OpenAI ၏ ဉာဏ်ရည်တု (AI) မော်ဒယ်များက ယခုနှစ် နွေရာသီအတွင်း အမေရိကန် ကူးသန်းရောင်းဝယ်ရေးဌာနနှင့် စတော့ဈေးကွက်ဆိုင်ရာ ကြီးကြပ်ရေးကော်မရှင် (SEC) တို့၏ ဝက်ဘ်ဆိုက်များကို ထိုးဖောက်ခဲ့ပြီး ပညာရေးဌာန၏ ဝက်ဘ်ဆိုက်သို့ ဝင်ရောက်ရန် ကြိုးပမ်းခဲ့သော်လည်း မအောင်မြင်ခဲ့ကြောင်း သိရသည်။ ယင်းလုပ်ဆောင်မှုများကို OpenAI ကုမ္ပဏီကိုယ်တိုင်က မသိရှိခဲ့ဘဲ စက်တင်ဘာ ၂၅ ရက်ကမှ ယင်းဖြစ်စဉ်များကို အတည်ပြုပြောကြားခဲ့သည်။
ကုမ္ပဏီ၏ နည်းပညာသည် အများပြည်သူသိရှိပြီးသား အချက်အလက်များမှအပ အခြားအချက်အလက်များကို ဝင်ရောက်ရယူနိုင်ခြင်း မရှိဘဲ အစိုးရ၏ ဒေတာများနှင့် စနစ်များကိုလည်း ပြောင်းလဲခဲ့ခြင်းမရှိကြောင်း OpenAI ၏ ထုတ်ပြန်ချက်တွင် ပါရှိသည်။
အမေရိကန်အစိုးရ၏ အကြီးတန်း IT အရာရှိတစ်ဦးက ဌာနသုံးခုနှင့်ပတ်သက်၍ အစိုးရအနေဖြင့် အမှန်တကယ် ဖြစ်ပွားခဲ့သည်များကို ရှင်းရှင်းလင်းလင်း နားလည်ခြင်းမရှိသေးဟု ထုတ်ပြန်ထားသည်။
ယခုသတင်း ထွက်မလာမီ နှစ်ရက်ကလည်း OpenAI ၏ AI မော်ဒယ်တစ်ခုက ဇွန်လအတွင်း ဩစတြေးလျအစိုးရ၏ ဝက်ဘ်ဆိုက်တစ်ခုကို ခွင့်ပြုချက်မရှိဘဲ ဖောက်ထွင်းဝင်ရောက်ခဲ့ပြီး သီးသန့်အချက်အလက်များကို ရယူခဲ့ကြောင်း ဩစတြေးလျဝန်ကြီးချုပ် အန်သနီ အယ်လ်ဘန်နိဇ်က ကြေညာခဲ့သည်။
အဆိုပါ AI မော်ဒယ်က ဩစတြေးလျ၏ အများပြည်သူအတွက် ကျန်းမာရေးစောင့်ရှောက်မှုစနစ် Medicare နှင့်ပတ်သက်သည့် စာရင်းအင်းအချက်အလက်များကို ဖော်ပြထားသော Medicare Statistics Reporting Service Portal အတွင်းသို့ ဖောက်ဝင်ခဲ့ခြင်းဖြစ်သည်။
ဩစတြေးလျဝန်ကြီးချုပ်က ယင်းဖြစ်ရပ်နှင့်ပတ်သက်ပြီး OpenAI အမှုဆောင်အရာရှိချုပ် ဆမ် အယ်လ်မန်နှင့် ပွင့်ပွင့်လင်းလင်း ဆွေးနွေးထားပြီးဖြစ်သည်။ ဩစတြေးလျအစိုးရထံ OpenAI ဘက်က အချိန်ကြာမြင့်ပြီးမှ အသိပေးခဲ့သည့်အပေါ် စိတ်ပျက်မိကြောင်းနှင့် ဥပဒေအရ အရေးယူမှုများ မလွဲမသွေရှိလာမည်ဖြစ်ကြောင်းလည်း ဩစတြေးလျဝန်ကြီးချုပ်က သတိပေးခဲ့သည်။
OpenAI ၏ ထုတ်ပြန်ချက်တွင် ဩစတြေးလျနိုင်ငံနှင့်ပတ်သက်သည့် မေးခွန်းများကို ဖြေဆိုနိုင်ရန် AI မော်ဒယ်များက စမ်းသပ်ရှာဖွေနေစဉ် ဩစတြေးလျအစိုးရ၏ ဝက်ဘ်ဆိုက်နှင့် အွန်လိုင်းဝန်ဆောင်မှုအချို့ကို ဝင်ရောက်အသုံးပြုခဲ့ကြောင်း၊ ထိုလုပ်ငန်းစဉ်အတွင်း AI မော်ဒယ်များက ရည်ရွယ်ထားခြင်းမရှိသည့် လုပ်ဆောင်ချက်များကို လုပ်ဆောင်ခဲ့ကြောင်း ရှင်းပြခဲ့သည်။
OpenAI က ယင်းဖြစ်ရပ်ကို ဩဂုတ်လအတွင်းမှသာ သိရှိခဲ့ပြီး ဩစတြေးလျအစိုးရ ဌာနတစ်ခု၏ အီးမေးလ်လိပ်စာသို့ စက်တင်ဘာ ၁၀ ရက်တွင် အကြောင်းကြားခဲ့သည်။ ဝန်ကြီးချုပ်က လက်ရှိအချိန်အထိ ကိုယ်ရေးကိုယ်တာအချက်အလက်များ ခိုးယူခံရသည်ဟု မယူဆရသော်လည်း ဆက်လက်စုံစမ်းစစ်ဆေးနေသည်ဟု ပြောကြားသည်။
Ref: Politico / BBC
Photo: AP
