အီရန်နိုင်ငံက ဟော်မုဇ်ရေလက်ကြားကို ဖြတ်သန်းရန် ကြိုးပမ်းနေသည်ဟု ယူဆရသည့် သင်္ဘောများကို သတိပေးသည့်အနေဖြင့် တားမြစ်ဇုန်တစ်ခု သတ်မှတ်ရန် စီစဉ်နေသည်ဟု အီရန်နိုင်ငံတော်လုံခြုံရေးကောင်စီ အကြီးအကဲသစ် မိုဆင်ရီဇာအီက စက်တင်ဘာ ၆ ရက်တွင် နိုင်ငံပိုင်ရုပ်သံမှတစ်ဆင့် ကြေညာလိုက်သည်။
သို့သော် တားမြစ်ဇုန်သတ်မှတ်ရန် တိကျသည့် နယ်နိမိတ်များနှင့် အကောင်အထည်ဖော်မည့် အစီအစဉ်အသေးစိတ်ကို ထုတ်မပြောသေးပေ။
၎င်း၏ပြောကြားချက်အရ အဆိုပါ ဇုန်သစ်အစီအစဉ်ကို လာမည့်ရက်ပိုင်းမှ ရက်သတ္တပတ်များအတွင်း ကြေညာသွားမည်ဖြစ်သည်။ ယင်းဧရိယာသည် အမေရိကန်ရေတပ်၏ ရေကြောင်းပိတ်ဆို့မှုမျဉ်းမှ စတင်ကာ ဟော်မုဇ်ရေလက်ကြားဘက်သို့ ဆက်လက်ချဲ့ထွင်ကာ ယင်းမှတစ်ဆင့် ပါရှန်ပင်လယ်ကွေ့အတွင်းဘက်အထိ ဆက်လက်တည်ရှိမည်ဖြစ်သည်။
ထိုဇုန်အတွင်းသို့ ဝင်ရောက်လာပြီး ဟော်မုဇ်ရေလက်ကြားကို ဖြတ်သန်းရန် ကြိုးစားလာမည့် မည်သည့်သင်္ဘောမဆို အီရန်၏ ဒဏ်ခတ်ပိတ်ဆို့မှုစာရင်းထဲ ပါသွားမည်ဟု ရီဇာအီက သတိပေးနေသည်။ အမေရိကန်ကလည်း အီရန်ဆိပ်ကမ်းများကို ပစ်မှတ်ထားပြီး အီရန်မှ ရေနံတင်ပို့မှုများ မပြုလုပ်နိုင်ရန် ရေကြောင်းပိတ်ဆို့မှု ဆက်လက်ပြုလုပ်ထားဆဲဖြစ်သည်။
အမေရိကန်စစ်တပ်၏ အဆိုအရ ယင်းပိတ်ဆို့မှုကို စစ်သင်္ဘော ၂၀ ကျော်က ပူးပေါင်းဆောင်ရွက်နေပြီး စက်တင်ဘာ ၆ ရက်အထိ ကုန်သွယ်ရေးသင်္ဘော ၉၂ စင်းကို လမ်းကြောင်းပြောင်းစေခဲ့ကာ သုံးစင်းကို ရပ်တန့်စေခဲ့သည်။
