုပြန်လည်ပြုလုပ်ခဲ့ကြောင်း သိရပါတယ်။
အယ်လ်ဗာရက်ဇ်က လာလီဂါပြိုင်ဘက် ဘာစီလိုနာအသင်းဆီ ပြောင်းရွှေ့ခွင့်ပြုဖို့ တောင်းဆိုခဲ့တာကြောင့် အက်သလက်တီကိုပရိသတ်တွေနဲ့ ဆက်ဆံရေးတင်းမာခဲ့ပြီး အသင်းရဲ့ လေ့ကျင့်မှုအစီအစဉ်တွေကိုလည်း ပျက်ကွက်ခဲ့ပါတယ်။
ဗီလာရီးယဲလ်နဲ့ပွဲမှာ ပရိသတ်တွေရဲ့ အော်ဟစ်လှောင်ပြောင်မှုနဲ့ ရင်ဆိုင်ခဲ့ရပြီးနောက် အယ်လ်ဗာရက်ဇ်က ဗုဒ္ဓဟူးနေ့နဲ့ ကြာသပတေးနေ့တွေမှာ ပြုလုပ်ခဲ့တဲ့ လေ့ကျင့်ရေးအစီအစဉ်တွေကို ပျက်ကွက်ခဲ့ပြီး သောကြာနေ့မှာလည်း တစ်ဦးချင်းလေ့ကျင့်မှုသာ ပြုလုပ်ခဲ့ကြောင်း သိရပါတယ်။
စနေနေ့က ဆီဗီလာနဲ့ ယှဉ်ပြိုင်ကစားခဲ့တဲ့ပွဲမှာလည်း အသင်းလူစာရင်းထဲ မပါဝင်ခဲ့ပါဘူး။
အက်သလက်တီကိုအသင်းက အယ်လ်ဗာရက်ဇ်ကို ဘာစီလိုနာအသင်းဆီ လုံးဝရောင်းထုတ်မှာမဟုတ်ကြောင်း ကြေညာခဲ့ပြီးနောက် အာဆင်နယ်အသင်းကို ပြောင်းရွှေ့မယ်ဆိုရင်တော့ ခွင့်ပြုပေးမယ်လို့ အသိပေးခဲ့ကြောင်း သိရပါတယ်။
ဒါကြောင့် အယ်လ်ဗာရက်ဇ်အနေနဲ့ အာဆင်နယ်ကို ရွေးချယ်ဖို့ နည်းလမ်းတစ်ခုတည်းသာရှိတော့ကြောင်း ထင်ကြေးပေးခဲ့ကြပေမဲ့ လက်ရှိအချိန်မှာ အက်သလက်တီကိုအသင်းနဲ့ လေ့ကျင့်မှုပြန်လုပ်ခဲ့တာကြောင့် အသင်းမှာ ဆက်ရှိသွားတော့မှာလားလို့ မေးခွန်းထုတ်စရာ ဖြစ်သွားခဲ့ရပါတယ်။
အက်သလက်တီကိုအသင်းရဲ့ အားကစားဒါရိုက်တာ မတ်တီယိုအယ်လီမန်နီကတော့ လာမယ့် လာလီဂါပွဲစဉ်မှာ အယ်လ်ဗာရက်ဇ် ပြန်ကစားဖို့ မျှော်လင့်ကြောင်း ပြောကြားခဲ့ပါတယ်။
